رفوف تخزين سهلين

مشروع خفيف لطيف لرمضان
مايو 17, 2020
 

 

عندي بالبيت, موزع غرفة الماستر و في الفراغ هاد اللي بيجي و را الباب متل مو شايفين بالصورة.

 

 
 
 

عم أعاني منه من أول ما سكنت البيت و مش عارفة كيف أستغل المساحة الموجودة بأحسن طريقة.

ضله فاضي لفترة منيحة ، و بعدها كنت حاطة فيه وحدة دروج بس كإستغلال للمساحة هاي كانت فكرة ضعيفة و تضل تتجمع الكراكيب فيها بكل سهولة.

تمام، بعد التفكير و التمحيص و التجربة، و خصوصي مع المعاناة اللي عانيتها تخزين الأواعي الشتوي (مين منا ما بعانيها) خصوصي مع البطانيات و المخدات و الأشياء الإضافية التانية (متل شناتي السفر على سبيل المثال).

هلأ، متل الأغلب، كنت ضابة الأواعي الشتوي تحت التخت، أو فوق الخزانة جوا الشناتي. بس أنا طووووووووووووول عمري بكره منظر أي إشي فوق الخزانة. كره شديد و من صغري، و نفس الإشي لتخزين الإواعي تحت التخت. ف من هون لهون و مع ربط مشكلة التخزين مع المساحة اللي ورا الباب.... حزرتوا أكيد. قرقرت بشكل ما أعمل المساحة هاي مساحة تخزين.

بيني و بينكم كتييييير كان ببالي كتير أفكار، بس ولا وحدة ناسبت المكان هادا لسبب أو تاني (ازا بدي أعمل قعدة صغيرة، مافي مجال عشان الطريقة اللي بيفتح فيه الباب غير إنها بالزبط عند باب حمام الماستر أجلكم الله....فكرت أعملها متل زاوية خضرا، يكون فيها زريعة أو منظر حلو مع رف رفين صغار...بس ما بيوصلها ضو طبيعي و جاي بدون أي تهوية (مش مجرى هوا). و غير إنه أنا إيدي مش خضرا (قاتلة زريعة متسلسلة)

 

ف هون وصلنا لأفضل فكرة لإستغلال المساحة هاي. خزانة حيط، و توصل للسقف علشان أفضل إستغلال.

أول إشي ... فكرنا إنه نشتري خزانة صغيرة، بس ما لقينا إشي منيح حجمه للمساحة و إنه الخزانة توسع البلاوي اللي بدي أحطها و أخبيها بالزاوية هاي.

قلنا، خلص بنفصّل خزانة تفصيل....بس هون حطينا بريك (و لا دعسنا بريك متل ما بدكم) لسببين:

الأول – البيت عندي إيجار، ف ممكن بعد فترة و لو طويلة نرحل (مش ناوية لا قريبا و لا بعيدا أرحل، بس دايما بيضله هاد إحتمالية ببيو الإيجار لأنه الواحد ما بيعرف شو بيصير)، و إزا رحلنا...ممكن الخزانة بعد ما نفكها ما يكون إلها مكان أو ما تناسب البيت الجديد.

غير إنه البيت إيجار و ما بنقدر نعمل أي تغييرات جذرية بشكل أو آخر.

التاني – التكلفة... يا جماعة الخير، أقل تكلفة لقيتها بعد اللف و الدوران كانت 200 دينار. و أنا بدي بس رفوف مش إشي تاني. يعني لا تقسيم و لا دروج و لا حتي أبواب سحاب (لو أبواب فتح عادي ما كان عندي مشكلة. و رجعة للسبب الأول، لو حسيت إنه التكلفة هاي رح تكون منقولة مش ضايعة كان بقولكم ممكن فصلّت.

ف هون صاحبتكم شو عملت؟ فكرت و طقطقت شوي (يزن بيعرف إنه مش شوي – كتير و لفترة طويلة، بس هاي هااااه خلصت) و قرقرت الآتي – أروح عند النجار، أفصّل قطع خشب لاتيه على قد المساحة عندي و أعمل الرفوف أنا (رح أحكيلكم كيف). بس بيضل عندي مشكلة، كيف أغطي المنظر. إنه رح يكون في رفوف، بس كيف بدي أغطي منظر البلاوي اللي رح تكون عالرفوف؟

إنحلت مشكلتي هاي، بإنه رح أغيّر عندي برادي غرفة النوم، و مخلية البرادي القديمة. قلت بستعملهم و بزبطهم بدل ما أتصرف فيهم أو أوزعهم.

 

التكلفة؟ إحزروا....

20 دينار خشب. فقط. لإنه باقي المواد كانت عندي. بس إزا حبيتوا تعملوا هيك فكرة، لازم تحسبوا كلفة البرادية اللي بدكم تحطوها، مع عمود البرداية اللي هو 3 ل 4 دنانير (عبارة عن عامود برداية الشاور و موجود بعدة ألوان) .... و متوفر حاليا برادي بأسعار كتييير خفيفة لطيفة، ف مش رح تطلع عليكم بمبلغ يوجّع الجيبة أو الميزانية، أو فيكم تستغلوا أي قطعة قماش كبيرة عندكم و تفصلوها كبرداية لتغطية الرفوف.

تمام. الخطوات
أول إشي عملته، قست المساحة عندي اللي حسيتها مناسبة و كافية. عندي كانت 165 في 60 سم. تمام، رحت عند النجار عبدالله الرائع (ما شاء الله عليه، صارلي سنين بتعامل معه و شغله ممتاز...إزا بتحبوا تواصلوا معي بدلكم عليه). قلت لعبدالله بدي 3 قطع خشب لاتيه بالقياس المطلوب. مع 9 بقياس 60 في 5 سم (رح تشوفوا هدول لشو كمان شوي). السماكة خليته هو يقررها. و رجعتله تاني يوم عشان آخد الخشبات.

 
 
 

تمام. رجعت عالبيت. بالمتر، قررت وين بدي يكون أول رف. إرتفاع 100سم لأول رف، و 180سم للرف التاني (هون قرقرت رفين رح يكونوا كفاية، ف ما كملت للتالت، بس فيكم تكملوا على قد ما بدكم عدد من الرفوف). علمت بقلم الرصاص عند كل قياس على ال3 جهات من الزاوية و بعدة نقاط عشان أقدر أرسم خط بين النقاط اللي على إرتفاع واحد. و تأكدت بميزان المي من إنه الخط المرسوم تمام و مش مايل للقياسين.

فش أبيخ من الرف المايل (الحال المايل بايخ، بس الرف المايل أبيخ).

تمام. هلأ، رح نرجع لعند قطع الخشب الرفيعة اللي جبناها. و رح نخزقها 3 ثقوب. هدول رح يكونوا ثقوب للبراغي.

هاي الخطوة مهمة، و بالإنجليزي بينحكالها

Predrilling the wood

أي، التثقيب المسبق للخشب. قبل إدخال البراغي. لأنه لو ما عملنا هيك و طوالي دخلنّا البرغي ممكن الخشب عنا يفشّخ و يخرب. ف هيك بيكون أضمن و أرتب الشغل.

 

تمام، على الخط اللي رسمناه على الحيط، بنحدد مكان الخشبة الرفيعة ، و بإستعمال فلم رصاص رفيييييع بنعلّم، محل الثقوب هاي عالحيط.  هاي الخطوة بنعملها مرة على جهة من الحيط (اليمين و الشمال و الخلفي)

محل العلامات اللي عملناها، بنثقب الحيط بالدريل. و بنحط أسافين (ضروري الأسافين عشان البراغي يمسكوا منيح بالحيط و ما يطلعوا و تصير عنا مصيبة). بعد ما حطينا الأسافين، بنركّب قطعة الخشب الرفيعة على الحيط ببراغي. إستعملت براغي 6 سم، عشان تمسك منيح بالحيط و تتحمل أوزان أكتر.

تمام، بنكرر العملية هاي للإرتفاع التاني (اللي رح يكون محل الرف التاني). بيصير عنا هيك قواعد للرفوف. بس لأنه عندي الرف طويل، و الأوزان اللي رح أحطها تقيلة نوعا ما ف رح يتقوس الرف عندي لتحت. ف عشان هاد الإشي ما يصير عملنا القاعدة اللي على الجهة الخلفية.

تمام، بنجيب قطعة الخشب الكبيرة، و بنحطها على القواعد الثلاثة و بيصير عنا هيك رف. و بنركب الرف التاني.

تمام، البرداية، حطيتها على عامود برداية الشاور، و ركبتها عادي بالإرتفاع اللي بدي ياه ( أو إرتفاع البرداية) بدون أي مشاكل أو براغي زيادة. هلأ هون أنا عم أفكّر من الرف اللي ضل و ما ركبته أعمل متل الغطا لقدام عامود البرداية أغطيه عشان يعطيني شكل حلو.

 

بس و هااااد هو. شو رأيكم بالنتيجة النهائية؟ ضبيت كل أواعي الشتوية، و البطانيات و الشناتي. و لسه عندي مجال بالرف الفوقاني فيما لو إحتجت أضب أي إشي تاني.