الفيديو بأسفل الصفحة
رح نبلش نحكي عن الأختام: هي أشكال معينة مصنوعة من مادة غالبا مطاطية طرية أو لينة (شفافة أو غير ذلك). بستخدمها مع ألوان أو أحبار خصوصي -لأختم أو أطبع – الشكل المطلوب على قطعة العمل. بتعطينا جمالية أو تأثير نهائي حلو على قطعة العمل ما بقدر أحصل عليه من خلال الطباعة العادية أو الدكبجة العادية. مثلا كنا حابين نضيف شكل فراشة على طرف قطعة العمل وما عندي ورق عليه فراشات, أو الورق اللي عندي ما عليه فراشات منفصلة. حابة أحصل على تفرعات وردية على الطرف بشكل منفصل، بقدر أحصل عليها بالأختام
رح نحتاج ختم منفصل لكل شكل وكل حجم – يعني ما بنقدر نعكس الختم لأحصل على طبعة عكسية من الشكل المطلوب. لأ، لازم يكون عنا ختم منفصل بالشكل العكسي. وكمان بنحتاج أحبار خصوصية لتعطينا أفضل النتائج – ممكن أستعمل البدائل للأحبار لكن رح تأثر على جودة طبعة الختم الناتجة وممكن مع الوقت يخرب عنا الختم لدرجة كبيرة وما نقدر نرجع نستعمله. وبنحتاج قاعدة تثبيت (عادة بتكون من الأكريليك الشفاف حتى نحصل على ضغط متساوي على جميع أنحاء الختم). من الممكن إستخدام الأختام بدونها لكن بنحتاج نكون أكتر حرص ودقة بالإستخدام و ممكن ما نحصل على طبعة كاملة من الختم. في أنواع معينة (حسب الماركة أو المُصنّع) بتيجي مثبتة على قاعدة خشبية، ف بالتالي ما رح أحتاج قاعدة الأكريليك). مشكلة الأختام المثبتة على القاعدة الخشب، إنه بسبب عدم شفافية الخشب ما بقدر أحدد موقع الختم بالدقة اللمكن أتحكم فيها فيما لو كان الختم مثبت على قاعدة أكريليك
مباشرة بعد إستعمالها لازم ننظفها من الحبر باستخدام منديل مبلل أو
wet wipes
لأنه ما لازم نخلي الحبر ينشف عليها لأنه ممكن تتأثر جودة الختم والطبعات القادمة منه
أحبار الأختام الخصوصية لازم تكون مقاومة للماء لأنه أساس غرا الديكوباج مائي، ف إذا ما كانت مقاومة للماء ممكن يرجع الحبر يتفاعل مع الغرا ويخرّب الشغل كله. في عنا أحبار الأركايڨال ،أو أحبار الستايز أون أو المومينتو من أفضل الأنواع اللي ممكن نستعملها – ممانعة/مقاومة للماء. ومتوفرين بمجوعة ألوان كبيرة وأحجام مختلفة، وحتى في عبوات تعبئة من الحبر
ممكن كمان نستعمل أحبار التعتيق – ديستريس – بس هدول غير مقاومين للماء، يعني رح نحتاج نثبّت الحبر قبل ما نكمل دكبجة وشغل. عملية الثبيت ممكن تكون باستخدام الغرا (متل تثبيت حبر الطباعة العادية) أو ممكن باستخدام طرق تانية شوي مكلفة أكتر، منها إستخدام بودرة الثبيت الحراري (اللي ما بقدر أستعملها غير مع حبر التثبت الخاص فيها) أو إستخدام مكونات أو منتجات تانية ممكن تكون مكلفة على المدى الطويل أكتر من إقتناء الأحبار الخصوصية اللي حكينا عنها قبل. ف الإختيار بيرجع لإلكم، وإزا بتحبوا في على أكاونت الإنستغرام فيديو توضيحي لكيفية استخدام حبار التعتيق
تمام، ما لقينا الأختام متوفرة محليا؟ أو ما لقينا الأحبار؟ ما قدرنا نحصّلها أو نحصل عليها؟ ممكن نعمل بدائل بسيطة حسب المواد المتوفرة محليا
بدائل الأختام
أكيد في بدائل كتيرة، ومواد تانية بقدر أستخدمها لكن أنا إخترت أكتر تنين متوفرة موادهم محليا وأقلها كلفة، وأفضلها جودة في الختم والطبع. يعني ممكن نستخدم الفلين الأبيض (متل اللي بيجي بعلب وجبات المطاعم الجاهزة)، أو البطاطا (تتزكروا ونحنا صغار؟) أو ، ممكن بدائل بكلفة أكتر متل السيليكون والقوالب أو ماكينات تصنيع الأختام . ممكن أستخدم أي أداة أو قطعة بتعطيني أثر بس أطبع عليها بالحبر أو الألوان – كيس نايلون مكرمش، قطعة خيش، شريط الفقاعات اللي بيجي كتغليف. الإحتمالات و الإستخدمات متعددة و لا متناهية و كله بيرجع للتأثير اللي بدك تحصلوا عليه و الحركة اللي بدكم تضيفوها لشغلكم، بس متل ما قلتلكم، رح أحكي عن أفضل بديلين برأيي الشخصي (كأختام محددة الشكل – ترا كتير بستعمل أشياء غير إعتيادية لتعطيني تأثيرات مختلفة بس بتكون عشوائية عشان هيك ما رح أحكي عنها هون – رح تشوفوني إن شاء الله بطبقها أو بشتغل فيها بالفيديوهات القادمة) ف خلينا نبلش
أول بديل – المحاية
عنا بالأردن بنحكي محايّة، عندكم إيش المسمى؟
اللي هي اللي بنستخدمها بالمدارس لنمحي الكتابة بقلم الرصاص. موجود بكل المكتبات (عادة بأحجام صغيرة) لكن بالمكتبات الكبيرة متوفرة بأحجم أكبر. رح نحتاج أدوات الحفر (أدوات الحفر على الخشب) أو سكين/مشرط حاد. برسم الشكل اللي بدي ياه على قطعة المحاية (الأفضل نرسم خطوط واضحة لتحديد الشكل). نخلي ببالنا بس نختم/نطبع الطبعة رح تكون بالعكس (معكوسة) ف إزا إخترنا أحرف أو كلمات تكون عكسية/معكوسة على المحاية علشان تكون الطباعة بالجهة الصحيحة. باستخدام السكين بزيل كل الأجزاء المحيطة بالرسمة أو الشكل المطلوب من على المحاية، بحيت تصير عندي الرسمة بارزة. لازم ندير بالنا تكون خطوط القص مرتبة وموّحدة عشان الطبعة أو الختم يكونوا واضحين ومرتبين
الحلو بهاد البديل إنه ممكن نصنع الأشكال اللي إحنا بدنا ياها، من تصميمنا. لكن بنتقيّد بحجم القطعة المطاطية الموجودة بين إيدينا. هاد البديل بيعطينا أفضل وأقرب النتائج للأختام الأصلية
تاني بديل – الفوم
لهلأ مش عارفة إسمه بالعربي – عندكم فكرة؟
موجود بأغلب المكتبات ومتوفر محليا بشكل كبير. ومش مكلف أبدا، تقريبا أخدت 7 قطع بحجم ورق الطباعة العادي (21 * 29.7 سم) بدينار. ما بهمنا اللون، اللي رح نعمله إنه نقص الاشكال اللي بدنا ياها منه. المشكلة إنه من الصعب نقص أشكال صغيرة كتير أو مفصلة كتير باليد، ممكن نضطر نقص بالخرامات أو ماكينات القص
لكن الحلو فيه، إنه ممكن أعمل ختم بالتفاصيل اللي بدي ياها وبالحجم اللي أنا بدي ياه أو بحتاجه. ممكن أركب قطع واشكال مختلفة مع بعض لأي حجم. بس نقص الأشكال اللي إخترناها، بنثبتها على قاعدة – ممكن خشب أو بلاستيك حسب المتوفر عنا، وبنستخدمها متل بنستخدم الأختام الأصلية. كمان ممكن باستخدام أداة حادة (لكن غير قاطعة) أرسم على قطعة الفوم وأشكّل متل أخاديد أو مناطق غائرة، و يصير عندي متل الختم العكسي – المساحة عكسية أو الختم العكسي
الفوم بيعطينا طبعات جيدة لكن ممكن مع الإستعمال تتأثر جودة الختم وطبعته
بدائل الأحبار
بما إنه الأحبار عنا متشكلة وأنواعها كتير، رح أحكيلكم عن أبسط بدائل إلها وأقلها كلفة. لكن لازم نخلي ببالنا، جودة الختم أو الطبعة الناتجة متفاوتة وبتعتمد على شروط كتير، ف بنصحكم إزا حبيتوا تجربوا هاي البدائل إنه تجربوها أكتر من مرة وتعدلوا عليها بما يناسب إحتياجاتكم
لكل البدائل رح يكون في إشي أساسي مطلوب – لبادة خفيفة (مش اللباد العادي) – أفضل النتائج حصلت عليها من استخدام اللباد اللي بيكون على مساحات اللوح الأبيض. عرفتوا المساحة اللي بنستعملها لتنظيف للوح الأبيض اللي بنكتب عليه بالأقلام الماركرز، بالمدارس؟ بيكون إلها متل – إعادة تعبئة – بس للوجه أو الجهة اللي بتنظف اللوح. بتلاقوها بأغلب المكتبات – ما عندي فكرة عن السعر لأنه إشتريتها من فترة طويلة، وكان بالعلبة عدد هائل ف لساتني بستعملهم
أول بديل – ألوان/دهانات الأكريليك المخففة
رح تحتاجوا دهان أكريليك باللون اللي بدكم ياه، شوية ماء ، وغليسيرين سائل (بتلاقوه بالصيدليات ومش مكلف بالمرة) واللبادة اللي حكيتلكم عليها فوق، وفوم – الفوم إختياري بدكم ياها عشان تحطوه تحت خلطة الدهان عشان أسهل لنحمّل الختم الحبر أو اللون
دهان أكريليك، شوية ماء، غليسيرين كوب للخلط
اللي رح نعمله، إنه نخفف دهان الأكريليك بالموي، شوية مي مش كتير، بس لحتى يصير نوعا ما سائل (لكن مش شفاف). بعدين بضيف غليسرين ( بالنقاط، وحسب الكمية – يعني يا دوب نقطة نقطتين إزا الكمية قليلة). الغليسرين بيساعد الدهان على إنه ما ينشف بسرعة، و بكون جهزت قطعتين من اللباد، القطعة الأولى بضعها فوق سلايد أو ملف بلاستيكي، و بعدها بسكب أو بدهن قليل من خليط الأكريليك و الغليسيرين، بعدها بضع قطعة تانية من اللباد فوها – شخصيا لقيت هاي الطريقة بتعطيني افضل النتائج. هون ممكن نحط/نضع قطعة الفوم تحت السلايد أو الملف البلاستيكي بحيث يصير عنا سطح طري نوعا ما لتسهيل تحميل الختم باللون/الخلطة
هلأ بقدر أستعمل الأختام وأطبع بهاد -الحبر- المصنوع يدوي
إزا إستخدمنا هاد الخليط مع الأختام الأصلية، لازم على طول ننظفها وإلا نشف الدهان عليها وخربها. ف مهم جدا جدا ننظف الأختام مباشرة بعد الإستخدام…الحلو فيه إنه ممكن نستخدم أي لون بدنا ياه دون تكلفة عالية (و متى ما نشف اللون/الدهان بيكون ثابت ما بيتأثر بالماء أو غرا الديكوباج = ما بيحتاج خطوات تثبيت إضافية. لكن بالمقابل، من الصعب الحفاظ عليه فلازم صنع كمية جديدة كل مرة (وإزا كنّا خالطين اللون يدويا ف من الممكن جدا من نقدر نحصل على نفس اللون) ف بس نخلّي ببالنا هدول النقاط
البديل التاني – صبغات الطعام
رح نحتاج صبغة طعام سائلة، واللبادة اللي حكينا عنها والغليسيرين والكحول الطبي
داخل وعاء صغير، بنخلط كمية من الصبغة، مع قليل من الغليسيرين (نقطة نقطتين عالكتير) مع كحول طبي (كمية الكحول الطبي تقريبا تلتين كمية الصبغة أو مماثلة لكميتها حسب نوع الصبغة وتركيزها) – نعم ممكن إستخدام الصبغات الجامدة أو البودرة بس نتأكد إنها تذوب منيح بالكحول الطبي. بنسكب كمية من الخليط على قطعة ضغيرة من اللباد، و من ثم فوقها بنضع قطعة تانية من اللباد. و جاهزة بتكون لنستخدم الأختام معها. الحلو في هاد البديل إنه ممكن تخزينها بأوعية زجاجية، أو حتى ممكن نستخدمها مع مرشة للتلوين وأغراض السكراب بوكنج. الأختام أو الطبع الناتجة عنها بتكون فاهية اللون و تحتاج تثبيت قبل الشغل بالديكوباج و غرا الديكوباج…صحيح كمان إشي حلو فيها ممكن خلطها بسهولة – متل ما رح تشوفوا بالفيديو إن شاء الله
مع التجربة بتقدروا تحكموا أفضل وتوصلوا للخليط اللي بناسب شغلكم وحتياجاتكم. مشكلة البديل هاد ما بيناسب أنواع معينة من الأختام خصوصا الأختام الشفافة، بتصير عنا بقع بالختم أو طبعة الختم – لكن ممكن نتعامل معها بطرق معينة بنحكي معها على غير مرة إن شاء الله
ونفس الخطوات اللي ذكرناها بالبديل السابق، لازم تنظيف الختم مباشرة بعد الإنتهاء
ومتل ما حكينا، في عنا بدائل كتير، وإختيارات متعددة، لكن شخصيا حصلت على أفضل النتائج باستخدام البديلين اللي ذكرتهم
هيك رح ننتقل للستنسلز
الستنسلز
إحدى مرادفاتها بالعربي – المرسام – قطعة من الورق أو البلاستيك بيكون فيها أشكال مفرغة بقدر ألوّن من خلالها أو أستعمل معجون التشكيل….متوفرة بأحجام وأشكال كتيرة لا يمكن حصرها أو عدها ومصنوعة من مواد مختلفة (ممكن من ورق أو كرتون، تجليد لاصق، بلاستيك أو مطاط معيّن). أسعارها متفاونة حسب المصنّع والحجم والشكل (عادة الستنلسز اللي بيكون فيها تفاصيل أكثر أو أدق بيكون سعرها أكتر). محليا، بالأردن، صعب تلاقوا منها (رح تلاقوا أحجام كبيرة بمحلات مواد البنا وقليل ما تلاقوا أحجام صغيرة أو أشكال وتصاميم متعددة) – صدفة لقيت بمكتبة أبو شنب بالبلد بس كانوا 3 تصامبم لا أكتر. ممكن تلاقوا بمحل شي كان سكراب بوكنج بس مش دائما (يعني أنا كنت كل ما أروح يا خالصين يا مش متوفرين) ف إنتوا وحظكم. دول الخليج محظوظين أكتر شوي، موجودين وبوفرة. متوفرين بجرير على سبيل المثال، والمكتبات الكبيرة – في بدبي مثلا أكتر من محل متخصص للفنون موجود عندهم تشكيلة رهيبة – منهم بيبر لاين وهو متجر متخصص لفنون السكراب بوكنج واللذي منه
الستنسلز ممكن أستعمل معه الألوان، الأحبار أو معجون التشكيل ليعطينا تأثيرات كتير حلوة على قطعة العمل
مع الألوان أو الأحبار بنقدر نستخدم فرشاة خصوصي للسنتلسز. ليش ما بقدر أستعمل الفراشي العادية؟ لأنه مع الفراشي العادية ممكن تنزل شعيراتها تحت الستنسل (أو تسبّب إنه الألوان تنزل تحت الأطراف) ويصير عندي رسمة أو طبعة غير واضحة أو محددة. شخصيا أنا بفضل استعمل الإسفنج – خصوصي إسفنجات الميك أب. بجيب منهم من محلات كل شيء بدينار بسعر كتير قليل وبحسهم حتى أحسن من فرشاية الستنسل الخصوصي. ممكن نستعمل إسفنجات الأحبار إزا متوفرين عنا
شغلنا مع الستنسل لازم يكون على شكل التطبيع – ما بمشّي الإسفنجة أو الفرشاية على شكل خطوط، لأ، بدهن اللون أو الحبر بضربات خفيفة منفصلة أو دائرية خفيفة – عشان ما ينزل اللون أو الحبر تحت حواف الستنسل
مع معجون التشكيل أو ما شابه، بقدر أستعمل مدية الرسام أو أي أداة إلها طرف مستقيم، عشان أقدر أوزع المعجون على شكل طبقة متساوية وبحاول ما أضغط كتير للأسفل (بمشي بالأداة بشكل خطوط مش بضغط فيها) عشان ما ينزل العجون أسفل حواف الستنسل ويخرب عندي التأثير. الحلو هون إنه المعجون بيعطينا ارتفاع عن سطح العمل حسب شكل الستنسل المستخدم.
عشان اقدر أثبت الستنسل على سطح العمل بشكل مؤقت بقدر أرش الجهة الخلفية (الملامسة لسطح العمل) بمثبت الشعر الرش (سبري الشعر، بيسهل علينا كتير خصوصا إزا كان في إنحناءات بسطح العمل و التثبيت بيكون مؤقت و ما في أي تأثير على سطح العمل) و مهم كتير أغسل الستنسل مباشرة بعد ما أخلص شغل – أو أنظفه بإستخدام المناديل المبللة
بدائل الستنسلز
أسهل بديل
بتلاقوهم مع أغراض تزيين الحلويات – اللي بيكونوا لتزيين المشروبات الساخنة كمان. هدول عادة بلاقيهم بمحلات الأدوات المنزلية أو محلات الحلويات
البديل التاني – نصنع الستنسلز الخاصة فينا
ممكن أقص الأشكال اللي بحتاجها أو التصاميم اللي بدي ياها من مواد مختلفة – منها الكرتون لكن رح تكون ذات إستخدام مرة وحدة أو مرتين – رح تتأثر ألياف الورق ويخرب الستنسل
ممكن أفضل إشي الملفات البلاستيك الشفافة – أكتر متانة وممكن أستخدمهم أكتر من مرة. ممكن أستخدم ماكينات القص اليدوية أو الإلكترونية – شخصيا بصنع الستنسلز اللي بحتاجها على ماكينة السيليويت من سلايدات أو ملفات شفافة. ومن خلالها بقدر أقص ستنسلز من ماة التجليد اللاصق – هدول كمان بيكونوا إستخدام واحد
الخرامات صعب نستخدمها لأنه بتكون عادة فقط عالطرف مش لمنتصف الورقة أو الملف. لكن ممكن نستعملها لنعمل ستنسل الطرف أو ستنسل طولي
بالنسبة لتصاميم الستنسلز – بنقدر نلاقي مجموعة كبيرة عبر الإنترنت – لكن لازم يكون التصميم مناسب من حيث ما يكون عندي مساحات كبيرة جدا أو مسافات طويلة مفتوحة على بعض – هاد الإشي بيخلي الستنسل صعب الإستعمال وبيعطينا نتيجة سيئة أو طبعة غير واضحة
بالنسبة لكيف نقص الستنسل يدويا؟ بنقدر نستخدم مشرط القلم (المشرط اللي بيكون على شكل قلم)، إزا عم نستخدم ملف أو سلايد بلاستيكي ممكن نسخن المشرط باستخدام شمعة لتسهيل عملية القص. ممكن إستخدام ماكينة اللحام اليدوية (اللي بيستعملوها مع الدارات الكهربائية والتوصيلات) مع تركيب رأس على شكل شفرة، لكن لازم نكزن حريصين لأنه ممكن المادة البلاستيكية تدوب مع الحرارة.
بطبع التصميم اللي بدي ياه، و بالحجم اللي بدي ياه، و بحط الورقة اللي طبعت عليها أسفل الملف أو السلايد الشفاف و باستخدام ماركر رفيع بنقل الرسمة أو التصميم على السلايد. بعدين باستخدام المشرط و على الخطوط اللي نقلتها بقص التصميم….نخلي ببالنا، الستنسلز المقصوصة يدويا رح تكون خطوطها وحدودها عشوائية اكتر من الجاهزة. لأنه مع القص والعامل البشري رح يكون عنا عشوائية أكتر بالقص
إزا عندكم معرفة ببرامج التصميم متل الفوتوشوب او الإلستريتر رح يمكنّكم من تصميم الستنسلز الخاصة فيكم من ثم قصها بالليزر (بمحلات الخاصة بقص الليزر) وإستخدامها. لكن رح تحتاجوا مادة خصوصي تستحمل حرارة الليزر وما تدوب
و هيك إن شاء الله بكون حكيتلكم عن كل اللي عندي عن الأختام و الستنسلز…اسأل الله الفائدة لنا و لكم