اصنعها بنفسك – صينية الرخام

كيف تستخدم الوسم "الهاشتاغ" للترويج لمشروعك
يناير 11, 2018
مشروع سريع – صندوق مزخرف
يناير 21, 2018

السلام عليكم، مرحبا

القطعة اللي كانت مصد الإلهام، هي من أنثروبولوجي – قطعة رخام مع مسكات دهبيات – وكانت نقريبا 98 دولار – دولار ينطح دولار. لما نتطلع عالقطعة، هي قطعة جميلة جدا, وبنفس الوقت بسيطة جدا ومن الممكن نحنا نعمل قطعة مشابهة بمواد سهلة ومتوفرة محليا وبكلفة وسعر أقل بكتير

A40981425_015_b

لما فكرت فيهأ، لقيت ممكن أعملها بطريقتين: أجيب قطعة رخام حقيقية بالشيء الفلاني و أركّب عليها الإيدين/المسكات بس وزنها رح يكون كيييير تقيل أو ممكن أعمل إشي قريب منها لكن من خشب و بالتالي الوزن رح يكون كتير أخف

تمام، كيف أخلّي الخشب يبيّن متل الرخام؟ عنا طريقتين و رح نورجيكم ياهم بالفيديو و رح نحتاجلهم

قطعة خشب – النوع إم دي إف: ممكن تكون بقشرة أوبدون قشرة بلوط. سماكة قطعة الخشب ما بين 15مم ل 20 أو22 مم. هيك حسيت مناسب وأكتر من كافي. من عند النجار أخدت قطعتين قياس 16 سم ب 45 سم تقريبا بدينارين أردني (من حظي كان يومها عنده قطع كتير زيادة ف راعاني بالسعر مزبوط وأعطاني القطعة التالتة هدية لأنه كانت ملونة أخضر – بقولكم حظي حلوكان يومها) لكن ممكن السعر يترواح بين 3 – 6 دينار أوأكتر شوي حسب النجار وضميره. السماكة 18 مم. اسألوا النجار ينعملكم (يحف) الحواف والقطعة  بشكل عام حتى ما تحتاجوا ورق زجاج وخطوة عمل زيادة. يعني كمتوسط رح يكلفكم الخشب 4 دنانير بالحجم و السماكة اللي حكيناهم

ألوان أكريليك أبيض/أسود: السكني بيطلع معنا لما نخلط هدول اللونين بنسب مختلفة. رح أحتاج أخلط درجتين من اللون السكني، فاتحة وغامقة (بزيادة أونقصان اللون الأسود مع الألبيض). ونسبة اللون الأبيض بتكون أكتر بكتير من اللون الأسود – تتهوروش وتحطوا أسود كتير. حبة حبة وزيدوا شوي شوي. الألوان متعددة الأنواع و الأسعار، لكن رح نستعمل كمية بسيطة جدا فلو إشتريتوا علبة كبيرة بتقدروا تخلوها تستعملوها بمشاريع تانية بما إنها ألوان أساسية (استثمار لعدة مشاريع) بتقدروا تحكوا. اللون الواحد بكلفة 2.25 دينار

فراشي دهان: بشكل أساسي، وحدة لدهان الطبقة الأساسية من اللون ووحدة تكون ناعمة/صغيرة لرسم تفاصيل وعروق الرخام. في أنواع كتير و بأسعار مختلفة أنا أخد الفرشايتين بدينار من المكتبة

مسكات أوأيدين خزانة/أبواب: هدول بتلاقوهم عند محلات مواد البناء أومحلات العدة. أشكال وألوان وموديلات بتنقوا اللي بيعجبكم. السعر حسب إنتوا إخترتوا ومن وين.براغي لتثبيت الإيدين تكون أطول من سماكة الخشب المستخدم عندي – عادة بيجوا مع الإيدين/المسكات. المسكات اللي أنا أخدتهم كانوا عندي من مشروع سابق، ف ما بتزكر بالزبط قديش سعرهم. لكن تقريبا ما بين 2 ل 3 متوسط الأسعار للمسكات بالحجم المناسب المذكور فوق لقطع الخشب

تجليد رخامي: هاد بتلاقوا بمعظم المكتبات الكبيرة أواللي بيكون عندهم مجموعة كبيرة من التجاليد. هاد بيجي تلزيق، متل التجليد الشفاف اللي بنجلد فيه كتب المدارس. بيجي باللون الأسود واللون الأبيض. أنا أخدت الأسود كتغيير وأجرب ألوان تانية. المتر بدينار كأنه، إن شاء الله بعدّل الأرقام قريبا بس أتأكد

دهان ذهبي: رش/سبري أوسائل. الرش أسهل، و دينار العلبة و بتكفيكم لعدة مشاريع

ورنيش شفاف: عشان يعطي لمعة خفيفة للقطعة بس نخلص وحماية للون من إنه يروح. دينار علبة الرش

إسفنجة خشنة: أنا أستعملت اسفنجة كانت عندي، مافي نوع معين, لكن الأفضل تكون مسامات الإسفنج ككبيرة شوي بتعطينا تأثير أحلى للألوان – متل اسفنجة البحر، إزا ما عندي أوما لقيت ممكن أستعمل كيس نايلون. بكرمشه وبجمّعه يإيدي متل الكرة قبل الإستخدام

دريل – مثقاب: مع ريشتين قياس 4.8 أو5 و10. القياس الصغير بركبه عالدرل، وبستعمله عشان ثقوب براغي التثبيت. الريشة الكبيرة  ممكن أستعملها يدوي (حتشوفوا بالفيديو كيف) عشان أعمل متل الحفرة أوالجورة يدخل فيها راس البرغي وما يضله طالع فوق سطح الخشب ويقحط الأسطح اللي رح أحط الصينية عليها. إزا ما عندكم درل ممكن تستأجروا (في محلات عدة بيأجروا هيك أدوات وبأساس يومي) أوممكن تاخدوها عند النجار ويعمللكم الثقوب

هاد إختياري: لباد قطع دائرية بقصها يدوي أوبيكون بالمحلات جاهز بينحطوا تحت الأثاث أوالكراسي. الجاهز فيه منه بآيكيا مثلا بنص دينار الباكيت وفيه 16 حجم صغير و4 حجم كبير

ورح أحتاج أدوات أساسية، متل قلم رصاص، مشرط أومقص، مسطرة (مسطرة زاوية قائمة)  ومفك

نصيحة دايما خلّوا الدرل/المثقاب مشحون رح تعرفوا ليش بالفيديو

ملاحظات عن الطريقة الأولى – التجليد

هاي بستعملها فقط مع الخشب إزا عليه قشرة. يعني الإم دي إف العادي اللي مش مغطى بقشرة بلوط مش رح تزبط عليه هاي الطريقة لأنه التجليد مش رح يمسك عليه منيح. ممكن أستعمل نوع خشب لاتيه، لكن رح أتغلب بالحواف والجوانب وبده تنعيم وحف مزبوط، وأغلى شوي

جودة التجليد كمان بتفرق. في أنواع ممتازة، بتلزق بشكل ممتاز وما بيكون عندي انبعجات وطعجات كتير بعكس الأنواع السيئة اللي رح تغلبنا كتير ونحنا بنجلّد قطعة الخشب

كمان مهم ندير بالنا ونحنا بنشتغل ما يصير عنا فقاعات هوا بالتجليد عشان رح يأثر عالمنظر النهائي للقطعة. فش عنا رخام منفخ أو فيه نفخات 😊 و ممكن إزا صار عنا فقاعات نستعمل دبوس و نتخلص من الفقاعة بالضغط عليها و تنفيس الهواء منها

لأنه التجليد مش مخصص لنستعمله عالخشب (إلا إزا لقيتوا نوع معيّن مخصوص للخشب) مع الوقت ممكن يفلت ، ف لازم كل فترة نشيّك ع جوانب الصينية ودايرها ونرجع بمسطرة بلاستيك نشد عالتجليد والأطراف ليمسكوا منيح

ملاحظات عن الطريقة التانية – الدهان و التلوين

هاي الطريقة بس لقطع الخشب اللي ما عليها قشرة بلوط أو عروق خشب. الإم دي إف العادي أنسب إشي، لأنه عروق الخشب رح تخرب علينا تأتير الدهان ومش رح تعطينا شكل حلو بالنهاية

إزا ما بتحبوا إيديكم تتوسخ، إلبسوا كفوف لأنه هاد المشروع عجقة

ممكن تدوروا على صورة لقطعة رخام طبيعة وتاخدوها متل المرجع وإنتوا عم ترسموا عشان تشوفوا كيف العروق والظلال بتكون

جربوا على قطعة خش زيادة التلوين والدهان قبل ما تبلشوا عالقطعة الأساسية عشان تاخد إيدكم عالتقنية والأسلوب

مهم كتير, وإنتوا عم ترشوا موي، ما ترشوا وإنتوا ماسكين المرش من قريب عالقطعة. إزا حضرتوا الفيديورح تلاحظوا إنه المرشة أغلب الأوقات مش مبينة ( الحق عليّ ما انتبهت غير بعد التصوير) بس السبب كان, لو رشيت من قريب رح تصير الموي عندي مركزة بمكان واحد وتتجمع بنقطة وحدة. الإشي هاد إحنا ما بدنا ياه، بدنا نرش الموي بطبقة خفيفة موزعة عالسطح كله، وما بيصير هيك غير لما أرش من بعيد. تقريبا يعني 20 – 30 سم بعيدعن سطح القطعة

لما آجي أخفف اللون وأنشف الموي بالقماشة النظيفة (ما رح تضل نظيفة هي ع فكرة مع الشغل 😊 ) بشتغل بحركة الطبطبة مش المسح. ديروا بالكم إزا مسحتوا بالقماشة الألوان كلها رح تخبص

ونفس الإشي وأنا عم ألوّن، طبطبة مش خطوط مستمرة بالإسفنجة أوالكيس

قطعة البلاستيك اللي خلطت الألوان عليها، بتقدروا تغسلوها وتنظفوها وبترجع فل. وبتقدروا تستعملوها مرة تانية بمشروع تاني

صحيح، أسهل تحفروا ثقوب التثبيت تاعت الإيدين/ المسكات قبل الدهان والتلوين