…ونبدأ القول ببسم الله
أي مشروع إلّا ما نحتاج إنه نلصق قطعة بأخرى أو نثبّت جزء من المشروع باستخدام نوع معيّن من اللاصق
حسب المشروع أوالمادة اللي عم نشتغل عليها بنختار نوع اللاصق من المجموعة الكبيرة من المواد اللاصقة اللي بنقدر نستعملها. اختيار النوع المناسب هواللي بيحدد نجاح عملية اللصق وأحيانا نجاح المشروع بشكل كامل
حسب طبيعة المادة اللاصقة فينا نحكي عن أنواع مختلفة من اللواصق. والمقصود هو طبيعة المادة اللاصقة أثناء الاستعمال أو قبل ما تنشف – السائل، الصلب، الشريط، و الرش
المواد اللاصقة السائلة
ممكن استخدامها مع معظم المواد متل الورق والكرتون والخشب والقماش، وأغلب الأنواع الأساسية ما بتنفع مع البلاستيك والمعادن. من الأفضل اختيار الأنواع الخالية من الحمض لتجنب الإصفرار مع مرور الوقت. ممكن اعتبار السوبر غلو من هاد النوع ، التعامل معه لازم يكون بحذر – ياما لزقوا أصابعي ببعض منه
أغلب أنواع اللواصق السائلة بتنشف شفافة ما لم يذكر ذلك بشكل واضح – تأكدوا بقراءة التقاصيل على العبوة- و في أنواع بتنشف بلمعة و أنواع لما تنشف بتكون مطفية/بدون لمعة
من مساوئ استخدامه احتمالية يطلع برا منطقة اللصق و مع استمرار الشغل ممكن يوّسخ الأصابع و يترك أثر أو ينشف و يكبتل – يكبتل مصطلح علمي مش تضحكوا عليّ – و يؤثر على المنظر النهائي للمشروع. في كمان خاصية سلبية لهاد النوع ، خاصة مع الورق و الكرتون، إزا استخدمت كمية زيادة ممكن يصير عندي تجعد بالورق. ليش؟ لأنه محتوى الماء عالي في الغراء أو اللاصق فبيتأثر الورق و الكرتون بزيادة الكمية المستخدمة
طريقة استخدام هاد النوع بيكون عن طريق فرشاية (بندهن اللاصق باستخدام الفرشاية على السطح المراد تلصيقه بشكل طبقة خفيفة متساوية) أو من خلال الأنبوب اللي بيجي فيه اللاصق، بيكون إله طرف مدبب فيه ثقب بيخرج منه عن طريق الضغط عالأنبوب
أشهر أمثلة على هاد النوع من اللواصق: المودبودج و غرا الديكيوباج، غرا الخشب
المواد اللاصقة الصلبة
في اللي استخدمها أغلبنا واحنا أطفال, بتكون متل القلم اوالانبوب – متل قلم الحمرة/الروج – وكنا نستعملها للمشاريع المدرسية. جيدة لكن مع مرور الوقت ممكن تفقد قوتها والتصاقها ف يفضل عدم استخدامها للمشاريع طويلة الأمد أو المشاريع الإحترافية
ممكن نعتبر السيليكون الساخن من هاد النوع (اللي بنستعمل فرد السيليكون معه) بينفع مع مواد مختلفة كتيرلكن مش مع المعدن أو أنواع معينة من الزجاج، من مساوئ استخدامه الحرارة العالية اللي ممكن نحرق أصابعنا إزا ما كنا حريصين و كمان خيوط العنكبوت – اللي هي الخيوط الخفيفة اللي بتتكوّن مع استعمال و تحريك مسدس السيليكون لكن من السهل التخلص منها
لا تنسوا السيليكون البارد – لكن استعمالاته محدودة نوعا ما بالحرف اليدوية
طريقة استخدام اللاصق من هاد النوع بيكون عن طريق فركه على المساحة المراد تلصيقها. و في حالة استخدمنا السيليكون الساخن أو البارد لازم نستخدم المسدس/الآلة الخاص فيهم.
المواد اللاصقة ع شكل شريط:
المعروف بالعامية اللزيق. منه الشفاف ومنه اللي معمول من ورق ومنه ثتائي جهة اللصق ومنه السميك ومنه الرفيع. أشكال وأحجام مختلفة. حسب الغاية المطلوبة بنحدد النوع المستخدم. في لغايات التثبيت المؤقت (نثبت الستنسل/الباترونة محلهم، أو مع ورق الكربون لما بدي أنقل رسمة أو كتابة معينة – عشان ما بيتركوا أثر/صمغ عالمشروع بس أقيمهم. لغايات الثبيت الدائم، اللاصق ثنائي الجهة ممتاز بمشاريع الورق والكرتون، ممكن للقماش كمان لكن مش بشكل الأوقات. في عنا الشريط اللي بنستعمله مع أشغال الورود – اللي بنلف و نغطي فيه سيقان الورد والأسلاك – موجود بعدة ألوان – لكن تقريبا عديم القدرة عاللصق إلا إزا بطريقة معين واستخدام معين
من فترة منتشر شريط الواشي
Washi Tapes
بيكونوا متل شريط اللزيق العادي لكن بألوان وزخرفات متعددة وكتيرة. أغلى شوي بالسعر، واستعمالهم بشكل أساسي بيكون للتزيين والزخرفة أكتر من اللصق والتلزيق
طريقة الإستخدام بتكون بأخذ جزء من الشريط اللاصق و تلزيقه عالمكان المطلوب
المواد اللاصقة ع شكل رش
اللي بيجي رش بعلبة متل السبري. مشاكلها كتيرة متها ريحتها القوية (أغلب الأنواع/ الماركات) و صعب التحكم فيه لنحصل على طبقة وحدة متساوية
سعرها مقارنة بغيرها نوعا ما أغلى
الحلو إنه من هاد النوع من اللواصق بيتوفر أنواع معينة بتكون مؤقتة (يعني بتلصق لكن لفترة زمنية معينة) و هاد النوع ممتاز جدا لغايات التصميم و تحريك الأجزاء المطلوية لحتى نقرر وين مكانها الدائم رح يكون (و بعدها بنستعمل لاصق دائم) أو لغايات حصائر القص للماكينات القص الإلكترونية
تمام التمام. كيف نختار اللاصق المناسب لشغلنا و مشروعنا؟
هاد الإشي بيرجع بشكل كامل لمادة القطعة اللي بدنا نلصقها و المادة اللي متكون منها سطح العمل. حسب هدول المادتين (يعني مثلا ورق مع ورق/كرتون و قماش/فوم و حديد/ بلاستيك و صوف) بيكون اختيار اللاصق و نوعه و طبيعته
الحديث عنا هو عن المواد اللاصقة المستخدمة بشكل عام و متكرر بالحرف و الأشغال اليدوية، ف في أتواع كتير ما انذكرت بجوز متل الإيبوكسي و اللواصق الصناعية متل
(و غيرها الكثير)
Contact cement – rubber cement – E6000