هدية معلم بأول يوم دراسي

نزلة على وسط البلد
سبتمبر 3, 2019
مشروع سريع – رسم مجرة بألوان أكريليك
نوفمبر 2, 2019
 

السلام عليكم و رحمة الله و بركاته.

قبل فترة كانت بداية المدارس، وبلش الدوام وعجقة الدوام وهم دراسته. وكنت حابة بما إنه المدرسة جديدة وبنتي لسه مش متعودة عليها، أضرب عصفورين بحجر: بنتي تاخد شوي عالمدرسة الجديدة ونوزع هدايا خفيفة لطيفة على معلماتها الجداد.

ما كانت عندي فكرة معينة، وكنت نازلة على وسط البلد عشان أدور على أفكار وبستنى يخبطني الإلهام. وصلت على سوق الندى (إزا بتحبوا تقرؤوا القصة كاملة هاي اللينك) وشفت هاد الستاند من الورد، وإزا إلهام المدفعي يغرد (وجدتهاااا) (قصدي خبطني الإلهاام وعرفت شو رح أعمل). توزيعات ورد خفيفة لطيفة (وممكن تضل ذكرى كمان).

أخدت ضمتين من هاد الورد، بلونين البيج أو الأصفر الفاتح، والمشمشي أو البرتقالي الفاتح وكل ضمة فيها 14 وردة. ناسية سعرهم هلأ الصراحة، بس كأنه 2.25 دينار الضمة.

 
 

. تمام، لما فردت/فكفكت الضمة، شكل الوردات لحالهم صراحة ما كان حلو، الوردة الوحدة كانت بس إلها ساق ما عليه أوراق خضرا ولا عروق، والورق الأخضر اللي كان مع الضمة صراحة ما كنت حاببته. ف قلت ما رح يكون حلو اربط على الورد شبر متل ما كنت مفكرة. ف غيرت من ترتيباتي شوي.

 
 

لقيت عندي عرق خضار إصطناعي إشتريته زمان وما إستعملته من وقتها (1.75 دينار حقه أظن) (إشتريتهم وقت ما عملت السلة الحبل بس ما إستعملتهم) وكمان لزيق ورد أخضر اللي بنحكيله فلاور تيب.

 فتكلفة المشروع تقريبا لل 14 وردة 4 دنانير تقريبا (بدون تكلفة اللزيق اللي هو 1 دينار أظن للرول كاااامل و نحنا يا دوب رح نستعمل شوي منه فتكلفته بسيطة).

 
 

تمام، خنبلش (ع قولة أستاذي الرياضيات زمان) = خلينا نبلش التعديلات

الوردة الواحدة هيك شكلها، شايفين كيف الساق مش ولا بد. اللي عملته جبت مقص وقصيت/قمت الغطاء البلاستيكي اللي كان على الساق. عملت هيك مع كل الوردات.

 
 

بعدين اللي عملته إنه أخدت العروق الخضرا وفكيت العروق والأوراق الخضرا كل وحدة لحال. الورد والعروق الإصطناعية عادة بتيجي هيك متل بالصورة. ف سهل كتير نفكها. فكيت كل الأوراق وحطيتهم على جنب. وتأكدت إنه ساق الوردة بتدخل جوا الورق الأخضر (إنه القياس مناسب ).

 

تناولت الفلاور تيب، ولفيت الساق من بدايته من عند الوردة لمسافة بسيطة، وبعدين دخلت عرق أخضر بالساق متل مو شايفين بالصورة، وثبتّه بالفلاور تيب منيح، وكملت لف الساق بالفلاورة تيب. في وردات حطيت فيها عرقين خضر، وفي وردات حطيت عرق واحد بس.

 
 
 

بعدين دورت عندي على فازة أو وعاء يمون شكله حلو، لقيت عندي هاد السطل؟ (ما بعرف إزا المسمي صح) الخشبي باللون الأخضر وعليه زخرفة خفيفة موردة وهيكا. حطيت الورد كله فيه، وكان على سيرلا بس تمسك السطل أو الوعاء وتضيّف المعلمات. بس المشكلة مع العجقة واللي صار نسيت أصورها يومها وهي عم تضيفهم.  

و نسيت أصور الخطوة هاي صحيح، بس حطيت نقطة زيت عطري على كل وردة عشان تعطيها ريحة حلوة و بتقدروا تختاروا الريحة اللي بدكم ياها.

 
 

و هيك بيكون عندكم فكرة سهلة و حلوة و مش مكلفة كهدايا توزيع أو ضيافة. ممكن تزيدوا عليها شبر مثلا على الوردة، و تلفوها بورق مزخرف مثل الميني بوكيه (إنه كل وردة تكون ملفوفة كباقة صغيرة)...هاد يرجع إلكم و تفننكم و قديش كتفكم ما عم يوجعكم  😅