مشروع سريع – هدية معلم

مشروع صغير
أكتوبر 11, 2018
وردة الثالوث – البانزي
نوفمبر 2, 2018

الأسبوع الماضي أو اللي قبله كان يوم المعلم العالمي، و كنت كتير حابة أحضّر هدايا بسيطة للمعلمات اللي بمدرسة بنتي الصغنونة الكبيرة لكن مع الإنشغال و مسؤؤليات الحياة اليومية  ما صحلي أعملهم.  ف لمّا أعلنوا عن إجتماع الأهالي السبت الماضي قلت حجة بحاجة خليني أعمل إشي خفيف لطيف لنتشكرهم . معلمات بنوتي ما شاء الله عليهم رائعات بكل معنى الكلمة (المدرسة صراحة رائعة بكل كادرها) . بعد ما قرقرت (قررت) إنه بدي أعمل إشي، صار الموضوع إيش أعمل؟
هلأ كنت حابة أعملهم إشي بسيط و بنفس الوقت يستفيدوا منه و لو بأي شكل. ف الأفكار كانت عبارة عن يا مج (كاسة) أو كوستر مثلا، ممكن مغناطيسات للتلاجة - و أي فكرة من هدول يكون عليها كلمات أو رسمات بتحكي شكرا معلمتي أو بنفس المبدأ - المشكلة بهدول (مش الكل بيحب يستعمل كوستر و المغناطيسات حسيتها مش بزيادة و الكاسات...ممكن مش الكل يحب الكاسة اللي رح نقدمها)... ف عملت لفة بسيطة عندي بالمشغل أشوف إيش ممكن أعمل غير هيك.

إجت عيني على هدول. 

 

هادا يا جماعة الخير، كل ما أروح آيكيا بتناول واحد أو تنين من هدول الإطارات. مش مكلفين بالمرة (أظن دينار أو دينار و نص الواحد). ف مرة ع مرة، تجمّع عندي عدد منيح منهم (تقريبا كانوا عشرة، خمسة من كل شكل). ف قلت خلص، الإطار مع زينة خفيفة لطيفة، مع صورة أو ديزاين بنحطه جوا الإطار. هيك ممكن همه يستفيدوا من الإطار حتى لو ما حبوا الديزاين أو الصورة.

تمام...بعدين بلشت أفكر بالديزاين و التصميم اللي بدي أحطه داخل الإطار، و بعد شوية بحث عالإنترنت (الله لا يحرمنا من البنتريست) لقيت صورة لطبفة، و من خلال الفوتوشوب أضفت شوية تعديلات و الكلمات اللي بدي ياها.

النص/الكلمات اللي حطيتها:
Thank you for being an awesome teacher.
Love you this whole much,
Serla Masa.

و نقيت الخط غير شكل (إنه مش من الخطوط الإعتيادية) و نزلته من موقع
www.dafont.com

ترا هادا الموقع بيضيع...فيه كتير أشياء و خطوط حلوة و صراحة هو مصدري و متجهي لمّا بدي خط معيّن لتصميم معين

 

 

و بلشت طباعة. و بعد الطباعة قصيت التصميم (بتقدروا تستعملوا لوح القص أو عادي المشرط و المسطرة - ممكن بالمقص بس ممكن خطوط القص تكون مش مستقيمة ف بنصح بإستخدام المشرط و المسطرة).

بعدين حطيت الصور و التصاميم بالإطارات. 

بس خلوا ببالكم إزا كنتوا عم تستعملوا إطارات آيكيا، بيجي عليها دائما غلاف حامي لازم تقيموه عشان يكون لوح الأكريليك شفاف تماما (بيجي بالإطار لوح أكريليك مش زجاج) و هادا اللي عملته لكل الإطارات

بعدين زينّت الإطارات بشوية ورد و عروق كانوا عندي (مصنوعين من ورق و كرتون) و كان في إشي من لباد و هيك. و ثبتتهم بالسيليكون الساخن. 

بس هاد هو، إن شاء الله يكونوا عجبوا المعلمات و حبوهم