مرات بتبلشوا بمشروع أو فكرة، بتوصلوا لمرحلة بيوقف عندها الشغل…ممكن لأنه بطل عندكم الوقت،أو خلصت المواد اللي عم تشتغلوا فيها، أو مش عارفين كيف تكملوا أو بأسوأ الحالات ما حبيتوا النتيجة اللي عم تطلع معكم….مين ما صار معه هيك؟
أغلب الأحيان أفضل حل لهاي المشكلة، هو إنكم تتركوا الشغل لفترة معينة و تبطلوا تفكروا فيه. شو لازم أعمل و كيف ممكن أغيره و إزا عملت هيك أو هيك….كل هاي الأفكار حطوها على جنب، و وقفوا الشغل
بعد ما روقتوا و ارتحتوا، وقتها إرجعوا للشغل بتلاقوا صار عندكم رؤية أحسن للأمور و نظرة جديدة و حلول لأي مشاكل ممكن كانت عندك بالشغل. و أكيد هاد بيرجع للشخص نفسه، في ناس بتبدع تحت الضغط – متل طنجرة الضغط بالزبط، النتائج رائعة بتكون معهم كل ما انضغطوا- و في ناس الضغط عندهم يوّلد الإنفجار – بس تعصلج الأمور معهم بيمسكوا الشغل كله بلحظة عصبية و زت من الشباك – لكن، باختلاف الشخصيات و قدرات التحمل أهم إشي نخلي ببالنا إنه ناخد فترات راحة من الشغل على مشروعنا الحالي و لو لـخمس . دقايق نريّح فيها، لأنه مع الضغط و كترة التفكير ممكن يصير عنا نتيجة عكسية و نخرب الشغل كله و نضطر نعيد المشروع من أول و جديد
أنا على كتير مرات هيك كنت أعمل، لقيت هاد أفضل حل في الحالات و المشاريع اللي ما كنت أعرف كيف بدي أكملها لأنه مش عاجبتني النتيجة، أو صار عندي مشكلة معينة (نوع جديد من المسامير/البراغي و مش عم يثبتوا منيح، أو اللون مش عم ينشف و مش عارفة أستنى عليه أو استعمل فرد/مسدس الحرارة لأنشفه بسرعة، أو إشي بسيط متل أستعمل هاد النوع من الشبر و لا أستعمل هداك النوع). كنت أترك كل إشي متل ما هو، أطلع من مشغلي و أنسى الموضوع لفترة، و بس أرجع أكون يا حالة المشكلة أو مفكرة بتصميم جديد و حركة جديدة……أو أضطر أترك المشروع مرة تانية