نوع ريزن جديد – Super glaze

مشروع منظرمدفأة الحطب

فبراير 1, 2020

تغيير قماش كراسي المطبخ و برداية بسيطة

مارس 20, 2020

السلام عليكم و رحمة الله و بركاته هالمرة، رح أحكيلكم عن نوع جديد جربته، و هو Parks super glaze و أحلى إشي إيش يا حزركم؟ إنه جاي بعلبته مع ورقة التعليمات و المعلومات. يعني، مش معبى بعلب بلاستيك أو مش معروف من وين مصدره أو حتى أقولكم....معروف إسم النوع و البراند.

data sheet - ورقة التعليمات و المعلومات

التعليمات موجودة بالتفصيل

بعد المشكلة اللي صارت معي قبل فترة مع نوع ريزن معين (اللي على ذمة الراوي كان خالي من المذيبات و صحي و كل هالسواليف، فتحت الصندوق لقيت المصلّب مدوّب العلبة البلاستيك اللي كان فيها مع الكيس النايلون اللي كانت العلبة البلاستيك فيها). صراحة بعد هاد الموقف، كتيييير عم أدقق بموضوع النوع و توّفر ورقة البيانات الخاصة بالنوع اللي بدي أشتريه. خاصة إنه الإيبوكسي ريزن مادة قوية و التعامل معها لازم يكون بحرص.

المهز = المهم، هاي نتائج تجربتي مع النوع هاد اللي صراحة، مع إنه أغلى نوعا ما من الأنواع التانية المتوفرة، رح أعتمده إن شاء الله لكل مشاريعي المستقبلية حيث إنه بعلبته الأصلية، بدون إعادة تعبئة، معاه ورقة البيانات (و متوفر حتى عدة صفحات لأسئلة و أجوبة من ناس إستخدموه، ف أي سؤال ممكن يخطر ع بالكم ممكن تلاقوله جواب أو تسألوه و ناس مجربين هاد النوع يجاوبوكم) غير انا أكيد :D

تمام، خنبلش – خلينا نبلش – هيا بنا نلعب نبدأ

		مصدر الريزن = من وين جبت الريزن
الخاصية	شو قصدي فيها		ملاحظات
السعر	تكلفة الليتر من الريزن بالدينار الأردني	25 دينار	المصلب والريزن
التوّفر	مدى سهولة شراءه	سهل – متوفر محليا	إن شاء الله رح أنا أوفره – مفاجــــأة – للتفاصيل كملوا لآخر المقال
نسب الخلط	كميات ونسبة خلط المكونات	1:1	بالحجم، يعني نفس الحجم من الريزن و المصلب
سهولة الخلط	قديش سهل نخلط المكونات	سهل
الحرارة الناتجة من الخلط	أثناء الخلط، هل يسخن الخليط؟	حسب الكمية المخلوطة	إزا كانت الكمية صغيرة، و لا نتفة. إزا كانت الكمية كبيرة نوعا ما – يعني خلطنا العلبة كلها على سبيل المثال – في نوعا ما ارتفاع بدرجة الحرارة بس مش كتير.
الرائحة	الرائحة اللي بتكون عندي للريزن بشكل عام وخصوصي عند الخلط	و لا نتفة
الفقاعات	كمية الفقاعات الناتجة وحجمها	قليل جدا.
سهولة التخلص من الفقاعات	التخلص من الفقاعات بطرق مختلفة	جدا سهل.	الفقاعات الكبيرة – يا بنترك الخليط يهدى و بيروحوا لحالهم، أو بالمسدس الحراري/ المشعل. الفقاعات الصغيرة جدا – بعد الخلط نحط الوعاء بماء دافئ لعدة دقائق.
اللون	اللون الناتج بعد ثبات الريزن وبعد ما ينشف	شفاف
الوقت المتاح للعمل	قديش معنا نشتغل بالريزن بعد خلطه مع المصلب قبل ما يصير يعطينا خيوط	45 دقيقة	هاد المفروض. لكن مع درجات الحرارة الباردة ما بين 25 ل 30 دقيقة
سرعة الثبات	الوقت اللي بيحتاجه لينشف ويصير جامد/ناشف	24 – 72 ساعة	نوعا ما أطول من الأنواع التانية
الملمس النهائي	طبيعة القطع والسطح الناتج	قاسي لكن في نوع من المطاوعة	رح أحكي تحت شوي أكتر عن هاي النقطة.
التزيين	هل ممكن إضافة القطع البلاستيكية أو الزينة أو الجليتر	نعم
التلوين	هلأ ممكن تلوينه؟ قبل أن ينشف؟	نعم	ألوان أكريليك، ألوان زجاج، ألوان بودرة وألوان مخصصة كله كان بنتائج ممتازة
القولبة	ممكن نستخدمه بقوالب؟ هل ممكن صبه بقوالب؟	لسه عم أجرب على هاي الناحية	جربت على قوالب مسطحة و قوالب تفاصيلها بسيطة، لساتني عم أجرب على القوالب العميقة و اللي تفاصيلها كتير.
الصب	هل ممكن صبه كطبقة على سطح معين	نعم	أًصلا أصلاتن هو مخصص للصب كطبقة نهائية حامية للأسطح.
التكوّر أو التقعر	بالقوالب - سطح القطع الناتجة عن القوالب – الجهة المقابلة للشكل الناتج/ظهر القطعة	نوعا ما خفيف	ما بيعطي الأطراف المرتفعة للقطعة من عند حدود القالب
التكوّر أو التقعر	دون قوالب	خفيف	بيفرد لأنه سيولته عالية نوعا ما أكتر منما يتقبب Doming effect – weak
Self-leveling	بعد صب كمية من الريزن على سطح مستوي، هل يتوزع على شكل طبقة متساوية أو يتكتل/يتجمع بأماكن معينة؟	نعم	بشكل سهل جدا
الدهن بالفرشاية	هل ممكن دهنه بالفرشاية؟	نعم
التخفيف	هل ممكن تخفيفه (بإستخدام التنر)؟	لساتني ما جربت	خالص التنر من عندي و بضلني أنسى أشتري
الدهن بالفرشاية بعد التخفيف	هل ممكن دهن الخليط الناتج بعد التخفيف	لساتني ما جربت
مقاوم للماء	ضد المي والبلل بعد ما يجمد؟	نعم
مقاوم للحرارة	بعد ما يجمد وينشف تمام، هل القطعة مقاومة للحرارة غير المباشرة؟	نعم	تاني يوم من الصب، جربته مع كاسة ساخنة. كان في نوعا ما تدبيق (إنه الكاسة لزقت بالكوستر) و أثر دائري بس خفيف جدا. بعد 5 أيام مافي أي تدبيق أو أي علامات على الكوستر أو تغيّر باللون
ملائم للأغراض الغذائية	أي إنه يلامس السوائل و الأغذية بشكل مباشر	لأ للأسف	لكن مناسب لملامسة البشرة و أغراض الإكسسوارات على سبيل المثال.

تمام، خليني أحكي شوي أكتر عن الملمس النهائي.
القطع اللي صبيتها، كانت كتييير رفيعة يعني يا دوب 3 مم. و حتى بعد التصلب ضل فيها نوع من المطاوعة، يعني بقدر أتنيها بدون ما تكسر. بس بدون أي تغيير على اللمعة أو ملمس السطح (يعني ما بيكرمش السطح و بتروح لمعته).
إستنوا عليّ لأشوف كيف بده يكون مع السماكات الأتخن.

كوستر و قطعة بالقالب

قطعة تانية مع خلطة ألوان

كيف بالله التفاصيل؟

كمية شفافة صبيتها بقالب مسطح - اللمعة خرافية

تمام، الأشياء اللي حبيتها:
متوفر محلي – بدون شحن و جمارك و بهدلة، موجود بعلبته الأصلية مع ورقة البيانات (مش معاد تعبئته)، شفافيته عالية، سيولته عالية و وقت الشغل فيه طويل (يماثل الجرافيتي اللي جربته قبل فترة على سبيل المثال، بس موجود عنا مش من السعودية). شو كمان؟
آه، المطاوعة – حسيتها منيحة إزا حابين القطع نضيفها على أسطح فيها إنثناءات – مثلا حابين نزيّن ترمس(سخان) شاي/قهوة. الإكسسوارات كمان، اللي بتكون بحد ذاتها بدون إي هياكل معدنية بحيث تكون طرية و مطاوعة و ما تأذي.

الأشياء اللي ما حبيتها:
وقت التصلب نوعا ما أطول (24 – 72 ساعة)، سعره أغلى نوعا ما من الأنواع التانية المتوفرة، و المطاوعة: من ناحية إزا بدنا أشكال أو قطع قاسية بدون أي قابلية للإنثناء.
مع التجارب إزا بيّن معي كمان أشياء رح أضيفها إن شاء الله.

تمام، إن شاء الله رح أكمّل تجارب و شغل فيه لهاد النوع، و أضلني أدور على انواع محلية تانية إن شاء الله.

هساعيات = هلأ، للي بيحب يجربه بتقدروا تتواصلوا معي و تطلبوا منه حيث إنه إن شاء الله رح أصير أوفره عالطلب (تقريبا يومين ل 3 أيام للطلب و التوصيل حسب الإتفاق إن شاء الله) كيف المفاجأة؟