كيف ندهن الخشب بألوان الأكريليك

فضفضة و سؤالين
يناير 10, 2019
التأثيرات النهائية
فبراير 8, 2019
 

السلام عليكم ورحمة الله وبركاته،

هالمرة رح أحكي كيف أنا بدهن القطع الخشبية من الإم دي إف بألوان أو دهانات الأكريليك لثلاث قطع: الأولى رح أستخدم لون واحد، والتانية والتالتة رح أخلط  ألوان أساسية لأنتج ألوان ثانوية بدرجات مختلفة ورح أطبق أسلوب التعتيق. القطع اللي رح أدهنها عبارة عن أحرف وكلمات، يعني أشكال متنوعة بتعرجات وثقوب، بس بنقدر نطبق نفس الأساليب على الأشكال اللي بتكون هندسية ومنتظمة (حتى الأشكال المنتظمة بتكون أسهل، لكن إخترت الأشكال الغير منتظمة عشان أورجيكم الأصعب). متل دايما، الخطوات هاي، هي الخطوات اللي أنا بتبعها وأنا عم أشتغل، اللي بعتبرها مناسبة إلي، ممكن تناسبكم وممكن لأ، ممكن تتفقوا معي ممكن لأ، كله رح يرجع إلكم وشو بيناسبكم وبيناسب شغلكم.

أول خطوة هي تجهيز القطع، من خلال صنفرة جميع الأطراف والحواف بشكل مناسب بورق الصنفرة، بعدين تنظيف القطعة بإستخدام قطعة قماش نظيفة وجافة.

بعدين، تاني خطوة رح تكون تأسيس القطعة. أنا بستعمل الجيسو، لكن ممكن تستخدموا أي بديل (حكيت عنهم بفيديو رح أحط الرابط الخاص فيه إن شاء الله).

كيف أأسس القطع؟
أنا بحب أستخدم فرشاية، نوعا ما رفيعة عشان أسهل أوصل لكل الزوايا، خاصة الثقوب الداخلية من القطعة. ممكن تستعملوا فرشاية الإسفنج (أو حتى قطع الإسفنج) لكن بفضل إستخدامها لاسطح القطع مش جوانبها عشان صعب نوصل للزوايا والأماكن الضيقة بالإسفنج.

تمام، بنبدأ بأطراف وجوانب القطعة، وأي ثقوب داخلية من القطعة. ليش؟ عشان يكون أسهل إلنا نمسك ونتحكم بالقطعة اللي عم ندهنها من أسطح القطعة الأمامية والخلفية. لو كان بدينا بدهان السطح، كان بيصير لازم نستنى ينشف السطح عشان ندهن الأطراف والحواف بدون ما نخرب طبقة الجيسو.

بحمّل الفرشاية بكمية مناسبة من الجيسو (أو دهان التأسيس) وببدا بدهان بالأطراف والحواف متل ما حكينا. خشب الإم دي إف بيحكوله خشب عطشان، بتشرب أي سوائل أو رطوبة ممكن نحطها عليه (وينفش) ف إزا كنا عم نستعمل بديل للجيسو نحاول نتحكم بكمية السوائل الموجودة بهاد البديل. مع الجيسو، كثافته وسيولته مناسبة، لكن رح أحتاج أتأكد إنه غطى جميع الأماكن. بس أخلص من الحواف والأطراف، بدهن السطح، وهون ممكن أستعمل الفرشاية أو مدقة/فرشاية الإسفنج. وبترك القطعة تنشف، وبتأكد من أي بقع مش مأسسة أو ما وصلها الجيسو. هيك بتكون حاهزة أدهنها بدهان أو ألوان الأكريليك.

 

كيف ندهن بألوان/دهانات الأكريليك؟

القطعة الأولى:

بنختار اللون اللي بدنا ياه. هون أنا رح أدهن القطعة باللون الأسود (لون بدون خلط). رح أستخدم فرشاية رفيعة نوعا ما للحواف والثقوب. وللسطح رح أستخدم إسفنج.

نفس الخطوات، بحمل الفرشاية بكمية مناسبة من اللون، وأنا بستخدم غطاء وعاء اللون/الدهان (أو سلايد بلاستيكي) عشان أضرب الفرشاية عليه قبل ما أبلش دهان القطعة أتاكد من إنه ما حملّت أي كمية زيادة. ليش؟

لأنه الأكريليك بيمشي معنا كتير، بنحتاج كمية قليلة لندهن السطح (طبعا بيرجع لحسب نوع وكثافة الأكريليك بنحدد المساحة اللي ممكن ندهنها بكمية معينة). وإزا حملّنا الفرشاية كمية كبيرة من الأكريليك ممكن يصير عندي تكتلات من اللون وطبقة غير موحدة ف بيصير عندي الدهان ومنظر القطعة النهائي مش حلو. بتأكد إنه دهنت القطعة بشكل مناسب وما نسيت أي مكان. لو حسبت اللون ما غطا القطعة بشكل مناسب أو في أماكن ما دهنتها منيح مافي مشكلة بقدر ارجع أدهن طبقة خفيفة تانية من اللون.

يعني، الأحسن ندهن عدة طبقات خفيفة من الأكريليك عشان نغطي السطح من إنه ندهن طبقة وحدة سميكة غير متناسقة.

 

 

القطعة التانية:
رح أدهنها باللون السكني (الرمادي الفاتح) وأعتقها (أعمل عليها تأثير التعتيق).

اللون السكني بحصل عليه من اللون الأبيض والأسود، وحسب الكميات اللي بخلطها من اللونين بتكون درجة السكني/الرمادي اللي نتجت معنا. كل ما زدنا الأسود، بيغمق اللون والعكس صحيح، كل ما قللنا الأسود اللون الناتج بيكون أفتح.

عشان تخلطوا ممكن تستعملي الفرشاية، بس أنا بحب مدية الرسام، أحسن وأريح بحسها. وبستعمل سلايد بلاستيكي عشان أخلط واشتغل عليه. رح تلاحظوا الفرق بين كميات الأبيض والأسود، يعني تقريبا معلقة كبيرة من اللون الأبيض مع نقطة نقطتين من الأسود بيعطونا رمادي درجته متوسطة (ف عشان هيك، دائما نبلش باللون الفاتح (الأبيض عنا هون) ونضيف الغامق شوي شوي (الأسود عنا هون).

بس نوصل الدرجة اللي بدنا ياها، بندهن قطعة الخشب. الحواف الأول بعدين السطح.

تمام، إجى دور نعتق. هون صار عندي خربطة وما صورت الخطوة هاي، بس بقيم كمية من اللون اللي دهنت في القطعة على جنب (في حال صار عندي غلطة أو مكان مش حاببته عشان أقدر أغطيه بنفس اللون). والكمية اللي صلت بزيد عليها شوية أسود وبخلط عشان يصير عندي درجة أغمق من اللون. وبعدين باخد كمية قليلة من الأبيض (ممكن أزيدها لقدام). هون أحسن نستخدم فرشاية عريضة، بتعطي تأثير أحلى من الفراشي الرفيعة.

بحمّل الفرشاية من الدرجات الغامقة والفاتحة والأبيض، وبضرب الفرشاية على سلايد البلاستيك أو الأرضية اللي عم أشتغل عليها، عشان أخفف الألوان ع قد ما أقدر بدون ما أخلطها مع بعض، وبعدين على قطعة الخشب بدهن بضربات عشوائية. وبكرر الخطوات هاي لحتى أوصل النتيجة اللي بدي ياها أو اللي عاجبتني. وما أنسى الأطراف

بس أخلص بقدر أنظف السلايد البلاستيكي بمناديل مبللة أو قطعة قماش مبللة عشان المشاريع التانية والجاية.

 

تمام، القطعة التالتة، بدي أدهنا باللون الأخضر الفاتح، لكن الدرجة مختلفة شوي ف شوفوا معي شو رح أعمل. هلأ اللون الأخضر بنحصل عليه من خلط اللون الأصفر والأزرق، أو بنقدر نجيبه جاهز. اللي عملتهـ أخدت كمية من الأخضر الجاهز والأبيض وخليت الأزرق والأصفر على جنب.

خلطت كمية من الأبيض مع شوي من الأخضر، عشان أحصل على أخضر فاتح بس درجة الأخضر ما كنت حاببتها كتير، ف على طرف خلطت كمية صغيرة من الأخضر الفاتح مع أزرق (ما خلطت كل الكمية عشان إزا ما عجبتني النتيجة ما أضطر أعيد من الأول وأخسر كل الكمية اللي عندي)، بعدين زدت أصفر، هيك قدرت أغير من درجة الأخضر الأصلي الجاهز اللي كان عندي. ضليتني أخلط حتى وصلت الدرجة اللي بدي ياها. وبعدها دهنت القطعة بننفس الخطوات اللي حكيناها للقطع السابقة.

نسأل الله الفائدة لنا ولكم <3