بسم الله
خلينا نبلش أول المشوار بوحدة من أكتر الأدوات إنتشارا…..المقص
المقص
:بشكل عام رح تحتاجوا لـ 3 أنواع من المقصات
واحد للقماش فقط ، واحد للورق و الكرتون فقط، و واحد للأداء التقيل متل قص الأسلاك الخفيفة و شرائح النحاس على سبيل المثال
ببساطة المقص عند عملية القص بيفقد من حدة نصله مرة ع مرة. الورق عبارة عن خشب – معالج و مضاف إليه مواد تانية و مرقق لسماكة رفيعة جدا- لكن بيضل أصله خشب. ف مع إستعمال مقص القماش المتكرر لقص الورق بيخفف من حدته بشكل متسارع و بيصير يأثر ع قص القماش, ممكن يخرب القماش و ينسله إزا كان القماش خفيف أو رقيق كتير
حجم المقص ما بيهم, بس يفضل إنه يناسب حجم اليد لسهولة الإستخدام. المهم هو طول النصل, كل ما كان أطول ، بيكون أحسن للقص بخطوط طويلة لكن صعب نقص فيه تفاصيل صغيرة. بالعكس, كل ما كان أقصر بيكون أحسن لقص التفاصيل الصغيرة لكن مش لقص الخطوط الطويلة
في عنا المقصات المزخرفة، اللي بيكون الخط الناتج عن القص مزخرف بشكل معين (متل الموجة أو المتعرج) أو حسب شكل المقص. هلأ هدول، حسب جودة المقص، إذا كانت نوعية المقص جيدة أو عالية ممكن استخدامه مع القماش. غير هيك من الصعب إستخدامه غير مع الورق أو الكرتون. هاي المقصات بتكون ممتازة لحرفيي الورق – مجالات السكراب بوكنغ, أو التدوين الفني – و ذلك لأنه استخدامها لزخرفة الأطراف أو حواف العمل أو عمل عناصر مختلفة للمشروع
:ممكن بعد فترة من الإستعمال تلاقوا المقصات عندكم نوعا ما صارت ما بتقص منيح، عندكم وقتها عدة خيارات
إزا المقص عندكم نوعية ممتازة و جودته عالية، بتقدروا تاخدوه على محلات متخصصة و عندهم (بيشحذوا) المقص (يعني برجعوا يخلوه حاد مرة تانية). مثلا مقصات القماش (و خصوصي سنجر) بتقدروا تروحوا على محلات سنجر أو وكالاتهم و بيرجعوا مقصاتكم متل الفل
ممكن كمان تشتروا ماكينات صغيرة (متل تاعت السكاكين من محلات الأدوات المنزلية) و تزبطوا أمور المقصات عندكم بالبيت (بتشحذوا المقصات بإستخدام الماكينة الصغيرة متل السكاكين تماما)
أو أسهل طريقة، بتقدروا تجيبوا الفويل (الورق المعدني الخاص بالطبخ، بتعرفوا الورق المعدني اللي بنلف فيه صواني الفرن؟ هاد) بنعمله على عدة طبقات و بنقصه بالمقص عدة مرات. فينا كمان نعمل الحركة نفسها بس بدل الفويل المعدني بنستعمل ورق صنفرة قياس عالي (1200 و طالع). خلّوا ببالكم الطريقة الأخيرة ممكن تأثر على مقصاتكم بشكل سلبي ف لا تطبقوها بشكل مستمر