موقع مفيد – floor planner

مشروع سريع – رسم مجرة بألوان أكريليك
نوفمبر 2, 2019
ماكينات القص اليدوية و الإكترونية
نوفمبر 22, 2019
 

السلام عليكم و رحمة الله و بركاته

صارلي فترة متل مو عارفين عم أحاول أغير و أزبط من ديكور البيت. بيكفي صارلي حوالي النص سنة بالبيت الجديد و لسه ما زبطته. 

بس مشكلتي، و بتخيل الأغلب عنده هاي المشكلة ببيوت الأيجار، إنه في عدة صعوبات بالموضوع. متل ما بقدر أخزق الحيطان بشكل كبير (ف لو بدي أعلق شغلة لازم أكون متأكدة منها 100% عشان ما أضطر أغير و أخزق الحيط مكان تاني)، في أشياء أساسية بالبيت ما بقدر أغيرها متل المغاسل ع سبيل المثال،أو في نوع بلاط معين جالطني و مش طايقته بس ما بقدر أعمل إشي فيه لأنه البيت مش ملكي... و غيره و غيره. 

غير هيك، أحيانا بيكون الديكور اللي ببالنا أو بفكرتنا غير لمّا يتطبق عالواقع، أو صعب علينا نتخيله كيف رح يكون بدون ما نشوفه قدامنا. مثلا، حابين نزّين حيط عنا بغرفة بمجموعة من الإطارات بس مش متأكدين من المنظر النهائي، و ما بدنا نخاطر بتعليقهم. ممكن تغيير لون دهان الحيطان أو حيطة وحدة. كـ  feature wall ممكن نوع أو لون معين من البرادي...تغيير الكنابايات و هلم جرا. 

صارلي فترة منيحة بعاني من هاي الشغلة، و في كتير برامج بتساعد بالتغلب عليها بس مشكلتها إما مكلفة و لازم أشتريها أو معقدة و بدها خطوات كتير و صعب نتعامل معها. في برنامج Sketchup مثلا على سبيل المثال. بيجنن هاد البرنامج، و متوفر منه نسخة مجانية و بنقدر نصمم عليه حتى القطع و الأشياء اللي بدنا ياها 

بس مشكلته؟ بده وقت لتتعلموا عليه، و أنا مشكلتي معنديش وقت :(  ف كان بدي إشي أقدر أحل عليه مشاكلي الحالية، بشكل سريع عبال ما أتعلم أسوق على سكتش أب و آخد عليه.

بالصدفة الأسبوع الماضي، لقيت هاد الموقع

www.floorplanner.com

صراحة، رائع بالنسبة لموقع مجاني و المستوى العالي اللي هو عليه. بيصحلكم تبنوا الغرفة اللي بدكم تزينوها أو تعدلوها (لازم تاخدوا القياسات أكيد) و تضيفوا و تعدلوا الأشياء متل ما بدكم. و أحلى إشي فيه؟ ما بيحتاج تنزيل، بتقدرو تشتغلوا على الموقع طوالي، بس لازم تسجلوا فيه من خلال إيميل. و كمان  فيه تمثيل ثلاثي الأبعاد، يعني بيعمللكم التصميم اللي عملتوه بشكل ثلاثي الأبعاد (إزا عمركم لعبتوا لعبة Sims بيكون عندك فكرة كيف)

هلأ أكيد النسخة المجانية محدودة، و بتقدروا بس تشتغلوا على 5 مشاريع كحد أقصى. و أشياء و إضافات معينة ما بتقدروا تستخدموها إلا إزا عملتوا upgrade و في إشياء و برامج كتير أحسن إزا كنتوا مصممين داخليين أو متخصصين، بس للأشخاص اللي متلي اللي بدهم بس اشياء أساسية، و غايات حرفية غير متخصصة كتييير ممتاز

مثلا عم أشتغل عليه لتعديل و تزيين حمام الضيوف (إضافة رفوف و ديكورات) و غرفة المعيشة (لإضافة رفوف و إطارات توزيع الأثاث)، و إن شاء الله رح أشارككم النتائج أول ما أخلص المشاريع هاي (ممكن المطبخ كمان ما بعرف حسب) 

اسأل الله الفائدة لنا و لكم، إدعولنا <3