هاي المرحلة رح نحكي فيها عن كيفية تأسيس وتجهيز قطعة العمل لعملية الديكوباج/الدكبجة. رح نحكي خطوات تنظيف وتحضير قطعة العمل لتكون جاهزة للمباشرة بعملية الدكبجة والخطوات هاي بتعتمد على طبيعة مادة قطعة العمل. يعني تجهيز = تحضير وتأسيس = معالجة سطح قطعة العمل بأفضل طريقة لتتحمّل مواد وخطوات الدكبجة وآثار الزمن والوقت (وماننسى التنظيف والشمس والعوامل التانية)
رابط الفيديو الخاص بهاي المرحلة بأسفل الصفحة
متل ما بيعرف الأغلبية، نحنا ممكن نستخدم أو نختار أي مادة أو قطعة عشان ندكبج عليها (نشتغل عليها ديكوباج) ومجموعة المواد المتاحة كبيرة وواسعة، لكن نحنا رح نختار المواد الأكثر إستخداما بأعمال الديكوباج وهي
الخشب الزجاج المعدن القماش
ومع إنه القاعدة الأساسية في إختيار قطعة العمل (البعد عن البلاستيك أو أي شيء مصنوع من البلاستيك) رح نحكي عن طريقة تجهيز وتأسيس البلاستيك
نحنا مش محددين بالمواد اللي ذكرناها، فقط متل ما قلتلكم هي من أكتر المواد المستخدمة في عنا كتير مواد وخيارات تانية (منها الصابون، الشمع، البيض، الكرتون السميك و حتى الحائط وهلم جرا)
عملية التجهيز هي ببساطة تحضير قطعة العمل وتنظيفها للبدء بالعمل والدكبجة. بإختلاف المادة بتختلف خطوات التجهيز والمواد المطلوبة، رح نحكي عنها بالتفصيل لقدام شوي. لكن بالأساس متل م حكينا هدفنا تحضير سطح العمل وتنظيفه ليصير مناسب وجاهز لعملية التأسيس
التأسيس هو أول الخطوات التطبيقية لعملية الدكبجة، بمعالجة سطح قطعة العمل (المجهّز) حسب مادته وتحضيره ليكوّن أقوى الروابط بين سطح العمل وغرا الديكوباج او الدهانات والمواد التانية المستخدمة بعملية الديكوباج. وسبب تاني لتأسيس قطعة العمل هو إعطاء المجال لتلوين قطعة العمل بشكل أسهل وإظهار ملامح ورق الديكوباج وتفاصيله بشكل أوضح. في أغلب الأحيان يتم التأسيس باللون الأبيض ( وبهاد اللون بتظهر تفصيل الورق بشكل ممتاز).
أكتر مادة ممكن سمعتوا فيها للتأسيس بمجال الديكوباج هي مادة الجيسو
Gesso
إيش هو الجيسو؟ بدون ما ندخل موضوع التركيبة الكيميائية وشو التركيبة وغيره بشكل مفصل، رح نحكي بشكل بسيط
مادة (عادة بيكون لونها ابيض لكن متوفر الأسود والشفاف وحتى الملون)، طبيعتها تشبه طبيعة دهان الأكريليك (كأقرب مثال) وممكن أستعمل الفرشاية أو الإسفنج عشان أدهنها. الجيسو بيتكون من مواد كتير منها حبيبات ناعمة وصغيرة جدا مع مادة رابطة وأصباغ. الحبيبات هاي لما ينشف الجيسو (أو طبقة الجيسو اللي دهناها) رح تحسوها نوعا بتعطي ملمس طبشوري. الملمس أو الخشونة هاي بتمنح غرا الديكوباج القدرة على التمسك وتكوين رابط قوي مع الجيسو بالتالي سطح العمل (بأبسط كلمات = ما يفلت الغرا أو ألوان الأكريليك وبالتالي الورق عن سطح العمل) وذلك حسب سطح العمل. والحبيبات هاي بنفس الوقت بتعمل على إغلاق أي مسامات ممكن تكون موجودة بقطعة العمل (بشكل أساسي الخشب) وتحمي السطح من إمتصاص أي سوائل أو رطوبة موجودة بالألوان أو الغرا. بالتالي ممكن ألوّن سطح العمل بعدد أقل من الطبقات لأحصل على تغطية كاملة لأن الخشب أو سطح العمل مش عم يمتص اللون أو الدهان
رح أذكر عدد من الأسئلة اللي بسألوني ياها كتييييير وبشكل متكرر، مع الإجابات المختصرة ع قد ما أقدر
ليش أستخدم الجيسو؟
عشان غرا الديكوباج أو دهان الأكريليك يلصق/يمسك/يثبت على قطعة العمل بشكل أفضل ونستخدم كمية أقل من الألوان
كيف أستخدم الجيسو؟
بدهنه كأني بدهن ألوان أكريليك. فرشاية أو إسفنج على شكل طبقة موحدة ومتساوية
لازم أستعمل الجيسو؟
آ ولأ (نعم ولا). بيعتمد على المادة اللي بتتكون منها قطعة العمل والتصميم المطلوب (رح نحكي بالتفصيل إن شاء الله لبعض المواد كمان شوي بالمقالة) لكن مثلا الخشب لأ مش لازم (بس رح نحتاج ندهنه بعدد أكبر من طبقات الأكريليك لنحصل على تغطية أفضل)، البلاستيك نعم لازم، الزجاج ممكن آه ممكن لأ. مع الشغل والتجربة بتقدروا تحكموا أحسن.
وين بلاقي الجيسو؟
المكتبات الكبيرة، ومحلات الفنون ولوازم اللوحات والرسم. أصلا واحدة من إستخدامات الجيسو الأساسية هو تأسيس/تمهيد اللوحات – الكانفاس- قبل الرسم. بالأردن، في عند مكتبة سمير وغسان (قريب من السابع)، مكتبة جالاكتيكم شفا بدران، قرطاسية الشرق الأوسط بمنطقة طارق. بالسعودية موجود عند جرير، مكتبة كوريو، موقع نرسم (هاد الموقع أتمنــــــــــــــــــــــــــى لو كان يشحن للأردن) كأمثلة أخرى. يا ريت لو تعرفوا وين متوفر عندكم ببلدكم تبعتولي وتحكولي بلكي صار عنا لائحة بالإماكن هاي ونتشاركها لتعم الفائدة
هل بيفرق الجيسو بإختلاف المصنع أو الماركة؟
كل الطرق تؤدي إلى روما، بس في طرق مريحة وطرق مليانة مطبات. يعني: كلهم نفس الإشي، كلهم جيسو ورح يؤدوا نفس الوظيفة، لكن عنا إختلافات في الكثافة/السيولة أو الخشونة أو كمية المادة الرابطة أو اللون/الخضاب. ف رح يعتمد أكيد على غاية شغلكم وطبيعته وآرائكم الشخصية
بدكم تجهزوا لوحة كانفاس؟ بدكم جيسو قليل الكثافة نوعا ما. شغلكم سكراب بوكنج؟ بدكم متوسط الكثافة. ميكس ميديا (الوسائط المتنوعة/المتعددة)؟ رح تحتاجوا جيسو كثيف.
للديكوباج أفضل الأنواع اللي بتكون متوسطة الكثافة (طالما مش مكتوب على وعاء أو علبة الجيسو (Heavy or light) أموركم تمام وللمهتمين أكتر بهاد الموضوع يبعتولنا إيميل وبنتحاكى إن شاء الله وبنجاوب أي إستفسار
ممكن أصنع بديل منزلي/يدوي للجيسو؟
نعم، ورح نعطيكم 5 بدائل للجيسو إن شاء الله، بأقرب النتائج اللي ممكن تحصلوا عليها بإستخدام الجيسو الأصلي
بدائل الجيسو
البديل رقم واحد – الجاهز – دهان الأملشن
بالإنجليزي
Emulsion Paint
عنا بالأردن بيحكوا عنوا دهان الأملشن، متوفر بمحلات مواد البنا ومش مكلف ومتوفربألوان متعددة (حتى الأسود). العلبة اللي أشتريتها فيها 0.9 ليتر وتكلفتها 4 دينار أردني….ممكن نستعمله كما هو مباشرة من العلبة، بندهنه إما بالفرشاية أو الإسفنجة أو ممكن نعّدل عليه شوي ليعطينا نتائج مختلفة. وعشان تعرفوا إزاالنوع الي عندكم بيناسب أو لأ (حسب المتوفر عندكم أو كنتم بالمحل وقدامكم خيارات كتيرة وأحترتوا) في 3 كلمات أو مصطلحات أساسية لازم تكون مكتوبة عالعلبة
Water based – Acrylic – Latex
يعني – أساس مائي – أكريليك – بلاستيكي (بعض الدهانات أو الماركات الأمريكية بيستخدموا كلمة بلاستيكي بدل أكريليك) وإزا 2 من هدول 3 مصطلحات موجودين على الأغلب النوع اللي عندكم مناسب
ممكن أخففه بالموي – ونسبة الموي للتخفيف بتكون موجودة على العلبة تاعت الدهان ما نزيد عليها– والملمس النهائي لهاد الدهان عادة رح يكون أملس كتير، نوعا ما متل ما بينشف دهان الأكريليك لكن ع أطفى شوي (لمعته أخف من الأكريليك)
ممكن أضيف عليه الغرا الأبيض – نفس المقدار من الإثنين – رح يكون القوام كثيف جدا وممكن أستخدمه بدل الجيسو الكثيف للي بيحتاجوه لمشاريعهم وشغلهم. وممكن أتحكم بالكثافة هاي بإضافة الموي وتخفيف الخليط
إزا كنتوا حابين ملمس طبشوري (يكون في سن للطبقة بس تنشف)، ممكن تضيفوا بودرة الأطفال على الخليط السابق (الدهان و الغرا مع الموي) بيعطيكم ملمس طبشوري ناعم نوعا ما
ليش ما نستعمل دهان الأملشن بشكل دائم؟ السبب بيرجع لرائحته النوعا ما قوية – لازم و إنتوا عم تشتغلوا يكون تهوية جيدة، ممكن بعض الأشخاص يتحسسوا أو يتضايقوا من رائحته
البدائل الأخرى – خلط مادة لاصقة + لون+ حبيبات
متل ما حكينا، الجيسو مكون من مواد كتير لكن المكونات الأساسية اللي رح نركز عليها بشكل أساسي عند صنع أو إيجاد البادئل هي
مادة رابطة – حبيبات (أو مادة مالئة بس خلينا ع كلمة حبيبات أسهل) – لون
المادة الرابطة = أو بكلمات تانية مادة لاصقة – ممكن نستخدم الغرا الأبيض ومتوفر بكل محل. لكن لنتائج وبديل أفضل يفضّل إستخدام ما يعرف بال
Matt medium
الوسيط المطفي/دون لمعة، لكن مشكلته إنه أغلى بالسعر. موجود بمكتبات الفنون ولوازم الرسم والمكتبات الكبيرة (بالأردن بتلاقوا عند سمير وغسان). ما لقيتوه؟ ماله الغرا الأبيض؟ والله منيح وممتاز
اللون = بقدر أحصل عليه بإستخدام ألوان الأكريليك – الأبيض للجيسو الأبيض، وأي لون للجيسو الملوّن
الحبيبات = بقدر أحصل عليها بإستخدام مادة حبيباتها ناعمة – كل ما كانت أنعم كل ما أفضل. وإزا كان لونها أبيض أحسن وأحسن
أفضل المواد الممكن إستخدامها للحبيبات ثاني كربونات الكالسيوم – ديروا بالكم، كالسيوم مش صوديوم –
Calcium bicarbonate
بودرة بيضاء اللون تتوفر غالبا بمصانع الإسمنت (عنا بالأردن مثلا) أو ممكن محلات الزراعة و مستلزماتها. لكن من الصعب الوصول إلها (وصحيح بتقدروا تطلبوها عبر الإنترنت من موقع أمازون). عشان هيك في خيارات تانية ممكن نستخدمها
الخيارات المتوفرة عنا = النشا، البيكنج صودا، بودرة الأطفال، الطبشور المطحون
الطريقة والكميات/المقادير
رح أحكيلكم عن طريقتي الشخصية (في طرق كتير ووصفات كتيرة وخلطات أكتر عالإنترنت لكن هاي طريقتي ووصفتي اللي استعملتها شخصيا)
بضيف كميات متساوية من الغرا ولون الأكريليك في وبخلطهم منيح (إزا حابين كميات كبيرة أو صغيرة ما بيفرق حسب شو إنتوا بدكم). إزا لقيت الخليط كتير كثيف بخففه بشوية موي (مش كتير). بعدين بضيف عليهم الحبيبات (أيا كان إختياري) شوي شوي حتي أوصل الكثافة اللي بدي ياها. إزا رجع الخليط كتير كثيف ومش قادرين أخلط المواد بشكل جيد بنقدر نرجع نخففه بالموي لكن مش كتير (حتي يصير تقريبا متل كثافة لون الأكريليك وهو لوحده) أو إزا بدكم ياه كتير كثيف بنضيف كمية أكبر من الحبيبات (لقدام رح أحكيلكم عن بدائل معجون التشكيل والدهان الطبشوري إن شاء الله لأن طريقة بدائلهم كتير مشابهة بس ببوست/فيديو منفصل). ممكن تخلطوا كمية معينة وتحفظوها بمرطبان زجاجي أو وعاء بلاستيكي (إله غطاء محكم) ودائما دائما قبل الإستخدام نحرك المكونات لأنه مع الوقت بتترسب الحبيبات بأسفل الوعاء فعشان نرجع نوزعها بشكل متساوي
في كمان خيار متوفر للحبيبات – الجبصين/ الجبس: ما بنصح فيه بالمرة، بس ينشف من السهل يتكسر وممكن بيصّفر مع الوقت وبينشف بسرعة – الخليط نفسه داخل وعاءه بينشف بسرعه ف بيصير يتكتل/يكلكع أثناء الدهان. في كمان مادة بيجوز سمعتوا عنها كتير
Plaster of Paris
نوع معين من الجبصين ما لقيت منه محليا، ممكن تستعملوا هاد (بنفس الطريقة السابقة) لنتائج جيدة، لكن الجبصين العادي ما بيعطي نتائج جيدة أبدا أبدا
بتتفاوت النتائج حسب المادة المستخدمة، الطبشور المطحون البيكنج صودا – أو صودا الخبز أو بما يعرف أيضا بكربونات الصوديوم – بتعطينا ملمس نهائي خشن (بعد ما تنشف طبقة التأسيس اللي دهناها)، النشا أفضل نوعا ما، لكن ما بفضّل إستخدامه (ولأ ما بيفرق إزا نشا بطاطا أو ذرة أو رز – المهم نشا). أفضل النتائج برأيي المتواضع بودرة الأطفال – الطبقة بعد ما تنشف بتكون ناعمة لكن إلها سن أو ملمس طبشوري ناعم (لكن ممكن تضل رائحة البودرة تضل عالقة مع قطعة العمل). كله بيرجع إلكم بالنتيجة اللي بدكم ياها والملمس والخليط اللي بيعطيكم النتائج الأفضل برايكم
صراحة مش عارفة كيف كنت بدي أكمّل تسلسل المقالة لأحكي عن كيف نجهّز ونأسس المواد المختلفة. كنت رح عن خطوات التجهيز للمواد المختلفة بعدين أحكي عن تأسيسها، بس حسيت رح يكون الموضوع في نوع من التشتيت (روحة جية طلعة نزلة بالمقال بين المواد المختلفة ) ف غيّرت رأيي واللي عملته إنه رح أذكر المادة (من المواد الشائع إستخدامها لقطع الديكوباج – حكيناها فوق) بعدين كيفية تجهيزها ثم كيفية تأسيسها
أولا – الخشب
تجهيز الخشب
الخشب بإختلاف أنواعه – رح نحتاج نجهزه بإستخدام ورق الصنفرة – أو ورق الزجاج متل ما بنقول عنه بالأردن –. ورق الزجاج بيجي بقياسات مختلفة، القياس بيدل على نعومة أو خشونة الورق. كل ما كان الرقم/القياس أقل كل ما كان أخشن، وكل ما كان أقل كل ما كان أنعم
كيف نعرف القياس اللي لازم نستعمله؟ بقاعدة – الخشن للخشن والناعم للناعم. يعني، كل ما كان سطح العمل أخشن، كل ما لازم أختار قياس قليل لأبدأ العمل فيه ومن ثم أنتقل لقياس أعلى لزيادة النعومة. لكن بشكل عام (للخشب الأبيض/السويد) بنختار قياس 80 – 120 بيكون مناسب. للإم دي إف ممكن نختار 180 أو حتى 120 للسهولة (أنا بستعمل 120 وبيعطيني نتائج ممتازة)
كيف نجهّز الخشب بورق الصنفرة؟
باخد قطعة من ورق الصنفرة، وبصنفر سطح قطعة العمل بخطوط تكون بإتجاه واحد (خصوصي بالقياسات القليلة/ الخشنة) والأخشاب الطبيعية (اللي بتكون إلها عروق خشب ظاهرة، هاي بصنفر مع إتجاه عروق الأخشاب). إزا كانت أخشاب مصنعة متل الإم دي إف، بقدر أصنفر بحركة دائرية حيث السطح بيكون أملس نوعا ما. بدير بالي بكون حريصة عند الأطراف وحواف قطع الخشب (جميع الأنواع) لأنها بتكون أكتر خشونة عندها. وبس أخلص بنظّف قطعة العمل بإستخدام قطعة قماش نظيفة وجافة
تأسيس الخشب
تأسيس الخشب بيكون من خلال دهنه بمادة تقلل من امتصاص الرطوبة أو السوائل من الألوان أو الدهانات اللي رح أستخدمها. معظم أنواع الخشب (خصوصا الإم دي إف، متل الإسنفنجة هاد النوع) قادر على إمتصاص الرطوبة أو السوائل، عشان هيك لازم ندهنه بمادة تمنع أو تقلل هاد الإشي وتسمح إلنا باستخدام الألوان والدهانات بشكل أفضل. أكيد عرفتوها للمادة هاي – الجيسو أو بدائله (رح نحكي عن البدائل بشكل مفصل لاحقا إن شاء الله). بدهن طبقة موحدة و متساوية إمّا بإستخدام الفرشاية أو الإسفنج
ثانيا – الزجاج
تجهيز الزجاج
للزجاج سطح أملس وناعم (بقصد فيه أغلب أنواع الزجاج العادية) ف تجهيزه بيكون من خلال تنظيف سطح قطعة العمل الزجاجية بشكل جيد (بالماء والصابون ومن ثم نتركها تنشف)، وقبل ما نبّلش نشتغل عليها ننظفها باإستخدام الكحول الطبي (السبيرتو أو الأسيتون بينفع كمان) أو ممكن إستخدام المناديل الطبية المعقمة (بتتوافر بالصيدليات وبتستخدم قبل إعطاء الحقن أو الإبر الطبية) ونترك قطعة العمل تنشف تماما. لازم نتفادى ملامسة مساحة العمل ع قد ما نقدر بعد التجهيز عشان ما يصير عنا طبع أو آثار الملامسة من بصمات أو ما شابه
تأسيس الزجاج
بسبب شفافية الزجاج ممكن الشغل عليه من جهتين: الأمامية أو الخلفية. أي إنه حسب قطعة العمل ممكن ندكبج عليها من الجهة الامامية (مثلا مرطبان وندكبج الجهة الخارجية من المرطبان) أو ندكبج على الجهة الخلفية (مثلا صحن زجاجي ونشتغل على الجهة الخلفية من الصحن). عادة الشغل بيكون على الجهة الغير ملامسة للطعام في حال أوعية المطبخ أو الصحون. حسب قطعة العمل أو التصميم اللي ببالنا ممكن إستخدام الجيسو وممكن لأ، لكن على الأغلب (مش دائما) التأسيس بالجيسو أو بغيره بيكون للدكبجة على الجهة الأمامية (الخارجية) من قطعة العمل الزجاجية
في طرق كتيرة للتأسيس. في ناس بيعملوا على تأسيس السطح كامل (دهان الجيسو على كامل سطح العمل) وفي ناس بيحبوا يأسسوا فقط تحت المناطق اللي بدي أضيف فيها الورق والألوان. ف كله بيرجع للتصميم والإختيار الشخصي.
كيف نأسس؟ بدهن طبقة موحدة ومتساوية باستخدام الفرشاية أو الإسفنج
ثالثا – القماش
تجهيز القماش
القماش اللي بنقدر ندكبجه أو ندكبج عليه لازم يكون بدون أو مسامات أو فراغات (متل قماش الكنڨة اللي بنطرز عليه) وما لازم يمط/يشد/يتمدد متل قماش التيشيرت (هاي لأفضل النتائج مش إنه ما بتقدروا تدكبجوا عليهم لكن الشغل ممكن ما يكون بنتائج ممتازة أو يتأثر بطبيعة القماش ويخرب)
القماش لازم يكون مغسول ونظيف ومكوي (تكون المنطقة اللي بدنا ندكبجها مسطحة ومستوية)
نخلي ببالنا، القطعة اللي بندكبجها أو بندكبج عليها بنغسلها يدويا بماء بارد أو فاتر فقط. أغلب الحالات (بإستخدام المواد الإعتيادية ودون أي مواد متخصصة ضد الحرارة العالية) ما بنقدر نغسل القطع بالغسالة
تأسيس القماش
ما بنحتاج نأسس القماش إلا في حالات معينة – لوحات الكانفاس، أو الجلد أو الألوان الغامقة….لكن للمشاريع البسيطة ما بنحتاج نأسس
رابعا – المعدن
تجهيز المعدن
تنظيف قطعة العمل المطلوبة بشكل جيد إزا كان عليها ورق أو تغليف. بعدين باستخدام ورق صنفرة قياس 220 أو أنعم بنصفر سطح العمل بشكل خفيف جدا جدا. اللي بدنا نعمله هو تخشين سطح العمل وأزالة أي طبقة عازلة (متل الورنيش أو أي مادة أخرى). بنظف قطعة العمل بإستخدام قطعة قماش نظيفة. شخصيا أنا بضيف خطوة زيادة (ممكن تستغنوا عنها) اللي هو بمسح قطعة العمل بقطعة قماش مبللة بالخل وبتركها تنشف لحالها (يعني فقط بمسحها بالخل وبخليها/بتركها تنشف بالهواء). لقيت نتائج أفضل مع الخطوة الإضافية لكن ليست ضرورية
تأسيس المعدن
بندهنه طبقة من الجيسو باستخدام الإسفنج – بيعطينا تغطية ونتائج أفضل من إستخدام الفراشي (برأيي الشخصي)
خامسا – البلاستيك
السبب في تجنب البلاستيك عند العمل بالديكوباج هو إنه غرا الديكوباج ما بيقدر يكوّن أي روابط بينه وبين البلاستيك. ف بس ينشف الغرا رح تلاقوه يتقشر كطبقة واحدة (غالبا شفافة) . ممكن نساعد في تكوين الروابط بين قطعة العمل البلاستيكية وغرا الديكوباج والورق والألوان من خلال صنفرة السطح واستخدام الجيسو. لكن خلوا ببالكم، حتى مع هاي الخطوات قطعة العمل معرضة للخراب أو التقشر وغيره بأسهل المؤثرات (مثل وقعت قطعة العمل عن الطاولة أو مكانها، في حدا ماسك القطعة وضغط عليها شوي، كنا حاطين القطعة بمنطقة أو مكان مشمس ف البلاستيك سخن وتغيرت درجة حرارته….وغيرها من الأسباب كتير)
تجهيز البلاستيك
إزالة أي أوراق أو أغلفة موجود على قطعة العمل وتنظيفها بشكل جيد. بإستخدام ورق الصنفرة بصنفر السطح بشكل جيد وبتأكد إنه صنفرنا جميع المناطق اللي بدي اغطيها بالتصميم (من ورق من غرا من ألوان أي جزء من السطح رح أشتغل عليه بصنفره) لأنه أي جزء غير مصنفر بيكون عندي إحتمالية عالية من إنفصال الجيسو أو غرا الديكوباج عنه ويخرب عندي الشغل كله (ورق الصنفرة قياس 120 بيعطي نتائج جيدة، ممكن استخدام ورق أنعم) ومن ثم أمسح القطعة وأنظفها بواسطة قطعة قماش نظيفة
تأسيس البلاستيك
بدهن قطعة العمل بالجيسو على شكل طبقة موحدة ومتساوية (بالفراشي أو الإسفنج، الإسفنج أسهل). بتأكد من أنه غطيت كل مناطق الشغل المرغوب تغطيتها بالتصميم.
بالنسبة للمواد التانية، أغلبها بنقدر نجهزه من خلال تنظيف قطعة العمل بشكل جيد، وتاسيسها باستخدام الجيسو أو بدائله ( أو حتى بدون تأسيس إعتمادا على نوع المادة وقطعة العمل)
بعرف حكيت كتير، معلش سامحوني بس عشان أقدر أشارككم المعلومات اللي عندي. وهلأ دور نحكي عن بدائل الجيسو في حال ما كان متوفر عنا