Artistic Resin نوع ريزن جديد

تغيير قماش كراسي المطبخ و برداية بسيطة
مارس 20, 2020
مشروع خفيف لطيف لرمضان
مايو 17, 2020

السلام عليكم و رحمة الله و بركاته

 

هالمرة رح أحكيلكم عن نوع جديد من الريزن اللي لقيته محليا. أو بالأحرى لقوني هم.

تواصلوا معاي صفحة (Mall All Jordan) و عرضوا علي تجربة النوع اللي موجود عندهم، و بعتولي عينة من الريزن، و الألوان الكحولية المتوفرة عندهم. جننتهم أسئلة و بتشكرهم كتير اللي جاوبوا كل أسئلتي و وفرولي المعلومات اللي طلبتها. ف رح أحكي عن الريزن اللي أستخدمته من عندهم، و الألوان الكحولية بعدها.

الحلو بالموضوع، متوفر عندهم (Data sheet) للريزن المخصص عندهم، و ممكن يجاوبوكم على أي أسئلة ممكن تتواصلوا معهم عشانها و أغلبها تم إجابتها على موقعهم. و هلأ إلهم موقع موجود عليه منتجات تانية بيوفروها بأسعار متفاوتة (رح أحط روابط منصتهم الإجتماعية كاملة كمان شوي).

https://www.mallalljordan.com/

https://www.facebook.com/mallalljordan/

 

 

 

مصدر الريزن = من وين جبت الريزن

الخاصية

شو قصدي فيها

 

ملاحظات

السعر

تكلفة الكيلو من الريزن بالدينار الأردني

17 دينار

(عنده عروض ف ممكن يكون السعر إختلف حسب العرض)

المصلب والريزن

التوّفر

مدى سهولة شراءه

سهل – متوفر محليا

 

نسب الخلط

كميات ونسبة خلط المكونات

1:2 حسب الحجم

65% ريزن ل 35% مصلّب حسب الوزن

 

سهولة الخلط

قديش سهل نخلط المكونات

سهل جدا

 

الحرارة الناتجة من الخلط

أثناء الخلط، هل يسخن الخليط؟

أنا خلطت 100 غم، أبدا ما كان في حرارة

ممكن إزا خلطنا كميات أكبر يكون في إرتفاع بدرجات الحرارة نوعا ما.

الرائحة

الرائحة اللي بتكون عندي للريزن بشكل عام وخصوصي عند الخلط

كان في رائحة نوعا ما

مش قوية، لكن يمكن ملاحظتها نوعا ما بدون القناع التنفسي

الفقاعات

كمية الفقاعات الناتجة وحجمها

قليل جدا.

 

سهولة التخلص من الفقاعات

التخلص من الفقاعات بطرق مختلفة

جدا سهل.

الجو كان دافي، و خلطت الريزن مباشرة دون أي تهيئة (مثل وضعه بماء دافىء قبل الشغل)

اللون

اللون الناتج بعد ثبات الريزن وبعد ما ينشف

شفاف

 

الوقت المتاح للعمل

قديش معنا نشتغل بالريزن بعد خلطه مع المصلب قبل ما يصير يعطينا خيوط

يعني ما بين 25 دقيقة ل 35 دقيقة

ممكن أقل لحد أقصى 25 دقيقة عند إستخدام الإضافات و الملونات المختلفة

سرعة الثبات

الوقت اللي بيحتاجه لينشف ويصير جامد/ناشف

تقريبا 6 ساعات كتصلب إبتدائي

24 ساعة للتصلب الأولي

إنه التصلب الأولي أقدر أتعامل مع القطعة بحذر و أقيمها من القالب (ممكن يصير معي آثار أصابع و بصمات)
و التصلب الأولي اللي هو القطعة تكون صلبة بشكل كامل.

الملمس النهائي

طبيعة القطع والسطح الناتج

أملس و قاسي

 

التزيين

هل ممكن إضافة القطع البلاستيكية أو الزينة أو الجليتر

نعم

 

التلوين

هلأ ممكن تلوينه؟ قبل أن ينشف؟

نعم

ألوان كحولية، ألوان أكريليك، ألوان زجاج، ألوان بودرة وألوان مخصصة كله كان بنتائج ممتازة

القولبة

ممكن نستخدمه بقوالب؟ هل ممكن صبه بقوالب؟

نعم

ممكن يصير شوية فقاعات مع القوالب العميقة و اللي فيها تفاصيل كتير.

الصب

هل ممكن صبه كطبقة على سطح معين

نعم

 

التكوّر أو التقعر

بالقوالب - سطح القطع الناتجة عن القوالب – الجهة المقابلة للشكل الناتج/ظهر القطعة

نعم في تقعّر

إنه سطح القطعة الخلفي من القالب بيكون في تقعر، ف ممكن يعطي أطراف خلفية بارزة. ممكن وقت الصب بالقالب نزيد الكمية شوي و نتخلص من المشكلة هاي جزئيا.

التكوّر أو التقعر

دون قوالب

خفيف

بيفرد لأنه سيولته متوسطة نوعا ما أكتر منما يتقبب
Doming effect – weak

Self-leveling

بعد صب كمية من الريزن على سطح مستوي، هل يتوزع على شكل طبقة متساوية أو يتكتل/يتجمع بأماكن معينة؟

نعم

بشكل سهل جدا

الدهن بالفرشاية

هل ممكن دهنه بالفرشاية؟

لا

بيصير يتجمع بمناطق و ما بنقدر نفرده على المساحة المطلوبة بشكل طبعة رفيعة

التخفيف

هل ممكن تخفيفه (بإستخدام التنر)؟

نعم

 

الدهن بالفرشاية بعد التخفيف

هل ممكن دهن الخليط الناتج بعد التخفيف

نعم

و أعطاني نتائج كتير حلوة

مقاوم للماء

ضد المي والبلل بعد ما يجمد؟

نعم

 

مقاوم للحرارة

بعد ما يجمد وينشف تمام، هل القطعة مقاومة للحرارة غير المباشرة؟

قيد التجربة

لأنه أنا عادة بقوم بتجربة إحتمال الحرارة بعد 3، 7 و 21 يوم من الصب، لسه قيد التجربة هاي النقطة.

ملائم للأغراض الغذائية

أي إنه يلامس السوائل و الأغذية بشكل مباشر

لأ للأسف

لكن مناسب لملامسة البشرة و أغراض الإكسسوارات على سبيل المثال.

 

هلأ، من أكتر الأشياء اللي حبيتها – اللواصق التحذيرية على العلب، و التعليمات الواضحة. شفافيته عالية، لمعته النهائية جيدة.

و أكتر أكتر إشي جد كيفت عليه، إنه يعد التخفيف مع التنر قدرت أدهنه بشكل طبقة رفيعة جدا جدا رح تشوفوا نتائجها قريبا إن شاء الله. ف بأمور الديكوباج و السكراب بوكنج هاد الإشي جدا مفيد و رائع.

 

من الأشياء اللي ما حبيتها – العلب شوي صعب كان نصب منها الريزن بشكل مباشر. لأنه فتحتها كبيرة ف صعب نتحكم لو بدنا كمية صغيرة. بس العلبة طرية و ممكن نتغاضى عن هاي النقطة بالضغط عليها.

الرائحة – يعني ممكن الناس اللي بيتأثروا بشكل سريع من الروائح يتضايقوا منها (ممكن حتى تتسبب بصداع لا سمح الله) ممكن التخفيف من هاي النقطة بإستخدام القناع التنفسي (اللي هو لازم أساسي بشغل الريزن الإيبوكسي). 

 

الألوان الكحولية – دورها إجا هلأ. لاحظت بس تنترك الألوان بتترسب الصبغة/البودرة بأسفل العبوة، ف لازم نخضها/نهزها بشكل منيح قبل الإستخدام. كملوّن للريزن ممتازة. لكن ما أعطتني النتيجة المرجوة من الأحبار الكحولية. هلأ ممكن يكون السبب بيرجع إنه ما كان عندي اللون الأبيض منها (و عادة هو ما يستخدم لترسيب الصبغات بالريزن عشان نحصل على التأثير المطلوب) ف إن شاء الله بالمستقبل رح أطلب اللون الأبيض من عندهم و أرجع أجرب و أشوف كيف بيكون الموضوع.

و هيني إن شاء الله عم أطبّق كزا مشروع و كزا فكرة و رح أشارككم فيها باقرب وقت إن شاء الله.