لتشجيع الأطفال على الصيام

تخزين الخرز بطريقة سهلة
أبريل 28, 2018
تصميم – اليوم صمت للساعة
مايو 2, 2018

واحد من الشغلات اللي بلشت فيها هاي السنة تحضير أنشطة صغيرة لاشجّع و أحبب بنتي سيرلا بالصيام إن شاء الله. و بنفس الوقت حابة أنمي مهارات تانية من خلال الأنشطة هاي من مبدأ عصفورين بحجر. ف الفكرة اللي خطرتلي و اللي رح أطبقها إن شاء الله هي فكرة - أنا اليوم صمت للساعة

مبدئها كتير سهل - نتابع عدد الساعات اللي قام الطفل بصيامها باليوم الفلاني من رمضان، و تسجيلها بطريقة تشجعه على تخطي هذا العدد من الساعات باليوم اللي بعده. ف اللي عملته، صممت تصميم صغير، ألوان و كزا و فوانيس رمضان و ضمن التصميم ساعة... اللي رح نعمله، نحدد وقت الإفطار بعلامة على الساعة و نتابع مع الطفل صيامه خلال اليوم...متى ما تعب الطفل من الصيام و صار عليه مشقة و إضطر يفطر - بنسجل هاد الوقت على الساعة و بنحطله نجمة أو أي ستيكر (شكل لاصق) على جنب الساعة رمزا لليوم اللي صامه. إزا الطفل صام اليوم كامل لوقت الإفطار بيكون فيه إله جائزة. أي إشي بيحبه الطفل من حلو أو لعبة بسيطة أو حتى نلعب معاه اللعبة اللي بده يلعبها. بس رجائي الحار، إنه الجائزة ما تكون نقود/مالية...خلوها معنوية أكتر صدقوني أحلى

كيف؟ أنا بقولكم، بتلاقوا التصميم إن شاء الله بقسم مجانيات، بتنزلوه و بتطبعوه. و بعدين بإستخدام التجليد الشفاف - أو ممكن التجليد الحراري بأي مكتبة - بنجّلد الورقة اللي طبعنا التصميم عليها

هون عم أجلّد الورقة بعد الطباعة بإستخدام التجليد الشفاف

بعدين رح نحتاج أقلام اللوح الأبيض - لونين، أي لونين- أنا بنتي سيرلا إختارت الأزرق و البنفسجي. بختار لون لتحديد وقت الإفطار - البنفسجي - و اللون التاني لتسجيل وقت صيام الطفل - لسيرلا كان اللون الأزرق. الستيكرات اللي إختارتها  كانوا نجوم

متل ما رح تشوفوا بالصور،بإستخدام مغناطيسات علقتها على الثلاجة و عالساعة سجلت وقت الإفطار بالبنفسجي - لليوم الأول كتجربة- و حطينا بالأزرق وقت عشوائي إنه الوقت اللي أفطرت فيه و حطينا نجمة لأنها صامت جزء من اليوم (بس بدون جائزة). بنخليهم لتاني يوم و بنحاول نخلي الطفل يتعدى الوقت اللي كان باليوم السابق

مثال - على وقت اللي أفطر فيه الطفل 
و سيرلا عم تحط ستيكر عن الصوم اللي صامته - هون كنا عن نعمل نمثّل عشان البوست لأنه كان قبل رمضان

آخر الشهر، و حسب عدد الستيكرات اللي جمعّها الطفل بيكون إله عالعيد جائزة كبيرة حسب الإتفاق - بنتي مثلا إتفقنا تخليها تتعلم سباحة إن شاء الله. ف إنتوا حسب شو بتتفقوا مع

أولادكم و هم شو بيحبوا

هيك الطفل بيصير يشجّع نفسه ليتخطى الوقت السابق، و يتعلّم عالوقت و قراءة الساعة و بيتلهى عن مشقة الصيام ليقدر يصوم اليوم كامل إن شاء الله. أول مرة رح اجربها ف إن شاء الله بعد رمضان بخبركم عن النتائج