أفضل أنواع الخشب للإستخدام في الحرف اليدوية

كيف تسعّرين منتجاتك؟
ديسمبر 13, 2017
مشروع سريع – شمعة و قهوة
ديسمبر 18, 2017

في الكتير من الأوقات رح نحتاج لقطعة خشب أو أكنر لمشروعنا او شغلنا. حتى ممكن يكون أساس شغلنا أو حرفتنا هو الخشب. ممكن عشان نرسم عليه، أو نعمل منه صينية أو خلفية لقطعة تانية…ف حسب شو بدنا نعمل و نشتغل لازم نختار النوع المناسب من الخشب

عشان هيك، رح أحكي شوي عن أنواع الخشب بشكل بسيط، و خصائص كل نوع و مميزاته. عشان إنتوا تختاروا النوع اللي بناسب حاجاتكم و شغلكم. و الحكي رح يكون بالنسبة للإستعمالات الأساسية في الحرف اليدوية – يعني اللي حابب يتخصص بالخشب و شغل الخشب من صنع و تشكيل الأثاث رح يحتاج يكمل بحث و دراسة عن الخشب بشكل متفصل أكتر

الخشب عنا بيجي بنوعين: الطبيعي و المُصنّع

الطبيعي قصدنا فيه هو الخشب اللي ما تعرض لأي عمليات تحويلية كيميائية غير القص- من الشجرة بعد قطعها و تحويلها لعوارض خشبية

المُصنّع هو اللي بيصنعه الإنسان من نشارة و زوايد الخشب بعد الخلط مع الغرا و المواد اللاصقة و كبسه بمكابس حرارية، أو تجميع طبقات و قطع خشبية بطرق معينة و ترتيب معين/ ليتتشكل عنا ألواح خشبية

إزاً الخشب الطبيعي بيجي على شكل عوارض, و المُصنّع بيجي ع شكل ألواح

إيش هي العوارض؟ العارضة – المفرد- بتكون قطعة خشبية طويلة. بتيجي بأطوال و سماكات و أعراض مختلفة حسب نوع الخشب و الشجر الأصل. ممكن الطول يكون بين 2.5 متر ل 4 متر، السماكات ببين 1.5 سم ل 2.2 سم, و العرض بين 1.4 سم ل 2.5سم. كله بيعتمد على نوع الخشب متل ما قلنا و نوع الشجر الأصل و المصدر – من وين إجت الشجرة/الخشب
الألواح عادة بتكون بقياس 2.44م في 1.22م

الخشب الطبيعي بيجي قسمين: الخشب الصلب و الخشب اللين. الفروق بينهم رح نحكي عنها بالجدول
الخشب الطبيعي بتكون عروق الخشب ظاهرة و مكشوفة. و بيجي قسمين: الخشب الصلب و الخشب اللين. الفروق بينهم رح نحكي عنها الجدول

الخشب الليّن

الخشب الصلب

الفروق

أقل كثافة

أكثر كثافة

الكثافة

أخف

أثقل

الوزن

أسهل للقص

أصعب للقص

الصلابة

أرخص نسبيا أغلى نسبيا

السعر/الكلفة

                   أمثلة على الأنواع المتوفرة بالأردن. ممكن تتوفر أنواع مختلفة عندكم حشب البلد اللي انتوا فيه

الأخشاب الصلبة: منها
أِش ,أفروموزيا, أكوميه, أمازاكويه,إيروكو, أيوس, بتولا,بلوط, بلوط أبيض, بوبينجا, تياما, تيك, جوز, دابيما, زان, زيبرانو, سابيلي,  فراكيه, كرز, ميبل, ميرانتي, واوا, وينجي, يايا

الأخشاب اللينّة: منها
أرز، حور، دنوب، سويد، سويد كندي، شوح أبيض

الخشب الطبيعي في مشكلتين صغار، إنه خلال الخشب وعروق الخشب في عُقد. العُقد هاي بتكون ناتجة عن غصن وقع عن جذع الشجرة وهي عم تكبر، ف بيصير محل الغصن متل الدائرة و هي اللي بنحكيلها عقدة. منظرها حلو أحيانا و بتعطي منظر للخشب، بس بتكون متل حلقة ضعيفة – ممكن يصير عندها كسر أو حتى ممكن العقدة تطلع من محلها – عشان هيك أغلب النجارين لما يستعملوا الخشب بمشاريعهم بيكونوا يدوروا على عدد أقل من العقد. عموما الخشب الصلب فيه عقد أقل من الخشب اللين. و المشكلة التانية هي الشظايا اللي ممكن تنتج عنه ف لازمه سنفرة بشكل جيد و خصوصي عالأطراف و الزوايا

الخشب المُصنّع

وهلأ رح نحكي عن الخشب المُصنّع، و هو عبارة عن قسمين: واحد بيكون من نشارة و زوايد الخشب المعجونة بغرا و مواد لاصقة و رابطة ، و التاني من طبقات رفيعة و قطع خشب مركبة و مرتبة  بشكل متقاطع و ملزقة بطرق معينة. القسمين بنشكلهم ع شمل ألواح خشبية باستخدام مكابس حرارية خاصة بعد الخلط أو ترتيب القطع/ الطبقات

أغلب أنواع القسم الأول ما بتتحمل رطوبة. إزا ما تعاملنا معها عند الدهان و التأسيس مزبوط، و تعرضت لسوائل رح نلاقيها – نفشت – رح تتشرب السوائل هاي و تزيد بالحجم في المناطق اللي تعرضت للسوائل. لكنه من السهل كتير نتعامل معها من تأسيس و قص و تجهيز. و الحلو فيها ممكن تركيب قشرة خارجية إلها لتعطيها مظهر و عروق الخشب الطبيعي. رح تلاقو إلها كتير استخدامات، مثلا الكتير من منتجات آيكيا – الأثاث – مصنعة من نوع أو تاني من الأخشاب المصنعة

القسم التاني (قطع الخشب المركبة)  بيجمع بين متانة و مظهر الخشب الطبيعي و خفة الوزن و بسعر أقل. متين وقوي جدا و بيجي بسماكات عالية نسبيا

من أنواع الخشب المصنع المختلفة المتوفرة بالأردن
إم دي إف ، سيلوتكس، لاتيه، مازونيت، مضغوط، معاكس

السؤال هلأ، بعد ما حكينا عن الأنواع المختلفة، شو أفضل وأحسن نوع اختاره في أشغالي ومجال الحرف اليدوية؟

أول إشي بدنا نخلي ببالنا مجالنا والإستخدامات اللي نحنا بدنا الخشب عشانها، مثلا، إزا بدنا نرسم عالخشب لوحات ورسمات بألوان مختلفة، من الأفضل استخدام لأخشاب المصنعة (الأخشاب الطبيعية مكلفة رح تكون و ما رح تعطيني المساحة الكافية لخلفية الرسمة لأنها بتيجي ع شكل عوارض) ف أفضل اختيار بيكون عنا النوع المصنع اللي من طبقات (القسم التاني اللي حكينا عنه فوق) لأنها بتعطيني مساحة كافية (بقدر أقص أي حجم من اللوح الموجود اللي يناسب حجم لوحتي) و كمان لأنها بتتحمل السوائل من الألوان بدون ما تتأثر متل النوع الأول اللي  من نشارة و زوايد. و قياسا على هيك، بنشوف إيش الخصائص اللي بنحتاجها و بندور ع أفضل نوع من الخشب اللي يطابقها

بس بشكل عام – و هاد رأيي بعد تجاربي الشخصية – أفضل الأنواع هي ال (إم دي إف) و الأبيض أو السوّيد. ال إم دي إف عشان خفيف الوزن، سهل التعامل معه من تأسيس و سنفرة و دهان, سماكاته المختلفة و موجود بقشرة أو بلا…. و أهم إشي فش شظايا. إزا حابين مظهر طبيعي أكتر لمشروعكم أو حابين متانة أكتر الأبيض أو السويد ممتازين لكن ديروا بالكم من الشظايا

من وين أشتري الخشب؟ و كيف الأسعار؟

أول مكان هو من عند أي نجار. رح تلاقوا أغلب المناجر موجودة بالمناطق الصناعية – متل في وحدة بصويلح و وحدة بالبيادر و كتير محلات غير ف حسب إنتوا وين ساكنين و اللي بيكون قريب عليكم – بس بدكم تشوفوا كزا نجار و تاخدوا فكرة عن شغلهم و أسعارهم للمقارنة و تنقوا الأفضل إلكم

أسعار الخشب بتكون عادة حسب سعر المتر المكعب. فأسهل طريقة لتحسبوا سعر الخشب هو تحسبوا حجم العارضة أو اللوح (الطول بالعرض بالسماكة) و بعدها تحسبوا نسبة هاد الحجم من حجم المتر المكعب. بدها شوية رياضيات بس سهلة أمورها. لتاخدوا فكرة أفضل موجود بالفيديو مثال على سعر لوح م د ف و سعر عارضة خشب أبيض سوّيد -عشان تحضروا الفيديو 😊ا

تاني مكان – محلات القش – اللي ببيعوا تجهيزات القش. بتلاقوا عندهم قطع مقصوصة جاهزة، ف رح تتقيدوا بالأشكال اللي عنهم أو الأحجام الموجودة. و عندهم بالعادة بيكون بس إم دي إف مش أنواع تانية. و ممكن إزا كانوا متعاونين توصوهم ع الأشكال اللي بدكم ياها و الاحجام ف اعملولكم لفة. من المحلات اللي لقيتهم و كتير متعاونين بس لازم توصوهم قبل بوقت، موجودين بالزرقاء – الأردن (اسم المحل أبو يزن و موجود مقابل سوق البلدية) ف اللي قريب عليه ممكن يستفيد. مثلا اللي بالصورة هي قطع من عند هيك محل، لاحظوا الثقوب اللي عالداير – عشان تثبيت القش- و في عدة أشكال أساسية و أحجام مختلفة، لكن غير بالإتفاق أو التوصية ما بتلاقي طلبك بالزبط

img_20171214_014910.jpg

تالت مكان – المكتبات و محلات القرطاسية الكبيرة. بتلاقو عندها مجموعة جاهزة من الأشكال و الأحجام بس عليكم تنقوا و تبلشوا شغل عليها. عنا بالأردن ممكن عند مكتبة الإستقلال أو سمير و غسان (مممممككككننن مش عالأكيد للأسف)، أو مثلا بالسعودية مكتبة جرير
( لويش ما عنا جرير بالأردن؟؟؟)

رابع مكان – رح تستغربوا بعرف- لكن محلات الأدوات المنزلية، أو محلات الكل شيء بدينار عنا (دايسو مثلا بالسعودية ) ممكن تلاقو قطع خشبية تشتغلوا عليها لكن مشكلتها إنه لازم تعدلوها و تزبطوها – مثلا تقيموا الإضافات اللي عليها – عشان تناسبكم. هاد الخيار الأخير للناس اللي ما بتقدر توصل لعند النجار و ما لقت بالمكتبات أو أي مجال تاني