نزلة على وسط البلد

الجزء التاني – مدخل البيت
أغسطس 4, 2019
هدية معلم بأول يوم دراسي
أكتوبر 12, 2019
 

عنا بالأردن كان اليوم أول يوم دوام بالمدارس.
(إني لأسمع زغاريد و إحتفالات الأمهات في كل ناحٍ و زاوية)

و ههاي السنة نقلت بنتي الكبيرة لمدرسة جديدة (و سجلت الصغيرة فيها كمان)، ف حبيت أعمل إشي خفيف بسيط لطيف كتوزيعة تقدر سيرلا توزعها عالمعلمات أول يوم. سيدا الصغيرة لسه دوامها الأربعاء إن شاء الله.

ما كان إلي غير أنزل عالبلد (وسط البلد)، العشق الحب الهوى. يا الله لو تعرفوا قديش بحب وسط البلد عنا بعمان. كل فترة و فترة بننزل أنا ووزارة الخارجية (اللي هو زوجي) و البنات و نقضي النهار بالفلفلة (اللفلفة) هناك. هالمرة لأنه كنت مستعجلة نزلت سولو (solo) لحالي بحالي

ما كنت حاطة فكرة معينة ببالي صراحة، قلت بس أنزل أشوف الأشياء (سيخبطني) الإلهام و أقرقر شو بدي أعمل. نزلت أول إشي ع سوق البخارية. ما خبطني الإلهام وأنا بلف بالمحلات اللي فيه. فتت على السوق اللي بعده (بتقدروا تحكوا الدخلة اللي بعدها للبخارية). أظن إسمه سوق البلابسة أو إشي زي هيك، بتلاقوا فيه محل علي بصلة عنده شغلات حلوة. و نزال للكلف الهندية. آه هالمحل بس بضلني واقفة بتطلع و أبحلق قد ما عنده أشياء حلوة. 

 

 
 
 

لم يخبطني الإلهام بعد. بعدين يا إلهام، ليش هيك معصجلة معي (=مغلبتيني) اليوم؟؟

قلت ما إلي غير سوق الندى. للي ما بيعرف كيف يوصله، بس تطلعوا من البخارية أو البلابسة، تطلعوا على السايد التاني من الشارع (الجهة اللي فيها الجامع)، رح تشوفوا هاي القارمة أو لافتة عندها دخلة. إقطعوا الشارع و إدخلوا منها. 

هاي الدخلة بتكون أول دخلة على الشمال بعد الجامع (الجامع بيكون على شمالكم). بس عشان أعطيكم دليل سياحي قصدي نظري أكتر.

 
 

بس تدخلوا هاي الدخلة، عند أول تقاطع، كباتيلو. على الشمال بيكون متل سوق خضرة و عجقة و كتير أشياء، على اليمين بيكون سوق الندى

 
 

ليش حكيتلكم على الشمال؟ عشان في هناك محل نثريات أو كل شيء بدينار، باخد من عنده مجموعة فراشي، بالمكتبات العادية بعمان بتكون بـ 2.25 أو 2.5 دينار، عنده بنص دينار. و حيث إنه أنا أستهلك كميات مهولة منها بالشغل )هلأ هي جودتها مش كتير فظيعة بس اللهم كتير منيحة بالشغل للدهان الأساسي مش التفاصيل و هيك) ف كل ما أنزل إلّا ما أخدلي مجموعة تنتين منهم (أو ثلاثة أربعة ما بيزيدوا عندي). ف للناس اللي عندها ورشات أو بتحتاج فراشي بعدد كبير جد رح تفرق معكم (ربع السعر تقريبا). بتروحوا من عند كباتيلو شمال، بعدين شمال..أول أو تاني محل (رح تعرفوه إنه أكبر من باقي المحلات اللي هناك بالعجقة). 

و بتلاقوا عنده نهفات أو أشياء تانية ممكن تستفيدا منها، متل هاد الورق، لشغل الريزن مثلا أو شغل الصلصال الحراري (ما بيلزق عليه إشي)، ممكن صناديق خشب/معدن أو فناجين سادة (اللهم بدكم تدوروا منيح و تخلوا ببالكم، مش كل مرة بيكون نفس الشكل أو الموديل موجود).  هو محل نثريات و اشياء كتير و لا إلها دخل ببعض، من بلاستيك و أدوات منزلية و أشياء غريبة عشان ما تستغربوا.

 
 

تمام، خلينا هلأ نرجع على سوق الندى، بنروح يمين من تقاطع كباتيلو، و بنضلنا ماشيين دغري دغري بس يسكر الشارع معنا بيكون سوق الندى قدامنا

 
 

هلأ هاد السوق جاي ع شكل حرف U بالإنجليزي، بندخل من جهة، و إزا ضلينا ماشيين فيه، بيلف فينا الطريق ع شكل الU و بنرجع نطلع منه. نهفة هالسوق.  و كتييير كتييير بيزكر بسوق الحميدية بالشام، كل دخلاته و زققه هيك و. الله يرحم الأيام الحلوة هديك.

ما علينا، أكملكم سولافة=قصة إلهامي الضايع اللي مش عم ألاقيه. بسوق الندى أغلب المحلات ببيعوا بالدزينة (أو ب 6 أو 9 أو 12 قطعة) حسب الإشي اللي عم تشوفوه. بس بتلاقوا فيه تقريبا من كل إشي، لكل مناسبة (تخرج ولادة حج عيد مدارس) كل إشي و أسعاره كتير أطرى (لأنه ببيع بالجملة). 

ممكن تستفيدوا بمجال الحرف اليدوية، إنه بتلاقوا عنده قطع و أشياء ممكن تستفيدوا منها بمجال حرفتكم. مثلا متل هدول، أظن كانوا حلاق (أقراط) بس الأشكال اللي عليهم كتيير كتكوتة، بتقدروا تقيموها و تستخدموها بمجال الصلصال الحراري (لتزيين المجات مثلا) أو بتقدروا تاخدوا الإشكال هاي مع الريزن. ممكن تاخدوا قطع و زينة بسعر أطرى و ترجعوا (إعادة تصميم و إستخدام) بشغلكم. مثلا، لقيت هدول التعليقات ع شكل قلب، ممكن ينفعوا لقلادات الريزن مثلا أو الديكوباج، و كتير أرخص سعرهم كان من لو أخدتوهم من محل لحالهم

في هدول رسمات الحنة، ممكن تستعملوهم كمرسام (ستنسل) لشغل الديكوباج أو الميكسد ميديا. أنا أخدت منهم هدول

 

 

 
 
 

كتييير أشياء ممكن تستفيدوا منها بسعر خفيف لطيف بس بدهم شغل زيادة حبة حبتين

بواحد من المحلات لقيت هدول المربعات من الخضار الإصطناعي، بيجوا تقريبا 50 سم ب 40 تقريبا، و بدينارين. أرخص بكتيير من غير محلات صراحة و مناسبين إزا بدكن تعملوا مثلا خلفية خضرا للحائط بالبرندا مثلا أو الجنينة.

 
 
 

تمام...و أنا ما زلت أبحث عن الإلهام الضايع، مريت من قدام محل ورد إصطناعي (زهقتكم فيه و لا لسه)؟ تدغدغت عندي مستقبلات الإلهام، و حيث إنه الوقت ضيق عندي و كتفي ملفوح كان بدي إشي شغله خفيف و سريع. فتت عنده قلت أشوف...

عنده و الله تشكيلة حلوة، بس الجودة متفاوتة و الأسعار حسب الجودة. و أنا عم أتطلع و أدور، شفت ضمة جوري...وقع الإلهام من الطابق الخامس و قرقرت شو رح اعمل. 

قلت ممكن لكل معلمة نعمل وردة تتقدم و تضلها ذكرى حيث إنه ما رح تدبل و بقدر أحط عليها نقطة زيت عطري مثلا أو أرشها عطر لتعطي ريحة حلوة. 

 

 
 

رح اورجيكم إيش اخدت و كيف عملتهم بالبوست الجاي. 

و لكل حدا كمّل معي لهون و قرأ لحد الآن أحييكم من صماصيم و لغاليغ قلبي ❤️❤️❤️