التأثيرات النهائية

التأثيرات النهائية

هي التأثيرات أو الإفكتس اللي بنضيفها على قطع أو سطح العمل بعد خطوة الدكبجة وتقريبا 90% من الوقت بتكون قبل خطوة الإنهاء

أهم إشي بالتأثيرات النهائية إنها ما تغطي التصميم أو الشكل المستخدم بالدكبجة بشكل كبير عشان ما يروح كل شغلنا عالفاضي ويصير تحت التأثير اللي عملنا بالآخر. ولأنه التأثيرات النهائية كتيرة ومتعددة ولا حصر لها، وممكن حسب طريقة عمل أو شغل أي شخص أو حتى أي حركة بنعملها تكون تأثير نهائي رح أحاول أحكي عن أشهر التأثيرات أو أكثرها شيوعا

في عدة تأثيرات حكينا عنا بفيديوهات سابقة (رح تلاقوا الرابط بصندوق الشرح تحت الفيديو إن شاء الله) وهي

التعتيق

التعتيق اللي هو نعطي منظر قديم للقطعة اللي عم نشتغل عليها ونخليها تبين أقدم. التعتيق النهائي بيكون بعد الدكبجة وقبل الإنهاء. ممكن نعمله إمّا بورق الصنفرة، ونصفر سطح القطعة بورق صنفرة قياس متوسط بأماكن عشوائية وخطوط بإتجاه واحد، كمان أطراف القطعة و جوانبها. ممكن كمان إستخدام أحبار مخصصة أو حتى شمع تعتيق. بإستخدام فرشاية أو اسفنجة أو حتى أصابعنا بندهن أماكن عشوائية من سطح قطعة العمل. ممكن كمان نستعمل ألوان أكريليك، بس يكون مناسب للألوان الموجودة بالتصميم والديزاين اللي عم نعمله

ممكن نعملها بطريقة تانية (غير اللي ذكرتها بالسابق إمّا بالفيديو أو المقالة) اللي هي التطبيع: بنستخدم فرشاية خشنة أو إسفنجة خشنة (متل إسفنج البحر كأقرب مثال)، وبنحملّها بكمية قليلة جدا من الدهان، وبنطبع على قطعة أو سطح العمل بشكل عشوائي. بحس هاد التأثير أفضل التأثيرات مع اللون الدهبي أو الفضي أو حتى أحيانا اللون اللؤلؤي (اللمعة الصدفية)

الكراكل

 كتأثير نهائي ما بنقدر نستخدم غير المادة المخصصة لهاد التأثير (لأنه لو إستخدمنا الطريقة اليدوية رح نغطي التصميم والأشكال اللي دكبجناها وهاد الإشي أكيد ما بدنا ياه). عادة مادة الكراكل المخصصة تدهن فوق سطح قطعة العمل بشكل كامل (أو الأجزاء اللي بدنا ياها من قطعة العمل) لأنها بس تنشف بشكل كامل بتكون شفافة ف ما رح تغطي التصميم

ممكن بعد ما تنشف مادة الكراكل، نستخدم ألوان الأكريليك لإظهار الشقوق والتشققات اللي صارت عنا بالمادة وتصير واضحة أكتر (بيعتمد على طبيعة مادة الكراكل المستخدمة ونوعها). بنخفف لون الأكريليك (ويفضل يكون اللون غامق) بشوية مي، وبدهن طبقة خفيفة منه فوق المنطقة الللي عملتلها كراكل، وبسرعة واللون لسه ما نشف بزيله بإستخدام قطعة قماش نظيفة أو حتى مناديل مبللة (حتى ممكن أستخدم القماشة لأدهن وأمسح اللون). اللي رح يصير لون الأكريليك رح يتخلل التشققات مع تغطية السطح، ولما نمسح اللون بالقماشة النظيفة ما رح نزيل اللون العالق بالتشققات ف رح يضله جوا وينشف (وهيك بتبرز التشققات بشكل واضح)

الترسيم/الستنسلز

 وهو المصطلح اللي بقصد فيه عملية إستخدام المراسيم (جمع مرسام) أو الستنسلز. ممكن إستخدامها مع أنواع مختلفة من الدهانات أو معاجين التشكيل (ممكن حتى نخلط معجون التشكيل مع ألوان أو صبغات لنحصل على ألوان مختلفة منه حيث إن معجون التشكيل عادة بيكون باللون الأبيض). هو كمان بنحاول نتفادى الأجزاء الرئيسية من التصميم عشان ما نغطيها. ممكن ندمج الترسيم مع التعتيق ليعطونا نتيجة متكاملة وحلوة

الأختام

ممكن نستخدم الأختام مع الأحبار لإضافة حركة وتأثيرات نهائية حلوة لقطعة العمل. حسب شكل الختم المستخدم ممكن نتفادى التصميم أو نختم فوقه (إزا كان الختم فيه مساحات مفتوحة وفارغة أو كان على شكل موحد ومساحات مغلقة)، وأكيد كله بيرجع لإختيارنا وزوقنا الشخصي. أهم نقطة بإستخدام الأختام هي نوع الحبر المستخدم، لازم يكون مقاوم للماء (لأنه أغلب الظن رح يكون عنا سطح العمل مغطى بطبقة من غرا الديكوباج ف رح تكون طبقة ملساء) والأحبار اللي أساسها مائي سهل تنمسح عن هاي الطبقة. أحسن الأحبار هي 

Momento ink و archival ink و staz on

 و أو حتى ممكن الأحبار البديلة اللي بنعملها من ألوان الأكريليك (طريقتهم بهاد الفيديو – الدقيقة 3:35)

التأثيرات الجديدة اللي رح نحكي عنها هلأ

تعدد الطبقات بقطعة العمل

ممكن نستعمل قطع خشبية (أو من مواد مختلفة) وندكبجها بتصاميم مختلفة أو متشابهة ونضيفها لسطح قطعة العمل يعني إنه سطح قطعة العمل بيكون متعدد الطبقات مش التصميم اللي بنعمله عدة طبقات

ممكن نستخدم أشكال منتظمة أو عشوائية من الكرتون أو الخشب، مقصوصة ليزر أو يدوي كله بيرجع للذوق الشخصي، لكن الأفضل إستخدام طبقات ذات سماكات قليلة عشان ما تصير القطعة النهائية سميكة كتير أو يكون الشكل مش متناسب مع بعضه، أو يكون وزن القطعة تقيل كتير. ومنها كمان الإضافات والزينة المعدنية وغير المعدنية متل: الستراس، الغليتر، اللولو أو الخرز، الشبر، الورد أو أيا إشي ممكن تقرروا إستخدامه في تجميل وتزيين سطح العمل. ممكن ثنائية أو ثلاثية الأبعاد، لكن إزا كانت ثلاثية الأبعاد (بقصد فيها تكون مجسمة مش مسطحة) بيجوز من الأفضل نضيفها بعد خطوة الفينيشنج (رح نحكي عنه بالجزء القادم والأخير إن شاء الله). هون بصير عنا مدخل لفن الميكسد ميديا (فن الوسائط المتعددة) وتم إضافة الزينة هاي بإستخدام لواصق بتعتمد على طبيعة المادة المصنوعة منها الزينة. في أشياء بقدر أستخدم الغرا، وأشياء تانية لازم أستعمل السيليكون الساخن أو البارد أو حتى ممكن السوبر جلو (على قولة زوجي سوبر جلول)

الديكوباج ثلاثي الأبعاد

الديكوباج الثلاثي الأبعاد بيجي أعقد شوي من الديكوباج العادي، لأنه لازم نفكر كيف وأي جزء من التصميم لازم نطبق عليه التأثير، قديش عدد الطبقات اللي بدنا نعملها مثلا، وين لازم يكون البروز ونفكر كمان بالتصميم والطباعة وحجم الطباعة. أنا هلأ رح أحاول أشرح الموضوع بشكل وافي، لكنه بحر واسع بيحتاج تخصص وتجربة كتير لحتى توصلوا للنتائج اللي بدكم ياها.

الديكوباج الثلاثي الأبعاد ممكن نشتغل فيه/عليه بعدة طرق

الطريقة الأولي: التشكيل الحراري

الأصل نشتغل فيها من خلال سلايدات بلاستيكية شفافة مطبوع عليها وتعرف باسم

 Sospeso   سوسبِسو

طريقتها تختلف إختلاف كلي عن الديكوباج العادي وأغلب التصاميم اللي بتكون لهاد النوع بتكون تصاميم ورد أو أزهار (تشكيلات وردية) – وبشكل أساسي بيتضمن قص الورد من السلايدات الشفافة وتشكيله ومن ثم إضافته على سطح العمل بأنواع مخصصة من اللواصق…لخطوة التشكيل رح نحتاج مصدر حرارة خفيفة وعادة ما بيكون شمعة، بتعريض الأشكال المقصوصة لحرارة ومن ثم تشكيلها بإستخدام أدوات التشكيل الخاصة بالورد. خطوات زيادة، نعم. مكلف أكتر من الديكوباج العادي، نعم. لكن النتائج (وايد وايد وايد) رائعة وجميلة. بعد التشكيل بتنتج الأشكال عنا ثلاثية الأبعاد، ف بنقدر بعدها حتى نشكل مجسمات غير إنه نضيفها لقطعة أو سطح العمل

مشكلتهه لهاي الطريقة؟ بعد الإنتهاء من التشكيل بيكون في عنا لمعة قوية نوعا ما بسبب السلايدات المستخدمةـ ف ممكن الكتير ما يحبوا المنظر النهائي خصوصا إزا بيحبوا الفنينش المطفي

هل إله بدائل، هل ممكن نشتغله بدون ما نشتري السلايدات المخصصة لهاد النوع؟ ممكن نتخلص من اللمعة؟
أكيد

البديل الأسهل لسلايدات السوسبِو هي السلايدات الشفافة الحرارية والطباعة الليزر. للأسف هو ما في مجال للطباعة العادية لأنه حبر الطباعة بيحتاج حرارة للتثبيت على السلايدات وهاي الحرارة غير متوفرة إلا بالطباعة الليزر. والسلايدات الشفافة لازم تكون حرارية مخصصة للطباعة في طابعات الليزر (عشان ما تدوب جوا الطابعة بس تتعرض للحرارة). طريقة التجهيز والتشكيل نفسها بشرائح أو سلايدات السوسبسو، لكن الفرق هو إنه لون خلفية الصور في سلايدات السوسبسو الأصلية بيكون أبيض، بينما بالسلايدات الحرارية اللي طبعنا عليها، بتكون شفافة. ممكن بعد ما نخلص قص وتشكيل ندهن الخلفية باللون الأبيض (وممكن لأ حسب التصميم والديزاين لقطعة العمل اللي عم تعملوها). إزا كان عن التصميم بدون أي خلفية لازم ندهن القطع اللي شكلناها باللون الأبيض. لكن إزا كان التصميم بس لإعطاء البعد الثلاثي ممكن نخلي القطع بدون ما ندهنها باللون الأبيض. بيرجع كله للتصميم اللي ببالكم واللي عم تشتغلوا عليه

الطريقة التانية: التشكيل العادي

هون رح نحتاج نسختين من التصميم نفسه على الأقل، النسخة الأولى بندكبجها على سطح العمل بشكل كامل. النسخ التانية بنقص الأشكال اللي بدنا ياها من التصميم بحيث تتشكل وتعطينا الأبعاد المطلوبة. مثلا، لو التصميم عنا بيشمل ورد، رح نحاج نقص بتلات الوردة بشكل منفصل ونشكلها بطريقة مماثلة للطريقة السابقة (السيسبيسو) لكن بدون حرارة وبإختلاف المادة المطبوع عليها…هون طبعا، النسخة التانية اللي بنقص التصميم منها لازم تكون من مادة سميكة نوعا ما (مثلا المناديل الورقية لحالها ما رح تنفع، إلّا إزا لزقناها/ألصقناها على ورق سميك أو كرتون مثلا) أو الأحسن تطون الطباعة على ورق سميك. أو ممكن إستخدام الورق العادي بس بندهنه بالغرا مرة أومرتين بالغرا عشان نخليه أقوى

رح نلاقي حواف أو أطراف الأشكال المقصوصة ظاهر فيه اللون الأبيض للورق، ف أنا اللي بعمله بستعمل حبر تعتيق أو حبر مماثل لألوان الشكل المطلوب وألون الحواف هاي أو الأطراف بشكل خفيف. ما عندي أحبار؟ ممكن إستخدام أي ألوان، الهدف فقط تخفيف ظهور اللون الأبيض الناصع. ممكن كمان مع التشكيل نلف الحواف هاي مع أداة التكشيل، لكن بالنسبة لرأيي الشخصي بحب تلوين الأطراف بيعطي الشغل تدرجات وتظليل بشكل حلو

الطريقة الثالثة: الصلصال الهوائي 

هاي الطريقة نسختين من التصميم الواحد. وإزا حبينا نطبع التصاميم الخاصة فينا طباعة، بتحتاج معرفة بسيطة ببرامج تعديل الصور، وصلصال هوائي أبيض (الصلصال اللي بينشف بالهوا). أول إشي بنعمله إنه بندكبج سطح العمل بشكل عادي وإعتيادي بنسخة من التصميم اللي بدنا ياه وبنخليه ينشف. تمام، هلأ أي جزء بدنا ياه يكون بارز من التصميم (مثلا وردة معينة، سياج معين، نافذة/شباك معين أي جزء بدكم ياه من التصميم) بنغطيه بقطعة من الصلصال الهوائي بشكل يناسب التصميم. مثلا، لو وردة بالتصميم، على كل بتلة بناخد جزء من الصلصال وبنوزعه على بحيت يتشكل على شكل البتلة اللي بالتصميم، هيك لنخلص كل بتلات الوردة وبنخلي الصلصال ينشف تمام. من النسخة التانية من التصميم، بنقص الجزء اللي إخترناه، وبندكبجه فوق الصلصال مباشرة

لازم ندير بالنا هون، يكون سطح الصلصال أملس قد ما نقدر ونشكله بشكل يناسب التصميم اللي عليه من إنحناءات وتعرجات. وكمان إنه سمك الصلصال ما يكون كتير، عشان كل ما كان الصلصال أسمك رح يكون الجزء المقصوص من النسخة التانية من التصميم غير كافي يغطيه ورح يظهر الصلصال من تحته. فنحاول يكون الصلصال بسماكة متوسطة

ممكن نحل المشكلة هاي، بمعرفة بسيطة ببرامج تعديل الصور، ونطبع التصميم اللي بدنا ياه طباعة عوض ما نستخدم ورق جاهز. أو إستخدام بسيط للألوان (نلوّن التصميم بألوان مناسبة)

أنا اللي بعمله مثلا، بطبع نسخة من التصميم بالحجم المطلوب، بدكبج، وبعد ما أقرر الأجزاء اللي بدي أضيف عليها الصلصال، بالبرنامج اللي بستعمله (فوتوشوب حبيب الجماهير) بفصلها وبكبر حجمها تقريبا 10 – 15 % حسب التصميم. هيك ممكن أزيد من سماكة الصلصال لأحصل على تأثير أبعادي أكتر. بس هون رح تحتاجوا متل ما قلتلكم تطبعوا الورق الخاص فيكم وشوية معرفة برنامج تعديل إيش ما كان

الطريقة الرابعة: تعدد الطبقات

شخصيا أنا ما بحبها كتيرلهاي الطريقة لكن من باب العلم بالشيء

رح نحتاج 3 – 4 نسخ من التصميم نفسه (بنفس الحجم). النسخة الأولى بندكبجها بحجمها الكامل على قطعة العمل، والنسخة التانية بناخد جرء أصغر من التصميم، بنضيفه لسطح العمل فوق الجزء المماثل من التصميم على قطعة العمل (ممكن نضيفه بإستخدام اللزيق أو اللاصق الفوم، اللي بيكون سميك). هيك بتكون النسخة التانية مرتفعة عن النسخة الأولى. ممكن نستعمل سيليكون ساخن أو حتى بارد بس رح يطوّل لينشف معنا. أي لاصق ما دام بيعطينا ارتفاع ما بين الطبقات.  أنا بفضل الفوم لأنه بيعطينا ارتفاع موحّد ومنظّم دون أي تكتلات

النسخة التالتة، بنقص جزء أصغر من النسخة التانية وبنكرر الخطوات (بنضيفها فوق الجزء المماثل من التصميم على قطعة العمل) وهلم جرا حتى نخلص عدد النسخ الموجودة عنا. ممكن نثني أطراف الأجزاء المقصوصة حتى نخفي اللاصق الفوم أو اللاصق اللي إستخدمناه. ممكن كمان حتى نقص الأجزاء المطلوبة من التصميم بنفس الحجم بدون تصغير، بيرجع إالكم

لهاد النوع من الديكوباج بتلاقوا كتير تصاميم جاهزة وسهل تحصلوا عليها وتطبعوها وتشتغلوا عليها، بس إستخدموا مصطلح

3D decoupage sheet

وبتلاقوا كم هائل من التصاميم

هيك حكينا عن أشهر التأثيرات، ودخلنا كمان بالديكوباج الثلاثي الأبعاد. والحلو فيها إنه ممكن نخلط وندمج تأثيرات الديكوباج ثلاثية الأبعاد مع التأثيرات التانية وحتى مع بعض لتعطينا نتيجة نهائية أحلى. بس نخلي ببالنا تصميم قطعة العمل بشكل عام، وما نخلي شغلنا معجق أو مش متناسق بحيث يضيع تعبنا

ومتل ما قلتلكم، ممكن يصير معنا تداخل بين الخطوة هاي (التأثيرات النهائية) والإنهاء (الفينيشنج) لكن حسب خطوات المشروع وشو بيحتاج رح تصيروا مع الممارسة تعرفوا كيف تبدلوا بين الخطوتين بحيث يكون أفضل لشغلكم وأسهل عليكم

إن شاء الله المقالة القادمة رح تكون عن الإنهاء، وبهيك رح تكون أساسيات الديكوباج جاهزة عندكم، والمبادئ والحثيات والبتاع كله عندكم. بعدها رح نصير نعمل مشاريع كاملة، نبلش فيها من الصفر ونطبق الأساسيات اللي صرنا كتير بنحكي فيها 

نسأل الله الفائدة لنا ولكم <3