مشروع سريع – صندوق مزخرف

السلام عليكم و رحمة الله وبركاته

المشروع هاد خفيف لطيف، ما بده غير ساعة تقريبا, و مواده سهلة و بسيطة و بتقدروا تستعملوا إي إشي موجود عندكم من زينة و إضافات

المواد المطلوبة

الصندوق الخشبي – أنا أخدته من مكتبة جرير، بس فيكم تلاقوا منه بمكتبة سمير و غسان و المكتبات الكبيرة، بأشكال تانية و أحجام مختلفة.

الألوان الأكريليك – أي لون من إختياركم و أي نوع. أنا أخترت اللون الزهري الهادي اللي رح تشوفوه بالصور.

الورد – أي ورد إصطناعي موجود عندكم، ممكن يكون جاهز إشتريتوه، أو ممكن إنتوا عملتوه من أي مادة و بأي طريقة. موجود تشكيلة واسعة و كبيرة من الورد الإصطناعي بعدة محلات بتشكيلة واسعة و كبيرة. أنا إستعملت ورد ورقي أنا عملته بعدة تصاميم مختلفة. و لا تنسوا العروق و الأوراق الخضرا عشان جمالية التصميم النهائي

أي زينة إضافية إنت بتحبوا تضيفوها حسب التصميم اللي بدكم تعملوه.

و رح تحتاجوا مسدس سيليكون ساخن، و فرشاية لألوان الأكريليك.

تمام، هيّا بنا نلعب… قصدي نشتغل

الخطوة الأولى

 رح تكون  بدهان الصندوق. رح نفك أي تسكيرات أو أقفال و مفاصل موجودة عالصندوق و ندهن الصندوق باللون اللي بدنا ياه. بتقدروا تأسسوا الصندوق بالجيسو أول إشي، بس انا اختصرت المواد و الخطوات و مباشرة دهنت بالأكريليك (ثلاثة طبقات تقريبا عشان يكون اللون موّحد و راكز) 

بندهن الجوانب و حفف الصندوق. أنا اخترت ما أدهن الصندوق من جوا و أخليه بلونه الأصلي. 

الخطوة التانية

رح نبلش بتنسيق الورد أو الإضافات. هاي الخطوة بترجع للذوق الشخصي و حسب شو عندكم إضافات و زينة متوفرة. 

الخطوة التالتة

بنثبت الورد و الإضافات بالسيليكون الساخن، و الشبر إزا استعملتوه متلي.

بنرجع التسكيرات و المفاصل و كل شي تاني قمناه قبل الدهان.

الخطوة الرابعة

هاد إختياري – بنزين الغطاء من الجهة الداخلية 

بس…هظنّا هو – هاد هو الموضوع كله. 

خفيف لطيف متل ما قلتلكم. 

إن شاء الله بتلاقوا طريقة صنع الورد (و الباترونات الخاصة فيهم) اللي إستعمله و إستخدمته بالمشروع هاد عندي بالموقع أو بقناة اليوتيوب.