مصدر جديد و نوع جديد – غرافيتي

ماكينات القص اليدوية و الإكترونية
نوفمبر 22, 2019
مشروع منظرمدفأة الحطب
فبراير 1, 2020
 

السلام عليكم ورحمة الله وبركاته

تمام، هالمرة عم أجرب نوع جديد من الريزن. عندي ياه بيجوز من 6 أشهر إزا مش أكتر بس ما كان عم يزبط معي أجربه لأسباب كتيرة. وصراحة هاي النتائج بعد تجربة وحدة بس، ف لسه مش متكاملة عندي النتائج (لانه لسه تجاربي فيه مبدئية) لكن بسبب الإستفسارات الهائلة اللي وصلتني عنه قلت أحكي رأيي الأولي وبعدين أكمل مع التجارب والشغل وبضلني أعمل upadate عالجدول.

النوع هو: غرافيتي Graffiti

ماركة أمريكية بتوزيع سعودي. غير متوفر عنا بالأردن محليا للأسف، ف الطريقة الوحيدة اللي ممكن تحصلوا عليه فيها بطلبه من خلال مندوبهم في السعودية. أنا تواصلت وحكيت معهم من خلال الإنستغرام، وصراحة الجماعة كتييييير متعاونين وجاوبوا كل أسئلتي بشكل مفصل وواضح، وأعطوني لائحة الأسعار وكل المعلومات. وكلها متوفرة بشكل مفصل من خلال موقعهم

https://www.grresin.com/

و هيهم على الإنستغرام

https://www.instagram.com/graffitiresin/

و بتعرفوا إيش الحلو فيهم ؟ عندهم كل ما يتعلق بالريزن من ألوان (ميتالك و غيرها) وعندهم بكجات إبتدائية بأسعار طرية. وهلأ ع آخر السنة عندهم عروض غير شكل.

 أنا كيف طلبت؟ كنت ناوية أوصي صراحة والتوصيل بيكون بالإتفاق من خلال مكاتب توصيل (خط أرضي) بس وقتها صديقة إلي كانت عم تطلب منهم وأنا وصيت من خلالها (يسلموا مرة تانية فداء). ف كتكلفة توصيل ما عندي علم عالأكيد، بس عندي معلومات عن التكلفة الأساسية لإله.

ملاحظة صغننة: كل المعلومات هون والآراء اللي رح أشاركها معكم آرائي وتجاربي الشخصية بكل صراحة، مش مدعومة أو مدفوع لها أو إلي بأي شكل.

 

 
 

تمام، خنبلش – خلينا نبلش – هيا بنا نلعب نبدأ

هلأ تجربتي، كانت بيوم برد غير شكل، ف عشان هيك خلو هاد الإشي ببالكم (متل ما قلتلكم قبل هيك الريزن والبرد ضراير). وإن شاء الله رح أرجع أشتغل فيه ع أكتر من مرة لأنه أنا وهالنوع شكله عليم الله رح نصير كتيييير صحاب. كتير حبيته وحبيت لمعته النهائية

 

 

 

مصدر الريزن = من وين جبت الريزن

الخاصية

شو قصدي فيها

 

ملاحظات

السعر

تكلفة الريزن بالدينار الأردني

الكمية اللي طلبتها كانت 550 مل (الريزن والمصلب) ب 12 دينار. يعني الليتر تقريبا ب 24 دينار

المصلب والريزن سوا مجموعهم 1100مل ب 24د

التوّفر

مدى سهولة شراءه

سهل و صعب

يعني الطلب سهل بس التوصيل مثلا للأردن صعب من مبدأ بيزيد من التكلفة فقط. أمّا كوقت و سرعة ليوصل سهل و سريع.

نسب الخلط

كميات ونسبة خلط المكونات

لكل 100مل من الريزن 60مل من المصلب

أنا إشتغلت بالحجم، لكن كتير من اللي إشتغلوا فيه إستعملوا الوزن (100غم ل 60غم)  ف رح اجرب المرة الجاي عالوزن

سهولة الخلط

قديش سهل نخلط المكونات

سهل

بينخلطوا مع سوا خلال دقيقتين تقريبا

الحرارة الناتجة من الخلط

أثناء الخلط، هل يسخن الخليط؟

أبدا ولا حبة

 

الرائحة

الرائحة اللي بتكون عندي للريزن بشكل عام وخصوصي عند الخلط

خفيفة جدا

متل ما حكيتلكم، الدنيا برد ف الشباك ما كان مفتوح (بس كنت بشتغل بقناع مخصص) ف كان في رائحة خفيفة جدا نوعا ما. لو كان عندي مجرى هوا ما أظن بيكون في هاي الرائحة.

الفقاعات

كمية الفقاعات الناتجة وحجمها

جدا قليل

أثناء الخلط نعم كان في فقاعات، لكن بس تركته يرتاح شوي خفت الفقاعات بنسبة 90%

سهولة التخلص من الفقاعات

التخلص من الفقاعات بطرق مختلفة

سهل

مسدس الحرارة أو القداحة جدا كان سهل،

اللون

اللون الناتج بعد ثبات الريزن وبعد ما ينشف

شفاف

حتى المصلب كان عندي مصفر شوي، لكن مع الخلط والإستخدام رجع شفاف

الوقت المتاح للعمل

قديش معنا نشتغل بالريزن بعد خلطه مع المصلب قبل ما يصير يعطينا خيوط

تقريبا 30 دقيقة

هلأ المفروض ع حكيهم 45 دقيقة كمان، بس بيجوز من البرد.

سرعة الثبات

الوقت اللي بيحتاجه لينشف ويصير جامد/ناشف

24 ساعة

10 – 12 ليصير صلب، جيلاتيني

24 ساعة ليصير صلب قاسي

الملمس النهائي

طبيعة القطع والسطح الناتج

قاسي - بلاستيكي

 

التزيين

هل ممكن إضافة القطع البلاستيكية أو الزينة أو الجليتر

نعم ممكن

 

التلوين

هلأ ممكن تلوينه؟ قبل أن ينشف؟

نعم

ألوان أكريليك، ألوان زجاج، ألوان بودرة وألوان مخصصة كله كان بنتائج ممتازة

القولبة

ممكن نستخدمه بقوالب؟ هل ممكن صبه بقوالب؟

نعم

حتى بقوالب سميكة. بس حسيت زادت الفقاعات شوي. سماكات أقل أحسن

الصب

هل ممكن صبه كطبقة على سطح معين

نعم

 

التكوّر أو التقعر

بالقوالب - سطح القطع الناتجة عن القوالب – الجهة المقابلة للشكل الناتج/ظهر القطعة

تقعر خفيف جدا جدا مع القوالب

 

التكوّر أو التقعر

دون قوالب

قليل التكور

بيفرد لأنه سيولته عالية نوعا ما أكتر منما يتقبب
Doming effect – weak

Self leveling

بعد صب كمية من الريزن على سطح مستوي، هل يتوزع على شكل طبقة متساوية أو يتكتل/يتجمع بأماكن معينة؟

نعم

بشكل سهل جدا

الدهن بالفرشاية

هل ممكن دهنه بالفرشاية؟

ما جربت لسه

 

التخفيف

هل ممكن تخفيفه (بإستخدام التنر)؟

ما جربت لسه

 

الدهن بالفرشاية بعد التخفيف

هل ممكن دهن الخليط الناتج بعد التخفيف

ما جربت لسه

 

مقاوم للماء

ضد المي والبلل بعد ما يجمد؟

نعم

 

مقاوم للحرارة

بعد ما يجمد وينشف تمام، هل القطعة مقاومة للحرارة غير المباشرة؟

لسه التجارب قائمة

جربت بعد 3 أيام من صب القطعة. مافي أي تدبيق أو تلزيق بين الكاسة والقطعة. لكن اللهم تركت أثر دائري على القطعة. التجارب القادمة رح تكون بعد 21 يوم إن شاء الله (الوقت للتصلب التام)

 

صراحة من أروع الأنواع اللي إشتغلها معها خصوصي من ناحية الوقت اللي معنا نشتغل فيه قبل ما يبلش يجمد ويصير يعملنا خيوط (المرحلة الجيلاتينية السائلة البايخة اللي بتصير معنا بس يبلش يتصلب الريزن). يعني لو عم نشتغل على لوحة كبيرة، أو عدد كبير من القطع أو القوالب ممتز جدا.

لاحظت شغلة من ناحية الألوان. بتنتشير فيه بشكل واسع. يعني لو صبينا لونين جنب بعض (نفس الريزن بس لوناه بلونين مختلفين) رح تتداخل الألوان وتدمج. هاد الإشي ممكن يتعاكس من الناس اللي بتحب تشتغل خطوط باللوحات مثلا أو بدها حدود واضحة بين الألوان المختلفة. ممكن نتغلب عليها إنه نترك الريزن شوي (شي 5 – 10 دقايق) قبل ما نصب الألوان.

كمان مع ألوان الأكريليك، بعض القطع ضلت ع طرواة حتى بعد 24 ساعة. يعني القطعة متماسكة وكل شي، بس المطاوعة لساتها عالية. ما بعرف هل هو بسبب كمية الألوان اللي أضفتها أو بسبب البرد أو بسبب إشي تاني جاب العيد. إن شاء الله مع التجارب القادمة ببين معي أكتر.

و بهاد النوع جربت تكنيك/طريقة جديدة للشغل، إن شاء الله بحكيلكم عنها بالتفصيل بفيديو منفصل. رح تشوفوا بالصور النجوم و القطاعات و الصحن الصغيييير الفسفوس :3

و رح تشوفوا كمان نوع القناع اللي بستعمله مع الشغل للريزن. أخدته من عند البشيتي بشارع المدينة الطبية ب 4 دنانير و الفلاتر بتتغير كل فترة. صراحة هاد هو النوع اللي بنصحكم تستعملوه خصوصي إزا شغلكم بيتعلق فيه صنفرة الريزن.

تمام، هاد هو. و إن شاء الله بعدّل على نتائج الجدول كل ما إشتغلت مع هاد النوع أكتر و أكتر...

السؤال القوي: لييييش مش متوفر عنا بالأردن؟؟؟؟