ماكينات القص اليدوية و الإكترونية

موقع مفيد – floor planner
نوفمبر 11, 2019
مصدر جديد و نوع جديد – غرافيتي
ديسمبر 23, 2019
 

السلام عليكم ورحمة الله وبركاته

بعد ما نزلت صورة ماكينة الكريكت على الفيسبوك والإنستغرام، كان في هناك كمية هائلة من الاستفسارات عنها وعن ماكينات القص بشكل عام (الإلكترونية أو اليدوية بشكل عام) ف قلت خليني أحاول ألخص الموضوع عنهم وأبيّن الفروق بينهم عشان اللي حابب/حابة يكون عندهم فكرة شاملة.

(للي حابب يعرف من وين جبت الكريكت ينزل لتحت بالمقالة طوالي)

تماااااام، هساعيات = هسع = هسه = هلأ رح أحكي عن الماكينات بشكل عام.

ماكينات القص نوعين (بإختلاف الماركات) – يدوي وإلكتروني.

الماكينات اليدوية (على الأغلب أو بشكل عام): بيكون إلها قوالب خاصة، بنحط المادة اللي بدنا ياها تنقص على القالب، وبنحصر القالب بين ألواح أكريليك خاصة حسب سماكة المادة والقالب (متل السندويشة)، بندخل سندويشة القالب والألواح جوا الماكينة، وبنلف إيد أو ذراع ميكانيكي حتى نمشّي السندويشة هاي بين إسطوانات (داخلية جوا الماكينة) بتضغط على القالب بشكل كبييير، وبالتالي بتضغط حدود القص بالقالب على المادة لتقص الشكل المطلوب. بالزبط متل مبدأ قطاعات الكوكيز والكعك (كيف بنضغط القطاعة على العجين لتعطينا الشكل المطلوب؟ نفس المبدأ لكن طريقة الضغط مختلفة شوي أو كتير). بنفك السندويشة تاعتنا وبنلاقي الشكل المراد قصه جاهز. أشهر مثال عليها هو البج شوت (BigShot) من شركة سيزيكس (Sizzix)

الماكينات الإلكترونية: بنركب المادة المراد قص الشكل المطلوب منها، على حصيرة قص خاصة (شوفوا الجدول تحت لتعرفوا إيش هي حصيرة القص)، وبندخل حصيرة القص على الماكينة. الماكينة بيكون فيها راس متحرك بتكون شفرة القص ثابتة عليه. من خلال برنامج خاص (إما على الكمبيوتر أو التلفون حسب نوع الماكينة عندكم) بنصمم الشكل اللي بدنا ياه، وبنرسل أمر القص من البرنامج للماكينة. اللي رح تمشي شفرة القص (أو الرأس المتحرك اللي عليه الشفرة) حسب هاد التصميم. بس تخلص عملية القص، بنفك حصيرة القص من الماكينة، وبنفك المادة عنها لنحصل على الشكل المطلوب. أشهر مثال عليها هو الكاميو (Cameo) من شركة سيليويت (Silhouette).

 

 

طبعا في أشكال و موديلات وشركات تانية، وحتى أحجام من نفس الموديل/ الماركة. ف عشان هيك الحكي رح يكون بشكل عام وأساسي، لأي حدا بيفكر يجيب ماكينة معينة لقص المواد المختلفة.

هلأ رح أحاول ألخص مزايا ومساوىء كل نوع بشكل جدول عشان يكون أسهل للمقارنة. وإن شاء الله إزا كنت ناسية إشي أو مع الوقت اضطريت أزيد بس رح أعدّل على الجدول.

 

الخاصية       /      نوع الماكينة 

يدوي

إلكتروني

أداة القص بالماكينة؟

قوالب خاصة متعددة الأشكال والأحجام. لكل شكل لازم قالب خاص ولكل حجم (حتى لو نفس الشكل) قالب منفصل

شفرة صغيرة تكون مثبتة على قاعدة بلاستيكية منفصلة. 

طريقة التشغيل

على الأغلب بإستخدام ذراع ميكانيكي يتم تحريكه باليد. يتم إدخال القالب داخل الماكينة، ويتم تحريكه بإستخدام الذراع الميكانيكي

من خلال شفرة يتم التحكم بها من خلال برنامج خاص يتم تشغيله على الهاتف أو الكمبيوتر.

مشكلة أداة القص؟

·   سعرها المتوسط للمكلف حسب القالب

·   تتطلب مساحة كبيرة/معينة للتخزين.

·    تغيير شفرة القص كل فترة (حيث مع القص والإستخدام بتصير الشفرة غير حادة) وبتأثر على جودة القص.

·    تتطلب نوع خاص من الشفرات في حال استخدام سماكات معينة.

سهولة إيجاد الشكل المطلوب لأداة القص؟

ممكن جدا عدم إيجاد الشكل المطلوب أو القالب المطلوب. القوالب متعددة لكن الأشكال محددة.

تصميم أي شكل مطلوب من خلال البرنامج الخاص.

حصيرة القص؟

لا تحتاج لحصيرة قص

تحتاج لحصيرة قص

حصيرة القص عبارة عن قطعة بلاستيكية حجمها بعتمد على ماركة/نوع الماكينة المستخدمة، لكن عادة ما تكون بعرض 6 أو 10 أو 12 إنش (بشكل عام). يكون لهذه الحصيرة جهة مغطاة بنوع من اللاصق الدبق (غير الدائم)، بحيث لما نحط المادة المراد قصها تلزق/تثبت عليها وما تتحرك أثناء تحريك شفرة القص على المادة لقص الشكل المطلوب.

مشكلة حصيرة القص؟

-

تحتاج للتغير لكل فترة، حيث إنه اللاصق اللي عليها تخف فعاليته مع الإستخدام.

الميزاينة المطلوبة / السعر بشكل عام

تتطلب رأس مال شراء الماكينة مع إضافاها الأساسية، ومن ثم سعر كل قالب مطلوب للإستخدام بشكل منفصل.

تتطلب رأس مال لشراء الماكينة مع إضافاتها الأساسية. ومن ثم سعر الشفرة والحصيرة التبديلية حسب طبيعة الإستخدام. ممكن شراء تحديثات البرنامج المستخدم للماكينة لكن النسخ الأساسية مجانية وكافية لكل الوظائف الأساسية.

المواد الممكن قصها؟

تقص مجموعة واسعة من المواد.

بشكل عام ممكن قص جميع الأنواع من المواد مثل القماش/الكرتون/الورق/اللباد/رقائق النحاس أو الخشب لكن بشروط ولحد سماكات معينة لبعض المواد. تقريبا لحد 5مم في بعض الأحيان وبعض الماكينات.

تقص مجموعة محدودة من المواد.

بشكل عام ممكن قص القماش/الكرتون/ورق التجليد اللاصق/شرائح البلاستيك. (أنواع معينة منها قادرة على قص خشب البلسا/رقائق النحاس واللباد)

أكبر سماكة (بشكل عام وحسب النوع) تقريبا ما بين 2 مم ل 5مم.

سهولة الإستخدام؟

سهل جدا. تحتاج فقط القالب والماكينة، والمادة المراد قص الشكل منها. لا تحتاج ضبط لأي إعدادات أو تهيئة أو حتى كهربا. فقط إتباع الخطوات المناسبة لنوع المادة المستخدمة

تحتاج لجهاز كمبيوترأو هاتف (حسب التوع) والعمل على البرنامج لتصميم الشكل المطلوب. ف لازم نتعلم شوي على برنامجها، ومن ثم تهيئة الإعدادات حسب المادة المستخدمة (من سرعة قص لحدة وضغط الشفرة) ومن ثم تحضير الحصيرة وكذا. سهل بشكل عام، لكن تحتاج للتعلم على البرنامج بشكل أساسي.

إمكانية التصميم؟

فقط حسب القوالب المتوفرة.

يمكن تصميم أي شكل، وحتى ممكن تنزيل أنواع مختلفة من الخطوط لكتابة النصوص المختلفة من خلال برنامج خاص بالماكينة.  

التوافق مع الصور المطبوعة؟

متوفر عدة مجموعات من القوالب الملائمة للأختام الملونة اللي يمكن إستخدامها/ختمها ومن ثم إستخدام قوالب القص الملائمة لها.

من السهل جدا طباعة الصور المطلوبة من خلال برنامج الماكينة (إرسال أمر الطباعة) وبعدين قصها من خلال التصميم بالبرنامج نفسه.

أحجام الأشكال المقصوصة؟

صغير نسبيا. أحجام الماكينة والقوالب عادة ما تكون متوسطة أو كبيرة لأنه بتكون يدوية ف لتقليل الجهد العضلي.

حسب عرض الماكينة وإمكانية الطول أن يصل إلى 2قدم تقريبا (أو حتى 3قدم/ مترتقريبا) بشروط ومواد معينة.

 

 

طيب إيش يعني؟

كخلاصة للحكي فوق كله. لناس عم تدور على ماكينة تساعدها في شغلها، رح يعتمد الموضوع كله على طبيعة شغلهم.

بيحتاجوا تكرار قطع معينة أو أشكال معينة، أو سماكات نوعا ما كبيرة بأشكال متكررة – بنصحهم باليدوي.

بيحتاجوا لأشكال وتصاميم متغيرة على طول؟ بنصحهم بالإلكترونية

بيحتاجوا لقص أشكال مطبوعة مختلفة؟ بنصحهم بالإلكترونية.

شغلها بالقص خفيف، وبيحتاجوا فقط الأشياء الأساسية أو قص سماكات كبيرة؟ بنصحهم باليدوية.

ف كللللله رح يرجع لشو طبيعة شغلكم والغاية اللي بدكم الماكينة عشانها.

مثلا، متل ما دايما بحكي و بنق، أنا شخصيا عندي الكاميو2 من شركة سيليويت (و بعتبرها فرد من العيلة). كتير مريحتني و بشتغل فيها مشاريع بلاوي = كتييير. بتحبوا أشاركم فيها بس خبروني و بورجيكم صور من شغلي عليها.

خلوا ببالكم، الماكينات هدول مش بس عشان توزيعات البيبي أو الورد الكبير اللي بنزين الحيطان فيهم. يا لهوي بالي على الأشياء و المشاريع اللي بنقدر نبدع فيها من خلالهم.

و بالنسبة ل من وين جبت أو لقيت الكريكت؟

الجواب: محل نثرياتت (تصفية؟) موجود بالزرقاء، بنفس شارع اللي فيه مطعم أبو أكرم (معروف لأهل الزرقا) نواحي المول اللي هناك. هاد أحسن شرح قدرت احصّل عليه من وزاة الخارجية (اللي هو يزن زوجي)، حيث إنه فات ع أكتر من محل ومش متزكر بالزبط من أي واحد فيهم. في هناك كزا محل نثريات بنمر عليهم كنا لما نروح الزرقا، بنلاقي لقط زجاج/قطع خشبية/نحاسية أو معدنية وغيره.

عادة شو بيصير، لمّا يكون نازل بدوني ويشوف إشي ممكن يعجبني أو بيحس أنه رح أستفيد منه ببعتلي صورته عالوانس آب، وبيسألني إزا بدي ياه/رح ينفعني أو لأ. مثلا لقى هدول كمان، بس قلتله بدي الإطار بس، ما رح استفيد من الأغطية.

ف للأسف، هي كانت حبة وحدة، بشكل عشوائي (لانه المحل مش متخصص بهيك أشياء، هو محل نثريات وإنتوا وحظكم شو بتلاقوا عنده). هالمرة كانت لقطة ولقى يزن الماكينة مع 4 ملفات قص (بس مثلا ما لقى الحصيرة).

للأسف، الكريكت ومستلزماتها مش متوفرين محليا عنا بالأردن (على حد علمي). لكن السيليويت إلهم وكالة/وكيل عنا. صفحتهم على الفيسبوك باسم Design Shop Co. (اللينك محطوط مع الإسم) و موقعهم و تفاصيلهم بالصفحة 😊 أنا ما إلي أي علاقة فيهم غير إنه بدل عليهم أي حدا بيدور على السيليويت.