بسم الله الرحمن الرحيم، و السلام عليكم و رحمة الله و بركاته
معكم تمارا، العقل المدبر وراء جوزاء.
بداية جديدة إن شاء الله. السبب؟ بشهر 3 من سنة 2022 (و بعد 5 سنين من إنطلاقة موقع جوزاء) و لعدة أسباب، خسرت كل المحتوى اللي كان موجود عالموقع. و عشان هيك إضطريت للأسف أبدء من جديد بالموقع و أرجع أبنيه مرة تانية.
الحمد لله على كل شيئ و قدر الله و ما شاء فعل.
ف أرجع أحكيلكم و أعرفكم عن حالي شوي.
تمارا الشيشاني، زوجة و ربة منزل، والدة بنتين من أروع ما خلق الله، سيرلا و سيدا.
خريجة هندسة صناعية، الجامعة الأردنية. بعرف ما اله أبدا دخل بالفنون و المجال الحرفي، بس الحق عليّ اللي جبت معدّل بالتوجيهي اللي سمحلي أدخل هندسة (قصة طويلة مش رح أزهقكم فيها). من صغري كنير بحب أشتغل بإيديّ و أرسم و ألوّن. و مع تشجيع الوالدة الله يرحمها و يحسن إليها، كان هاد الحب بيتطور و بيقوى و بيتمد ليشمل مجالات و حرف أكتر و أكبر. بعد الرسم صار الكروشيه، بعدها الخرز و بعدها الحفر و الحرق عالخشب و غيره و غيره و غيره.
مشيّـت الأيام، و كترت القطع و المشاريع اللي اشتغلتها، و واجهت كتير من المشاكل و التحديات اللي اكيد بيواجها كل حدا بهاد المجال (شح المواد و الأدوات أو عدم توفرها، قلة المصادر التعليمية، المعلومات القليلة و الدورات التعليمية المكلفة جدا جدا، ثقافة سر المهنة اللي متشعبة بشكل لا يصدّق بين الفنانين و الحرفيين المحليين و كتير غيرها) ف هون قرقرت إنه خلص لازم يكون في محاولة لحل هاي المشاكل. عشان هيك، رح تلاقوني بشارك معكم كتير من المعلومات المتعلقة بالمواد و الأدوات و مصادر المحلية و غير المحلية، و رح تلاقوني عم أنظّم دورات تعليمية بعدة مجالات، و تلاقوني بشارك معكم مشاريعي المختلفة الشخصية اللي بشتغل عليها. محاولة شخصية إن شاء الله تصير مجتمعية.