أدوات العمل بالريزن و كيفية خلطه

الريزن من جديد
أغسطس 29, 2018
إستخدام الريزن و تلوينه
أكتوبر 6, 2018

الشغل بالريزن

بالمرات السابقة حكيتلكم عن وين ممكن تلاقوا الريزن محليا بعمان، وقارنت بين 3 أنواع جربتها وإشتغلت فيه.

هلأ خليني أحكيلكم عن كيفية الشغل بالريزن – من ناحية خلطه والأدوات والأشياء اللي ممكن تحتاجوها وكيف نشتغل فيه ونلوّنه وأي إشي تاني رح أتزكره وأنا عم أكرلكم وأحكيلكم اللي عندي.

النقاط اللي رح أحكيها بتنطبق بشكل أساسي على كل أنواع الريزن (أو الإيبوكسي متل ما هو مسمى محليا) بغض النظر عن نسب الخلط أو المصدر (بس متل ما سبق وحكيتلكم أنا شخصيا صرت أشتغل بالنوع اللي بجيبه من عند البشيتي – ومش سبونسرد/ مدفوع، الرأي الشخصي بعد تجربة هاد والله 😊) ف بيصير عندكم الطريقة وإنتوا بتقدروا تختاروا النوع اللي بدكم ياه.

الأدوات والأشياء اللي رح تحتاجوها – ومن وين تلاقوهم والبدائل والأدوات اللي أنا بستخدمها

  • قفازات نايتريل

مش القفازات اللي بتكون نايلون – هدول ما رح ينفعوكم أبدا.

و لا قفازات اللاتيكس، في دراسات عم تحكي إنه أبخرة الريزن ممكن تتخلل مادة اللاتيكس و تسبب حساسية للجلد. كفوف أو قفازات النايتريل Nirtil بيجوا متل المطاط ولونهم بيج أو أزرق (في بنفسجي فاتح كمان بس اللون ما بيفرق). الريزن مادة كيميائية قوية (حسب النوع المستخدم) والأفضل ما تلامس الجلد. إن حصل ولامست الجلد، لازم غسل المنطقة بالكحول الطبي (أو الإسيتون – مزيل طلاء الأظافر، أو حتى التنر) ومن ثم بالماء والصابون بشكل جيد. لا تتهاونوا بهاد الموضوع رجاءا.

وين تلاقوهم؟ أي صيدلية – أنا بالصدفة لقيتهم لمحل ببيع بلاستيك بالجملة (قريب من بيتي كمان ف عصفورين ب حجر، سعر أقل وسهل أوصله)

 

 
2
  • أقنعة خفيفة

 لازم إستخدام قناع تنفس  أثناء العمل بالريزن وخلطه. ممكن تستغنوا عنه لكن لازم لازم لازم تهوية جيدة يعني تكونوا بمكان مفتوح مش داخل غرفة على سبيل المثال.

.وين بتلاقوهم؟ الأقنعة الخفيفة في أي صيدلية، ما عندي منهم فما صورت

من الأفضل  إستخدام الأقنعة اللي بيكون فيها فلتر. هدول أضمن و أضمن. لقيت منهم بالبشيتي (شارع المدينة الطبية) و سعرهم جدا مناسب، 4دنانير و ممكن تغيير الفلتر كل فترة. 

 

  • أوعية لتخلطوا الريزن فيها

يفضل تكون بلاستيكية. أكواب البلاستيك الشفافة مناسبة جدا بس حاولوا تلاقوا نوع أو شكل معين بدون الأخدود اللي بيكون بالأسفل (إنه يكون قاع الكاسة أو الكوب مستوي أو مسطح دون أو تقعرات أو أخاديد) أو حتى على الجوانب عشان أسهل للخلط. الأحجام الوسط إلى الصغيرة أفضل لخلط كميات قليلة من الريزن وللسكب أو الصب. لا تستخدموا الأكواب الورقية (اللي بنشرب فيها قهوة سادة أو نسكافيه من محلات القهوة السريعة مثلا، لأنهم ممكن يأثروا على الريزن بألياف الورق أو هم يتأثروا بالحرارة الناتجة عن خلط الريزن). ولوبتلاقوا أنواع بيكون مقسّم عليها الحجم أحسن وأحسن. أنا حاليا عم بشتغل بتوزين الريزن مع المثبت بدل الحجم وعم أحصل على نتائج مماثلة للي بحصل عليها بخلط الريزن حسب الحجم.

وين تلاقوهم؟ محلات الأدوات المنزلية – كارفور مثلا والمحلات اللي زيه – محلات لوازم الحفلات والحلويات – محلات بيع البلاستيك (في محلات خصوصي متل اللي حكيتلكم عنه فوق)

 

 
11
  • ميزان للغرامات

في حال حبيتوا تخلطوا الريزن حسب الوزن.

وين بتلاقوه؟ محلات الأدوات المنزلية أو محلات الحلويات و لوازمها

 

 
10
  • أدوات لخلط الريزن

ممكن ملاعق بلاستيكية، ممكن عصي خشبية عريضة (متل اللي عند الدكتور). والأفضل تكون أداة التحريك أو الخلط مسطحة لنحصل على خلط أفضل.

وين تلاقوهم؟ بكل محل 😊 السوبرماركات المكتبات حسب شو أسهل عليكم.

 

 
9
  • قوالب

أفضل الأنواع لقيتها قوالب السيليكون – اللي بتكون طرية وبأشكال متعددة. لكن ممكن تستخدموا أنواع تانية  متل قوالب البلاستيك، بس لازم تتأكدوا إنه مناسبين للريزن من خلال تجربة كمية قليلة أولا.
وخلوا ببالكم متى ما إستعملتوا القالب للريزن، خلص ما بتقدروا تستعملوه لأي إشي متعلق بالأكل. حتى لو نظفتوه وغسلتوه منيح. قوالب الريزن خلوها فقط للريزن.

وين تلاقوها؟ أون لاين بتلاقوا أشكال كتيرة ومميزة ومخصصة للريزن ما لقيت منها محليا للأسف (المخصصة للريزن قصدي) فاستبدلتها بالقوالب المستخدمة للحلويات والتزيين. ف دوروا بهاي المحلات وشوفوا الأشكال المتوفرة عندهم.

محلات أبو زهرة بشارع الأردن عنده كمية منها لا بأس بها (عنده فرع تاني بواد الرمم...لأ، والله ما بعرف وين واد الرمم بس هو العمو بالمحل حكالي). وف كزا صفحة بتبيع أون لاين عالفيسبوك ممكن أدلكم عليها بس بعد ما أجرب أطلب منهم وأتأكد من جودتهم وهيكا 😊

 

 
8
  • القطع اللي بدنا نحميها/نغطيها

ممكن ما بدنا القوالب، بدنا نحمي قطعة معينة بطبقة من الريزن. طاولة صغيرة على سبيل المثال، صينية أو كوسترات. أي إشي بدنا ياه ونشتغل عليه (ممكن لوحة رسمناها حتى). ممكن كمان قطع الإكسسوارات الخاصة بالريزن بتكون على شكل إطار معين بنعبيها بالريزن. ممكن كمان أسلاك معدنية نشكلها بأشكال معينة مسطحة ونستعملها. حتى ممكن نستخدم صور مطبوعة لكن هاي بدها شروط خاصة رح أحكي عنها بالتفصيل.

إكتشفت كمان ممكن نشتغل على قطع بلاستيكية مسطحة (بنقصها بالمقص أو الخرامات) من السلايدات أو الملفات البلاستيك الشفافة أو الملونة. هاي رح تحتاجوا تجربوها مع الريزن عشان تضمنوا نقدر نزيلها بعد ما يتصلب الريزن.

وين نلاقيها؟ بيعتمد على شو عندكم وشو بدكم تشتغلوا. إطارات الإكسسوارات ممكن تلاقوها بمحلات الإكسسوارات (البلد مثلا، في منطقة مخصصة لهاي المستلزمات قريب الجامع الحسيني ف إلّا ما تلاقوا طلبكم). ما صحلي أنزا عالبلد الفترة الأخيرة، ف بس أنزل المرة الجاية بتأكدلكم إن شاء الله. ممكن نزّال خلدا تلاقوا أكمن شكل (بس مش مجموعة كبيرة صراحة اللي بينفع لشغل الريزن)

أشكال البلاستيك: بنقصها يا بالمقص يا بالخرامات من سلايدات بلاستيك شفافة أو ملونة. بتلاقوها بالمكتبات

 

 
7
  • أي زينة أو إضافات بدنا نزيدها

غليتر – خرز – ورد منشف – أي إشي ممكن يخطر على بالكم

وين بتلاقوها؟ حسب اللي بدكم ياه وشو متوفر عندكم

  • اغطية بلاستيكة أو كرتونية

بعد ما نسكب الريزن بالقوالب أو على القطع اللي بدنا ياها، لازن نغطيه بحيث ما ييجي عليه أي إشي متل الغبرة أو أي إشي تاني ممكن يطير مع الهوا وينزل على سطح الريزن. الغطاء نفسه أكيد ما يلامس القطعة أو الريزن بشكل مباشر

وين بتلاقوها؟ أي إشي عندكم، بوكس كرتون زيادة، تبر- وير زيادة، غطاء علبة بلاستيكية عميقة...أي إشي.

  • مصدر حرارة/ لهب

قداحة قوية، أو قداحة اللي بنشعل فيها الفرن (هاي اللي بيكون إلها إسطوانة طويلة)، مشعل يدوي صغير.

مش شمعة لأ لأ لأ لأ ومليون لأ

بنستخدمهم للتخلص من الفقاعات اللي بتصير بالريزن أثناء الخلط أو الصب. وبنحاول ما نعرض الريزن للحرارة بشكل مباشر أو مستمر (إنه ما نسلّط الحرارة على مكان واحد لفترة طويلة) وبنخلّي الشعلة بعيدة أقل إشي مسافة 5 سم تقريبا في حال إستخدام المشعل.

ممكن إستخدام السشوار أو بما يعرف بالمسدس الحراري Heat gun

أنا ما بحبهم، السشوار بيتسب بتيار هواء قوي بيحّرك طبقة الريزن كاملة أو ممكن يطلعه برا القالب وغلبة.

المسدس الحراري – تيار هوائي كمان (لو مش قوي متل السشوار) وما حبيت النتائج بإستخدامه أبدأ. حسيت ما بقدر أتحكم بوين عم تتسلط الحرارة.

وين بتلاقوها؟

القداحة العادية – كل مكان

المشعل اليدوي – محلات مستلزمات الحلويات وحتى ممكن محلات أدوات البنا

اللي عندي، قداحة لكن قوية جدا لقيتها عند زوجي ف صادرتها منه، والحلو فيها إنه قوتها متل المشعل لكن بحجم القداحة العادية وممكن إعادة تعبئتها وعنده من زمان ف ما بعرف من وين جابها. رح تشوفوها بالصور إن شاء الله.

 

 
6
  • صبغات أو ألوان/ملونات

للريزن في ملونات أو ألوان/أصباغ خصوصية للإستعمال معه، بتيجي على شكل سائل أو بودرة حسب نوعها. ممكن نستخدم أشياء تانية كبدائل لتلوين الريزن، متل صبغات الطعام، أو ألوان الأكريليك وأشياء تانية رح أحكيها بالتفصيل لقدام

وين نلاقيها؟

الألوان والصبغات المخصصة صراحة حتى ما دورت لأنه فاقدة الأمل ألاقيها محليا من قبل ما أدور (إلّا إزا أون لاين وهاد كمان فاقدة الأمل منه)، ف طوالي بلشت بالبدائل. جربت الألوان المائية والأكريليك وألوان الزجاج وصبغات الطعام والأحبار الكحولية و...نسيت شو كمان.

الألوان المائية سيبوكم منها – إستعملت السائلة - النتائج ما عجبتني (وقت تثبيت الريزن زاد، ما تصلّب منيح ضله دبق).

ألوان الأكريليك – إستخدمتها بكميات قليلة جدا – يعني إستعملت راس نكاشة الأسنان لإضافة اللون. حسب جدوة نوع الأكريليك المستخدم بتكون النتيجة. في أنواع إستعملتها ما توّزع اللون منيح ف ضل متل الخطوط أو الرقائق من الأكريليك عالقة بالريزن. اللهم زاد وقت التصلّب للريزن بس نشف بدون دبق.

ألوان الزجاج – نفس المبدأ، كمية قليلة من اللون، حسب جودة النوع المستخدم ونتائج متفاوتة.

صبغات الطعام والأحبار الكحولية – نتائج متفاوتة. إشي طلع منيح إشي طلع مصيبة....

هون رح تكون نصيحتي – جربوا كمية قليلة من الأشياء هاي وشوفوا شو بناسبكم وبيعجبكم أكتر إشي.

أنا بالنسبة إلي، ألوان الزجاج أكتر إشي عجبتني و بعدها الأكريليك (بس اللهم تكون جودته عالية).

هلأ ممكن تلوين الريزن بطريقة تانية رح تستغربوها. بس هاي الطريقة ما بتنفع للسكب بالقوالب، بتنفع ف حالة الصب أو السكب فقط. بنسكب الريزن على سلايد بلاستيكي (اللي حكيت عنهم فوق، الأشكال المقصوصة) ملوّن، وبسبب شفافية الريزن وإنعكاس الأشعة فيه طبقة الريزن كاملة بتاخد اللون الموجود بالسلايد أو قطعة البلاستيك. رح تشوفوا بالصور شو قصدي. بس اللهم لحد الآن تجاربي كانت على أحجام صغيرة، هيني عم أجرب على قطع أكبر حجما وطوالي بخبركم بالنتائج.

 

 
5
  • حصيرة سيليكون

هاي رح تحتاجوها في حال إشتغلتوا بالريزن بدون قوالب. ممكن نستخدم حصيرة السيليكون الخاصة بالخبز والطهي (لكن متل القالب متى ما استعملناها للريزن ما بنستخدمها لأغراض الطهي والأكل). أو ممكن تستخدموا أي حصيرة بلاستيكية مسطحة (أي حركة أو شكل على الحصيرة رح تنتج على قطع الريزن بس تتصلب إزا إستخدمتوها بدون قوالب أو أشكال البلاستيك) ف لازم تكون مسطحة.

أشكال البلاستيك اللي بنلبسها بالريزن لازمها قاعدة ترفعها عن سطح العمل بحيث ما يسيل الريزن عن الجوانب بس بدها دعم

وين بتلاقوها؟ اللي أنا بستعملهم جبتهم آيكيا (المسطحة وسادة) بس بستعمل الجهة الخلفية لأنها ملساء أكتر. واللي بستعملها مع أشكال البلاستيك من محل إسمه السنتريسي (حتشوفها بالصور) هو محل أدوات منزلية بس ممكن تلاقوها بأي محل أدوات منزلية، اللهم تكون سيليكون وتكون قريبة من هاد الشكل (بالصور). في حصيرة خصوصي لهاد التقنية من الشغل بالريزن بس ما لقيتها محليا وممكن تطلبوها عبر الإنترنت.

 

 
4
  • لاصق (لزيّق) شفاف

اللاصق العادي الشفاف اللي بنجيبه من المكتبات. بس اللهم يكون عريض شوي أسهل وقت الشغل. ممكن كمان نستخدم التجليد الشفاف ونقص من اللي بنحتاجه بس اللهم كتكلفة أكتر شوي. (أنا عندي زيادة من وقت تجليد دفاتر وكتب بنتي ف بستعمل التنين حسب الأسهل إلي أوصله)

  • مثقاب يدوي صغير

هاد بيكون لقطع الإكسسوار اللي بنعملها، لثقب ثقوب التثبيت والتركيب. بس لازم يكون كتير صغير (قياس الريشة يا دوب نصف أو ملميتر واحد)

وين بنلاقيه؟ محلات مواد البناء أو الكهربائيات ممكن (أنا اللي عندي صادرته مع القداحة من زوجي)

 

 
3

خلط الريزن وتجهيزه

لازم نخلط الريزن حسب نوعه ونسب الخلط المفروضة. مثلا، متل ما قلتلكم من الأنواع اللي إستعملتها كان في إشي بخلط مقدار من المثبت/المصلّب لمقدارين من الريزن، وإشي خلطت مقدار من الريزن مع مصلّب/مسرّع بنسبة مئوية معينة من حجم الريزن المستخدم.

بنقيس الكمية المطلوبة من الريزن (مثلا بمكيال معيّن أو حجم معيّن من الكاسة أو بمعيار معيّن) والكمية اللازمة من المصلّب/المثبّت. الأفضل بأوعية منفصلة إزا ما كان عنا المكيال/الوعاء مدرّج أو عليه تدريج/مقياس.

ثم بنخلط التنين سوا، بإستخدام معلقة أو قطعة خشبية حسب اللي عم نستعمله، بشكل جيد وبطيء. بنحاول نخلط بشكل دائري أولها، وشوي شوي عشان ما تتشكل عنا فقاعات على قد ما نقدر، وبعد أول دقيقة من الخلط بنصير نحرك بشكل دوائر من فوق لتحت عشان نضمن خلط الريزن مع المثبّت/المصلّب بشكل متساوي. إزا الكاسة أو الوعاء عنا بقعر غير مسطح لازم نتأكد إنا حركنا بأي أخاديد موجودة أو إنحناءات. بنخلط بشكل جيد جدا لمدة لا تقل عن 2 – 3 دقايق (حسب نوع الريزن). وبعدها بنخلي الخليط على جنب بدون أي تحريك لنتخلص من كمية منيحة من الفقاعات. هاي الخطوة بيحكولها بالإنجليزي - Degasing – أو إزالة الغاز (اللي هو الهواء العالق بالفقاعات). في ماكينات معينة بيحكولها مفرغات الهواء بس هاي مكلفة صراحة وللأغراض الصناعية أكتر من من الأغراض الحرفية.

الريزن والمثبت عادة بيجيوا شفافين (مش دايما لكن النوع اللي بنحتاجه للحرف تاعتنا لازم يكونوا شفافين) ومتى ما خلطناهم مع بعض رح تلاحظوا إنه بيصيروا متل اللون الحليبي الفاتح جدا، والقوام بيصير أسمك. بتقدروا تحكوا متل القطر التقيل (الشيرة ممكن مصطلح تاني) ف بنضلنا نخلط حتى يرجع الخليط عنا شفاف بدون أي خيوط حليبية والقوام يكون موحد.

هيك الريزن بيكون جاهز لنتشغل فيه.

هون بفضّل أكمل بجزء تاني عشان ما تكون هاي المقالة أطول من شهر 7. ف التكملة بالجزء التاني إن شاء الله