رحلة البحث عن مناديل الديكوباج

التجهيز و التأسيس
مايو 12, 2018
وين هالغيبة؟
يوليو 5, 2018

بغض النظر عن إن كنتم محترفين بالدكبجة أو لساتكم مبتدئين و عم تبلشوا تتعلموا و تمارسوه كهواية جديدة، رح تلاحظوا إنه هناك شح و جفاف شديد جدا جدا في المناديل الورقية الممكن إستخدامها لغايات الديكوباج و الدكبجة محليا بالأردن. أو إنه أنا كنت بواجه المشكلة هاي بشكل فردي لأنه قليل ما كنت ألاقي تصميمات أو ديزاينات بتناسب الديكوباج - و لأ مش قصدي فقط بالشكل أو الرموز اللي على المناديل من ورد أو ألوان أو غيره...لكن حتى في جودة الطبع على المناديل و الخطوط و الأفكار اللي ممكن أستخدمها فيها

ف عندي حلين (غير طباعة المناديل الخاصة فيي) - أضلني مستمرة برحلة البحث الطويلة ( و ما زلت و أغلب الظن رح تكون رحلتي طويلة) في محلات الأدوات المنزلية و محلات السلع الصينية أو كل شيء بدينارو غيرها و بس الاقي موديل أو تصميم معين، أشتريه بكميات مهولة (عشان بعرف على شكل التأكيد إنه إزا ما أخدت و رجعتله بعدين ما رح ألاقيه مرة تانية). لكن صار عندي معرفة بعدة محلات اللي بعرف إنها بتجيب مجموعة جيدة من المناديل و بروح عليها أول إشي لما يبلش مخزون المناديل عندي يقل أو إزا سمعت من الأصدقاء (أو من خلال الفيسبوك) مثلا عن محل معين عنده مجموعة وأشكال جديدة. الله وكيلكم صايرين قرايبي و أصحابي يرنوا تلفونات أو مسجات واتساب إزا لقوا أشكال مناديل جديدة (شوفيييي شو لقيت، بيهمك)؟  أو إزا حدا من القرايب أو المعارف جايين من برا زيارة للأردن كنت أوصيهم يجيبوا معهم و العجقة هاي كلها

 

تاني حل - أطلب عبر الإنترنت و كلنا بالأردن اللي جربوا يطلبوا عبر الإنترنت بيعرفوا قديش الموضوع بيضايق مش بس بيغلب. من إختيار الموقع، أو إختيار بديل الموقع اللي بنقدر نشتري من خلاله إلى الواقع المؤلم اللي هو كلفة الشحن إلى الأردن - قلبي و جيبتي يتقطعان كل ما أتزكر هاي النقطة - و الفترة الزمنية اللي لازم أستناها بأغلب الأحيان ليوصل الطلب - إن وصل (لكن حاليا صار عنا خدمات و تطبيقات محلية بتساعد بهاد الموضوع و بتقلل من الفترة الزمنية هاي لكـــــن بزيادة الكلفة) . و مش رح احكي عن موثوقية الدفع لدى الموقع أو البائع اللي عم أشتري منه اللي كلنا لازم ندير بالنا منه خلال عملية الشراء عبر الإنترنت

عشان هيك، لما لقيت هاد الموقع - و جربته و التجربة كانت جدا ناجحة - قلبي كان يتقافز فرحا يا جماعة، و رح أحكيلكم عنه للي بيحب يجرب و يشوف

https://artmall.ae/

الموقع بيوفر مجموعة منيحة من المناديل الورقية، و ورق الديكوباج و ورق الرز و بأحجام مختلفة، مع مواد و أدوات مختلفة و أسعار جدا معقولة. المسؤولين عن الموقع موجودين في الشارقة، و لما دورت بالخيارات لقيت إنه عندهم الشحن بيكون (الدفع عند الإستلام) لكــــــن بدول الخليج. ف اللي عملته إني كملت *بحبشة* و تدوير عشان أعرف تفاصيل و خطوات الشحن للأردن

اللي عملته أول إشي إنه إخترت الأشياء و القطع اللي بدي ياها. و بعدها بعتلهم إيميل عالعنوان اللي كان بالموقع، ردوا علي تاني يوم  و أسلوبهم جدا ظريف و منيح و طلبوا مني التواصل معهم عبر الواتساب للسهولة . قمت طوالي بعتت عبر الواتساب و كانت البني آدمة اللي تعاملت معي شخص رائع صراحة، كتير حبابة  و كتير ساعدتني و تحملتني بكل أسألتي عن الأغراض و التكلفة و الكيفية و الشحن للأردن . الدفع للطلب إما بتحويل بنكي أو حوالة مالية (هاد اللي أنا اخترته من خلال وسترن يونيون) و تكلفة الشحن بتكون حسب الوزن، بس بما إنه الأغراض اللي طلبتها معظمها ورق و مناديل ورقية الوزن كان خفيف نوعا ما و الحلو بالموضوع إنها ساعدتني بمعرفة تكلفة الشحن بالزبط. تمام، بعد الإتفاق على الأغراض و تأكيد الطلب و العنوان، قمت بتحويل الحوالة المالية (تكلفة الأغراض+ تكلفة الشحن) و خلال 4 أيام تقريبا الطلب كان عندي ع باب البيت. التغليف كان ممتاز و جودة الأغراض اللي جوا ممتازة ف صراحة بعد تجربة موقعهم أظن أغلب تعاملي رح يكون معهم (و أملي يكبروا مجموعة الأوراق و التصاميم اللي عندهم لقدام أكتر و أكتر) - معلش ما صورت الطرد و المغلف بس وصل لأنه صراحة من فرحتي نسيت 😅😅.  طلبت كمان ستيكرات و قطع زينة خشبية خفيفة و ستنسل فإن شاء الله بالقريب العاجل رح تشوفوا مشاريع و قطع رح أعملها منها

و هاي صور القطع و المناديل اللي طلبتها عبر الموقع

هدول أوراق ديكوباج مختلفة الحجم مع قطع زينة خشبية و ستيكرز، و ستنسل