مشروع منظرمدفأة الحطب

مصدر جديد و نوع جديد – غرافيتي
ديسمبر 23, 2019
نوع ريزن جديد – Super glaze
مارس 13, 2020
السلام عليكم و رحمة الله و بركاته.
أنا حاليا مستأجرة البيت اللي ساكنين فيه، ف صعب كتير أقدر أعمل أي تغييرات دائمة أو ممكن تتطلب أثر كبير على البيت و أغلب المسنأجرين بيعانوا من هاد الإشي. مثلا كتير بحسب حساب إنه مثلا ما أدق مسامير كتير أو تخرب الحيطان عندي بمشروع أو فكرة ممكن أعملهأ. و بما إنه سكنت بهاد البيت من فترة لساتني عم آخد على توزيع الأثاث بالغرف بأحسن طريقة أو بأكتر طريقة تعجبني (معلش برجي جوزاء و مع البرج بيجي التقلب و حب التغيير). ف من هون إجت فكرة أعمل مشاريع تكون مناسبة لبيوت الإيجار
Rental Friendly
بحيث إنه ما تترك أثر دائم، ممكن تغيير مكانها بسهولة و أهم إشي إنها ما رح تكلف مبالغ كبيرة (أو بالمصطلح المتداول ما تكلّف بقرة حجا).
تمام، من هاي المشاريع اللي بلشت فيها كان مدخل البيت و هاي اللينك للجزء الأول , و اللينك للجزء التاني، و عندي مشروع إعادة ديكور حمام الضيوف شغالة عليه و رح أورجيكم النتيجة قريبا إن شاء الله. و المشروع هاد اللي عملته لغرفة المعيشة و هيني رح أحكيلكم كل التفاصيل و الخطوات.
تمام، لغرفة المعيشة/ بآخر توزيع أثاث صار عندي حيطة كاملة فاضية.
و صدفة هاد الحيط إجى فيه المودم (وصلة الإنترنت) ف كتير اتغلبت و انا عم أفكر كيف ممكن أزين الحيط و أخلص من منظرالعلبة/الصندوق و الأسلاك (مبدئيا كنت حاطة كرسين مفردين و طاولة بينهم و المودم على الطاولة، بس مع تغيير الأثاث بطل في مجال للطاولة و فضيت الجهة هاي من الغرفة).
 
تمام، بلا طولة السيرة قررت أعمل فاير بلايس (مدفأة حطب) كزابية (تتزكروا حكيت البيت أجار و ما بقدر أعمل وحدة حقيقية).
أول إشي عملته، دورت على اللي بيكونوا جاهزين (في مدافيء كهرباء جاهزين على شكل مدفأة الحطب) و بيكون فيها منظر و ضو الحطب المشعول...و لقيت منهم.
بس لما شفت أسعارهم بطلت ألعب. أرخص إشي لقيته و بالحجم اللي بدي ياه كان ب 325 دينار و موديلها مش إشي مشجع (كتيييييير تعبانة كانت و كتييير قديم موديلها)
 
ما علينا. قلت ما لقيت رح أعملها. أول إشي كنت مقررة خشب، لكن لما رحت عند النجار و وورجيته التصميم اللي ببالي طلب تقريبا 90 دينار (هو بيركبها و بيدهنها و كل شي). كمان قلت غالي (خاصة حضرة جنابي ممكن كمان شهر شهرين أغير من ترتيب الغرفة و أضطر ألغي المنظر كله).
ف قلت ليش ما أعملها من كرتون (بس لازم يكون سميك). تزكرت قبل فترة شفت على الفيسبوك صفحة بيشتغلوا بالكرتون (بيعملوا صناديق و رفوف و كتير أشياء من كرتون سميك) ف قلت إلّا ما يكون عندهم ألواح. حكيت معهم و تواصلت مع صبية كتير لطيفة إسمها نسرين. طلع أي نعم عندهم ألواح و غير هيك....عندهم سماكات مختلفة.
ترا هون لو شفتوني كنت بنط من الفرحة. تغلبت شوي بالتوصيل لأنه ما عندهم خدمة توصيل محددة بس دبرناها و وصلوا عندي الألواح. أنا كنت طالبة خمس ألواح بسماكة 17 مم، و 3 ألواح 27 مم. بس ما إستعملتهم كلهم. طلبتهم من هاي الشركة
Kalboard Honeycomb
و لينك صفحتهم على الفيسبوك موجود مع الإسم و كل تفاصيل التواصل معهم موجودة على صفحتهم. تمام، رح أحكيلكم المواد و الأدوات اللي إستخدمتها و أحسبلكم تكلفة المشروع النهائية

 

المشروع بيحتاج شخص واحد

ممكن إنهاء المشروع خلال يومين

المشروع سهل لمتوسط الصعوبة


ألواح الكرتون

متل ما قلتلكم كنت طالبة خمس ألواح من سماكة 17 مم، و اللوح قياسه 1م في 1.2م. و 3 ألواح سماكة 27مم و قياس اللوح 1م في 1 متر. بس ما إستعملت غير تقريبا 4 ألواح من سماكة ال 17 و لوحين من سماكة ال 27. هلأ هاد حسب قياس المدفأة عندي، أكيد رح تختلف أعداد الألواح معكم حسب القياس اللي رح تعملوه. و الحلو فيهم إنوا إجوا مع قطع زوايا طويلة كانت ممتازة عندي لدعم و تثبيت الأطراف الأمامية و تعطيني شكل مرتب و ساعدتني كتير لما عملت قاعدة الأحجار.

سيليكون ساخن

رح تحتاجوا كميات مهولة من السيليكون الساخن. أنا إستعملت تقريبا ما يقارب ال 30 إصبع سيليكون بالمشروع هاد (بس اللهم كانوا من النوع القصير، ف بتقدروا تحكوا ممكن عدد أقل فيما لو كانوا من النوع الطويل. لا تبخلوا بالسيليكون، لأنه هو اللي رح يكون الدعم و الوصل بين القطع اللي رح نركبها.

غرا UHU

هلأ و أنا عم أشتغل الدنيا كانت كتيييييير برد لدرجة السيليكون كان يتصلب قبل ما أقدر أركب القطع مع بعض خاصة مع تلزيق القطع الطويلة مع بعض. إستعملته مع الزوايا الأمامية فقط ف عشان هيك ما رح أحسبه من التكلفة لأنه ممكن تستغنوا عنه.

ألواح فوم لاصق

اشتريت 6 قطع من الفوم بقياس 70 ب 77 سم، بس بالأخير ما استعملت غير 5 قطع منها حسب قياس المسروع عندي. إزا عملتوا المشروع على اكبر ممكن تحتاجوا عدد أكبر. اللون اللي أخدته كان سكني غامق مع إنه بالصور رح يبين أسود.

لزيق ورق

هاد اللزيق اللي بيكون عريض و مصنوع من ورق (مش إنه للورق بس) عشان نغطي أطراف الكرتون المكشوفة.

لون أكريليك أسود

هاد كان موجود عندي، و رح أستعمله عشان أدهن الجزء العلوي من الفايربلايس و الجزء الداخلي.

حجارة صغيرة بلون أسود

ممكن تاخدوها باللون اللي بدكم ياه. أنا أخدتهم من عند البشيتي اللي بشارع المدينة الطبية، الفرع اللي على الشمال. و في عنده بتلاقوا كمان احجام متعددة. أنا أخدت أصغر حجم.

خشب أو حطب

هاد بتقدروا تلاقوه بمحل شجر أو من محل حطب بيرجع إلكم. أو ممكن حتى تعملوه منظر من الكرتون و تلونوه. أنا أخدته من محل برايم بخلدا (أخدت كيلو تقريبا و كان زيادة). إزا بتعرفوا حدا عنده مدفأة بتقدروا تلطشوا أكمن حبة من عندهم.

 

الأدوات

– إستعملت مشرط (أو بالأصح شفرة مشرط عشان ما لقيت المشرط نفسه ف إستعملت الشفرة – تعليمات السلامة مين؟ –  و مسطرة حديد طويلة و متر. استعملت كمان حصيرة صغيرة سيليكون عشان ألون الأطراف السفلية من الكرتون بس بتقدروا تستبدلوها بكيس نايلون (هدول مش رح أحسبهم بالتكلفة لأنه بشكل أو تاني موجودين بكل بيت بشكل أساسي)

تمام و هاي التكلفة لكل هاي الأشياء

 

الغرض

القياس

العدد و التكلفة للقطعة

التكلفة الكاملة

ألواح الكرتون

1م في 1.2م

 

1م في 1م

  ثلاثة ألواح في 2.5 دينار للوح

 

  لوحين في 2.5 دينار للوح

7.5 دينار

 

7 دينار

السيليكون الساخن

الأصابع القصيرة

30 (كل 15 كانوا ب 1.25 دينار)

2.25 دينار (خلينا نحكي 3 دينار)

ألأواح الفوم

70سم في 77 سم

5 في 1.5 للقطعة

7.5 دينار

لزيق الورق

عرض اللزيق 7 سم تقريبا

الرول كامل 0.5 دينار

0.5 دينار

لون الأكريليك الأسود

علبة تقريبا 200 مل

2.25 دينار

2.25 دينار

الحجارة الصغيرة

أخدت 2 كيلو

2 x 80 قرش للكيلو

1.6 دينار

الخشب / الحطب

كيلو

8.5 للكيلو كامل

8.5 دينار

ضوء بطارية

3 م طول كل سلك

2 x 1 دينار للضو

2 دينار

 

 

 

39.35 دينار كامل المشروع.

 

هلأ....ممكن كمان تختصروا من هاي التكاليف. مثلا، الكرتون: بتقدروا تستعملوا كراتين و صناديق الشيبس الكبيرة مثلا، بس لازم تعملوها أكتر من طبقة لتكون أسمك و أقسى. الخشب أو الحطب ممكن تعملوه من الكرتون، و تلونوه. ف بيرجع إلكم و شو أسهللكم.

الخطوات.... الله يستر و بسم الله.

 

هيك بلش الحيط عندي. فاضي. أخدت القياسات و بلشت أشوف إيش ممكن يكون أحسن حجم مناسب. بعد شوية بحبشة قررت (قرقرت) تكون الأبعاد 130 سم إرتفاع، و 120 سم عرض، و 35سم عمق. حددت على الحيط المكان اللي بدي المدفأة تكون فيه باللزيق (نص المسافة تقريبا).

تمام، بعد ما حددت القياسات اللي بدي ياها، إجى الوقت اللي لازم أختار شكل المدفأة. عشان لسه أول مرة رح أشتغل بالألواح هاي و لسه مش عارفة طبيعة الشغل كيف رح تكون، قررت أسهل شكل. صندوق مطاول بالقياسات اللي حددتها، مع قص جزء داخلي بالوسط ليمثّل مكان حرق الحطب. تتزكروا الموقع اللي حكيتلكم عنه قبل فترة؟ كتير ساعدني بهاي الخطوة.

 

إزا رح أحتاج 3 جوانب (حسب الشكل اللي نقيته)

الوجه و قياسه 120سم في 130

الجوانب اليمين و الشمال و قياسها 130سم في 35سم

الغطاء وقياسه شوي رح يكون عجقة بس رح يبين معكم بالشغل ليش.

     قياسه رح يكون 35سم في 120سم+سماكة اللوح المستخدم لنعمل الجوانب.

 

الجهة الخلفية من المدفأة رح تكون مواجهة للحيط ف مش لازم تتسكر، و بنوفر علينا كرتون و شغل

 

عشان أعمل الوجه = الجهة الأمامية

أخدت الألواح اللي بسماكة 17مم. و قياس اللوح 120سم في 100سم. عشان أعمل الوجه، رح أضطر أوصل اللوح بقطعة تانية عشان يصير بقياس 120سم في 130 سم. قصيت من لوح تاني قطعة 30سم (العرض جاهز كان على حظي 120سم). عشان أوصلهم مع بعض بطريقة ماكتة و ما يفلتوا. عملت التالي (قصيت قطعة رفيعة (تقريبا 10سم) و لزقتها بالسيليكون الساخن فوق الخط الواصل بين القطعتين. هاي الطريقة كانت أسهل و أمتن طريقة لألزق قطعتين ببعض بشكل طولي.

 

نفس الخطوات عملتها عشان أعمل الجوانب بس بقياس 130سم في 35سم. هيك خلصت الجهات كلها.

تمام. بس خلصت. لزقت الجوانب مع بعض بالسيليكون الساخن

هون إستفدت كتير من الزوايا للي إجوا مع الألواح. إستعملتهم عشان أغطي الزوايا و يعطوني شكل مرتب. و لأنه الدنيا كانت بررررررد و السيليكون الساخن كان عم يجمد قبل ما أقدر أثبت القطعة (بسبب الطول و عبال ما أوصل إخر القطعة كان السيليكون اللي بالأول جامد إستعملت ال UHU مع السيليكون). عشان هيك قلتلكم ممكن تستغنوا عنه.

تمام، بس وصلت لهاي المرحلة اللي عملته هلأ هو، قصيت مربعات اللوح السميك ( اللي بسماكة 27مم) و بعدين قصيتهم بالورب (على القطر) ليصيروا مثلثات. هدول رح استعملهم عشان أدعم الزوايا و يكون المجسم عندي أمتن و ماسك حاله و رح ألزقهم بالسيليكون الساخن. قياس المربعات كان 15سم على ما أتذكر.

تمام، الخطوة اللي بعدها...الجزء الوسطاني اللي رح يكون مكان الحطب. بالأول عملت القياسات إرتفاع 85سم و عرض 70سم. بس مهم كتير نشتغل من الجهة الداخلية من المجسم مش من الجهة البرانية. لأنه الجوانب معمولة من لوح سماكة 17مم، يعني كل جانب رح يكون 17مم (3.4سم بالكامل) هلأ حسب الحجم و القياسات اللي عندكم ممكن كتير تفرق هال 3.4سم، ف عشان هيك أضمن نشتغل من الجهة الداخلية. هون حسيت شوي كتير عريضة ال 70سم، ف خليتها 65سم (نقصت 5سم).

كيف نشتغل هون؟ عادي بالمتر، بنحدد الإرتفاع اللي بدنا ياه من أرضية المجسم على كزا نقطة و بنوسم خط بيناتهم. بعدين بنحدد المنتصف و من نقطة المنتصف هاي بنحدد العرض اللي بدنا ياه.

يعني مثلا بالقياسات اللي كنت أنا عم أشتغل عليها. حددت إرتفاع 85سم. رسمت خط على هاد الإرتفاع. حددت المنتصف حسب عرض الجزء الداخلي من المجسم. و من المنتصف قست 32.5سم من الجهتين. هيك بضمن يكون الفراغ بالمنتصف. إزا كنتوا عم تشتغلوا بكرتون رفيع ممكن يكون الشغل عندكم أسهل و تتخطوا كل هالقياسات.

بعد ما قصيت الجزء الداخلي جبت اللزيق الورق و غطيت الجوانب. هيك بيكون معنا الشكل بشكل أرتب لقدام.

 

هلأ...رح نعمل جوانب للجزء الداخلي. من اللوح السميك 27مم، قصيت جوانب بارتفاع الجزء الداخلي و عرض المجسم (إنه يوصل من الجهة الأمامية لنهاية المجسم أو الحيط) و لزقتها. و لهدول الجانبين لزقت دواعم مثلثة كمان عشان يكون الشكل كامل متين و متماسك.

 

خلفية هاد الجزء كانت عندي شوي معقدة. ليش؟ هساعيات بحكيلكم.

كان في صندوق موجود على الحيط و ما بقدر أنقله بالمرة. اللي هو صندوق شركة الإتصالات/الإنترنت (غير هداك المودم). غييير هاد الصندوق، عندي داير الحيط حفة بارزة شوي (ناسية إسمها) ف لازم أقص من ظهر المجسم حسب هاي الحفة و حسب هاد الصندوق عشان المجسم يكون جاي لزق بالحيط دون أي فراغ.

بلشت بالحفة...أخدت قطعة كرون زيادة، و أخدت قياسات الحفة هاي، و قصيتها من القطعة. هيك صار عندي متل الباترونة اللي بقدر أنقل الشكل اللي لام أقصه من كل جوانب المجسم. و هاد اللي عملته.

 

بالنسبة للصندوق اللي رح ييجي ضمن خلفية الجزء الوسطاني من المجسم و الحفة كمان...

أخدت من اللوح السميك 27مم وقصيت حسب القياسات اللي لازم تكون لخلفية الجزء الوسطاني. بعدين، على الجهة السفلية من هاي القطعة و على إرتفاع الحفة اللي بالحيط قصيت من سمك اللوح. اللي ساعدني طريقة تركيب اللوح الداخلية اللي بتكون كتل خلايا النحل. بعدين حسب مكان الصندوق من القطعة قصيت جزء أكبر من الصندوق شوي و فضيت داخل هاد المكان بشكل كامل. ممكن بالصور تفهموا علي أكتر. بس هون لازم تديروا بالكم بالقص عشان ما تخربوا الجهة الأمامية من القطعة هاي (من قدام يكون كل شي تمام).

 

هااااد الحكي كله عشان المجسم يكون لزق بالحيط بدون أي فراغ.

 

بنلزق القطعة الخلفية من الجزء الوسطاني هلأ، و بنقص قطعة تانية من اللوح السميك 27مم عشان نسكر الجزء الوسطاني بشكل كامل. و بنلزق كل إشي و نثبته بالسيليكون.

 

هلأ...بنقص الغطاء للمجسم من اللوح اللي بسماكة 17مم، و بنلف الجوانب باللزيق عشان يكون أرتب المنظر النهائي. و بنلزق و نثبت الغطاء على المجسم.

هيييييك المجسم بيكون خلص بشكل أساسي. إزا كنتوا ناويين تحطوا أشياء فوق المجسم كديكورات أو زينة، لازم تدعموا الغطاء.

اللي عملته، قصيت من اللوح السميك 27مم قطع متعددة بالإتفاع اللي بين الغطاء و الجزء الوسطاني. عشان ما يتثني أو ينطعج مع تقل الأشياء. ثبتت هاي القطع بالسيليكون عشان ما تتحرك أو توقع.

 

يا الله...هانت.

هلا إجى وقت تزيين المجسم. اللي عملته أخدت الفوم اللاصق و بلشت ألزقه على المجسم. حاولوا تخلي الفوم و المربعات/الخطوط اللي على الفوم يكونوا متناسقين بيعطيكم شكل نهائي أحلى. الجزء الوسطاني ما غطيته بالفوم، بس خليت شوي و قصيت الزيادة. قصيت بشكل عشوائي جوا الجزء الوسطاني حسيت أعطاني شكل أحلى.

 

ممكن عشان القص يدوي أو لأنه قطع الفوم مش منتظمة مع خطوط المجسم يصير عندكم فراغات في مناطق معينة عليه (خصوصي مثلا عند الغطا = أنا ما غطيته عندي فكرة مستقبلية إله) ف بتقدروا تقصوا قطع صغيرة من الفوم و تغطوها. ممكن تحتاجوا السيليكون الساخن لتثبيت الفوم بشكل جيد خصوصي عند الأطراف أو القطع الصغيرة هاي اللي حكيتلكم عنها.

 

 

عملت قاعدة صغيرة من قطعة من اللوح الرفيع و الزوايا اللي إجت مع الألواح على قد قاعدة الجزء الوسطاني و دهنتها باللون الأسود. بتقدرا تعملوها بأي طريقة بدكم ياها. صار عندي بين الأطراف و أرضية القاعدة عبيتها إما سيليكون ساخن أو قطعة لزيق كان أسرع (قبل ما أدهن) عشان كنت ناوية أحط أحجار في هاي القاعدة، و لانه الحجارة صغيرة كان ممكن تفوت جوا هاي الفراغات.

 

بس خلصت من القاعدة دهنت الغطا و الجزء الوسطاني باللون الأسود. ممكن و إنتوا عم تدهنوا الجزء الوسطاني تلاقوا فراغ شوي بين القطع و الجوانب. و بس تدهنوا بالأسود تصير واضحة بشكل كبير، اللي عملته عبيت هاي الفراغات بالسيليكون الساخن و بعدها دهنت بالأسود.

هون إنتبهت...أطراف الفوم كانت باللون الأبيض أو تبين بشكل كتير، خصوصي عند أطرافها أو عند الأطراف المقصوصة. اللي عملته بالفرشاية و بشكل خفيف باللون الأسود لونت هاي الأطراف.

حطيت القاعدة السودا بمكانها، عبيتها بالحجارة الصغيرة.... لما إشتريت الحجارة كانوا مبلولين ف نشفتهم منيح قبل ما أحطهم بمكانهم.

 

 

 

و هيك 99% خلصت المدفأة الكزابية.

 

جبت ضو سلك اللي بيكون على البطاريات، و الخطة كانت أحطه جوا قطع من الخشب/الحطب اللي رح يكونوا على القاعدة السودا. مبدئيا عجبني موضوع الحطب، بس حابة أغير ضو البطاريات بضو تاني يكون متقطع عشان يعطي تأثير الجمر بشكل أحلى. أو حتى ممكن أجيب شاشة أو ضو من محلات الأدوات المنزلية اللي بيكون متل منظر النار.

 

 

بس هازا هو... ما رأيكم دام فضلكم؟