الإنهاء

الإنهاء

الخطوة الأخيرة في رحلة الديكوباج. بعد ما خلصنا كل الإضافات و الخطوات اللي قررنا نضيفها للقطعة، رح تيجي خطوة الإنهاء، و اللي بنقدر نحكي إنها خطوة الحماية

إنهاء القطعة يعني حمايتها من عوامل الزمن، (تغير الألوان أو بهتانها)، الغبار، الرطوبة أو الماء على سبيل المثال

و بيعتمد إختيار الطريقة اللي رح نحمي فيها القطعة على مدى إستخدام القطعة نفسها، و على الإضافات الموجودة على القطعة نفسها. يعني إنهاء قطعة فنية رح يكون غير عن إنهاء صينية على سبيل المثال. و إنهاء قطعة فيها طبقات و إضافات ثلاثية الأبعاد غير عن إنهاء قطعة الشغل فيها طبقة وحدة

كله رح يعتمد على القطعة نفسها و الغاية/الغرض منها

بشكل عام، الإنهاء بيكون برش أو دهان طبقة أخيرة من مادة عازلة على قطعة العمل

السؤال القوي: شو هي هاي المادة؟ رح أحكيلكم، بس بدكم تطوّلوا بنطلونكم (بالكم) علي شوي

حسب قطعة العمل متل ما حكينا رح تكون مادة الإنهاء و إختيارها،و هون عنا عدة خيارات (الأكثر إستخداما في مجال الديكوباج، أي لا تقتصر لائحة المواد على المودا التي ستذكر، بس اللهم هاي الخيارات هي الأسهل و الإكتر شيوعا في الإستخدام)

غرا الديكوباج – الورنيش أو اللكر – الريزن

نبلش/نبدء بأول و أسهل واحد

غرا الديكوباج

نعم، ممكن إستخدام غرا الديكوباج. بندهنه على الأقل 3 طبقات على القطعة بعد ما نخلص الشغل و الدكبجة. بس إلها محاسن و مساوىء

محاسنها: من أسهل و أرخص الطرق للحماية. الغرا موجود و سعره جدا طري (في الخصوصي للديكوباج أو الغرا البديل اللي تعلمنا كيف نعمله). دهانه سهل و ما إله أي روائح قوية لما ندهنه

بس المساوئ … وآخ من ال – بس هاي

أول إشي: حمايتها ضد أشعة الشمس ضعيفة، و مع الوقت رح تصفّر عندي و تتغير الألوان، خصوصي إزا كانت القطعة بتتعرض لأشعة الشمس بشكل مستمر. بعرف بعرف منكم رح يحكي هاي القطعة عملتها هيك و صارلها زمان و ما تغيّر لونها…أنا ما عم أحكي عن يوم أو يومين، تغيّر اللون رح ييجي تقريبا تدريجي (ف ما رح نحس فيه بشكل كبير) و بعد فترة زمنية بتعتمد على عوامل كتير بس بعد ما يقارب السنة (حسب جودة الغرا، مدى التعرض اليومي للشمس و هيك)

تاني إشي: حمايتها ضد الرطوبة و الماء معدومة – ماشي، مش معدومة للمتفائلين منكم – لكنها ضعيفة جدا. هاي الخاصية بتهمنا كتير من ناحية التنظيف و من ناحية التعامل مع الماء. ممكن إزا إجا علي القطعة مي رح تتفاعل طبقة الغرا مع الما و تحوّر (يصير لونها أبيض أو حليبي) و يخرب عندي منظر القطعة. ممكن إزا كنا مشتغلين على كاسة مثلا، و غسلناها، تروح طبقة الغرا و توصل المي للورق و حتى ممكن ينقام الشغل كله عن الكاسة. في نوع معين من ماركة (مود بودج) بيكون ملائم للإستخدام في الجلايات.

Dishwasher safe

هاد النوع نعم أثبت قدرته على ممانعة الماء، بس لازم نترك القطعة اللي أنهيناها لمدة لا تقل عن 28 يوم حتى يوصل الغرا لمرحلة التصلب الكامل (ضمن شروط تانية). لكن على الأغلب، أغلب أنواع الغرا اللي ممكن نستعملها ممانعتها ضعيفة جدا للماء

(رح أحكي بشكل منفصل إن شاء الله عن شروط و خطوات المحافظة على القطع المدكبجة بمقالة و فيديو منفصل لكل الأسئلة المتعلقة بتنظيف القطعة)

تالت إشي: طبقات الغرا المتلامسة (الناشفة) بتدبق و بتلزق ع بعض. كيف يعني؟
تخيلوا معي صندوق، إشتغلتوا عليه و خلصتوه و دهنتوه غرا كمادة حماية. سكرتوه و حطيتوه منظر عندكم عالمكتب. بعد فترة، إزا حاولتوا تفتحوا الصندوق، رح تلاقوا الغطا ملزق بالصندوق و صعب ينفتح. صار معكم هيك بشكل أو بآخر مو؟

هاد الإشي بيصير لأنه الغرا من الطبقات المختلفة بيرجع يلتصق مع بعضه خصوصي بالأيام اللي بيكون فيها الجو شوب أو رطوبة عالية

رابع إشي: مافي حماية ضد الحرارة. يعني ما بنقدر نستعملها مع الصواني اللي رح نحط كاسات ساخنة عليها

الغرا بيرجع يتأثر بالحرارة و بيصير يدبّق و الكاسات تلزق و تترك أثر دائري على قطعة العمل

في كتير إدعاءات بتحكي إزا تم (خبز القطعة في الفرن على درجات حرارة منخفضة لفترة زمنية معينة) إنه الغرا رح يصير مقاوم للماء و الحرارة و ما رح يتأثر. متل ما حكيت، إدعاءات. نعم صحيح رح تزيد صلابة الطبقة، و رح تزيد ممانعتها للماء، بس لفترة أطول و بعدها ترجع تتأثر. غير إنه مش كل قطع العمل بقدر أحطها بالفرن لتنخبز، و غير إنه الغرا بيضله مادة كيميائية بيطلق روائح و أبخرة ما بينفع تضلها بالفرن العادي اللي بنستعمله للطبخ و الإكل (ممكن تقدروا تعملوا هيك في حال كان عندكم فرن منفصل للأغراض الحرفية، بس كمان مش رح تقدروا تعملوا هيك مع كل قطع العمل، مثلا المصنوعة من البلاستيك أو الخشب على سبيل المثال)

طيب، بعد كل هاي النقاط، متى بنصح بإستخدام الغرا كطبقة إنهاء؟

في حال كانت قطعة الشغل، قطعة فنية. يعني لوحة رح تتعلق بالبيت (بعيد عن أشعة الشمس المباشرة). قطعة ما فيها تعامل مستمر (مش صندوق كتير الإستخدام مثلا). شغل تمشاية حال يعني و كمستوى مبتدئ أو متوسط خلينا نحكي. و ما يتم التعامل مع القطعة قبل 7 أيام (أو حسب نوع الغرا 20 يوم) بعد دهان طبقات الغرا

تمام، بنقدر هلأ نحكي عن الخيار الثاني من مواد الإنهاء

الورنيش أو اللكر

الورنيش أو اللكر – لأ مش نفس الإشي هدول الإثنين. الورنيش إشي, و اللكر إشي تاني. مع إنه بيأدوا نفس الوظيفة من حيث المبدأ، لكن الإختلافات موجودة من حيث التركيبة و المواد، طريقة التطبيق، درجات الحماية و درجات اللمعان النهائية و غيرها كتير أشياء

الخلاصة – نحنا بمجال الديكوباج، بنستعمل (ورنيش). ممكن إستعمال اللكر، لا تفهموني غلط، لكن، كسهولة و توفر أكتر بمستويات منزلية حرفية، الورنيش هو اللي رح نركز عليه

تمام، الورنيش قسمين

الأول مائي (أي إنه أساسه مائي، يتم تخفيف بالماء)

التاني مش مائي (أي إنه أساسه مواد تانية متل المذيبات، لا يمكن تخفيفه بالماء)

الورنيش المائي حتى كتير من الناس ممكن يستعملوه كبديل لغرا الديكوباج بمرحلة الدكبجة (إنه يلصقوا فيه الورق و يشتغلوا فيه) لكن أنا من الأشخاص اللي ما بحب نتائجه بمرحلة الدكبجة. فقط بستخدمه لمرحلة الحماية و الإنهاء

متى نستخدمه؟ نفس إستخدام غرا الديكوباج. و بيعطينا حماية أفضل من الغرا