مشروع تغيير غرفة الغسيل

رفوف تخزين سهلين
سبتمبر 3, 2020
نوع ريزن جديد – إيبوكسي ريزن جالاكتيك
يناير 23, 2021
 

السلام عليكم و رحمة الله و بركاته

كتير منا بيكونوا حابين يعملوا تغييرات كتيرة عندهم بالبيت، لكن لأسباب متعددة و مختلفة ممكن ما يقدروا يعملوا اللي ببالهم.

ممكن البيت يكون إيجار، ممكن التكلفة عالية أو غير مبررة، ممكن ما عندهم فكرة عن وين الأدوات و المواد ممكن نلاقيها بسعر مناسب و غير مبالغ فيه. ف بيجوز أي مشاريع لازم نعملها نكون ماخدين بعين الإعتبار الأمور هاي كلها. بشكل مناسب من حيث الميزانية و مبدأ الإيجار
Rental friendly
و كلها بخطوات سهلة و ممكن أي حد يعملها (حتى لو ما كان عندهم خبرة بالشغل اليدوي) .

حبيت أشارك معكم أخر مشروع من هاي المشاريع، تغيير غرفة الغسيل بشكل كامل، و بميزانية معتدلة و خطوات بسيطة. كل الشغل بالغرفة من شغلي، من دهان و تركيب و تعديل (شغل إيدّيا و حياة عنيّا). و الموضوع كامل كلفني أقل من 100 دينار. طبعا التغييرات ممكن تتعدل حسب الرغبة و بالتالي التكلفة ممكن تقل أو تزيد. لكن، هي فقط تأكيد إنه لو ببالكم فكرة معينة، تطبيقها أسهل من ما تتوقعوا بس لازم تعرفوا الأساسيات و الخطوات و تخططوا صح.

بلّشت أول شي أفضّي الغرفة  بشكل كامل، و آخد القياسات لكل شي...الحيطان و إرتفاع الشباك و عرضه و قديه نازل من السقف، الباب و موقعه بالزبط، و أي تفصيلة تانية بالغرفة.

تاني إشي، حاولت أرتب أفكاري و أحدد شو بيلزمني بالغرفة (من مساحات تخزين و ترتيب – شو عندي أشياء لازم تنضب بالغرفة، شو في عندي أشيائ ممكن أستفيد منها، مثلا عندي الغسالة و الغيزر و رفوف بلاستيك خليتهم بعين الإعتبار)، شو حابة لون الحيطان يكون. هون كتير إستفدت من موقع Pinterest
كنت أضلني أشوف صور لغرف غسيل (نيالهم الأجانب بس) و أضلني أركز على الأشياء اللي بتعجبني أكتر إشي. بس قررت شو بدي أعمل بلشت شغل.

دهنت الغرفة (حيطين منها) باللون اللي بدي ياه، سكني معتدل. و بعدها قررت أعمل رف علوي (متل السدة الصغيرة) و رف سفلي، و يكونوا بطرف واحد من الغرفة...جبت الخشب من عند النجار (أخدت القياسات اللي بدي ياها) و دهنتهم أنا بالبيت باللون اللي بدي ياه. بعدها ركبتهم عالحيط. طريقة التركيب جدا سهلة (و كنت عاملة رفوف تخزين تانيين عندي بالبيت بنفس الطريقة).

جبت سجادة... هلأ عندي غرفة الغسيل صغنونة كتير ف ما كنت بحاجة سجادة كبيرة. و كان ببالي أجيب فقط إشي يغطي الأرضية عندي لأنه وضع البلاط مأساوي كان. ف ببالي كان السجاد ال PVC  اللي متره بيكون أرخص إشي (حيث إنه الغرفة غير مستخدمة بشكل أساسي) ف لمّل رحت عند محل السجاد، عادي قلتله هيك هيك هيك بدي أرخص سجاد عندك. ما إستحيت (إلها قصة السجادة بس ما رح أطوّل عليكم).

ركبت السجادة، و الرفوف بعد ما دهنتهن. هون قررت الرف الفوقاني بعد ما حطيت الأغراض عليه، مش حلو، ف قلت أعمله أبواب، و الرف التحتاني برداية (عشان يغطوا منظر الأغراض المتكومة) . إطار الأبواب خليت النجار يعملهم من قطع خشب إسمهم (بيّش) و حكيت عنهم قبل هالمرة، و الزينة الداخلية أنا عملتها، من إشي إسمه قشرة بلوط. و هون كنت مقررة أغطي رفوف البلاستيك كمان بنفس مبدأ الأبواب عشان 1 – أحلى أخليهم، و 2 – يلبقوا أكتر مع الغرفة. و غطيت الأبواب من ورا بقماش إستعملته لأعمل برداية الرف التحتاني عشان كله يربط مع بعضه.

هاااد هو. أخد الشغل تقريبا أسبوع من دهان و شغل و تركيب. بس النتيجة النهائية كانت متل ما بدي و الحمد لله. و الفرق متل مو شايفين كبير

كتكلفة، 100 دينار تقريبا، لكن لكن لكن، 40 دينار منها كان للسجادة (قلتلكم قصتها قصة و بحكيلكم ياها إزا بدكم) ف 60 دينار من دهان و خشب و قماش و كل شي تقريبا.

إنتوا إزا حابين تعملوا إشي، التكلفة أكيد رح تكون شو بتحتاجوا و شو حابين تعملوا. و الأدوات ما كانت إشي زيادة أو مش موجود بكل بيت بشكل إعتيادي (دريل و فرد سيليكون و مفكات و أشياء أساسية)