ما هو الريزن؟

مش رح أدخل بتفاصيل تركيبة الريزن من ناحية كيميائية (هاي لحالها بدها تخصص كيمياء أو هندسة كيمياء و ندرس البلمرة و المواد المركبة و كزا) ف عشان هيك رح أحكي بشكل أساسي على قد ما أقدر و فقط فيما يخص مجال الحرف اليدوية

الريزن عبارة عن مصطلح بيشمل مجموعة من المواد الكيميائية (قد تكون من مصدر نباتي أو صناعي)، بتتشارك بعدة سمات أساسية. أهم هاي الصفات أو السمات، إنها بتكون مكونة من مادة بالحالة السائلة (اللزجة) و معظم الأحيان بتكون من جزئين، الأول بنحكيله الريزن، و التاني المصلّب (أو المسرّع أو المفعّل كتسميات تانية). في أنواع معينة ما بتكون جزئين سائلين، بتكون فقط الريزن (نوع معيّن، و المصلّب بيكون نوع معيّن من الأشعة رح نحكي عنها شوي بالتفصيل لقدام)

تمام، بتتحوّل هاي المادة من الحالة السائلة إلى الحالة الصلبة من خلال تفاعل كيميائي معيّن و بتكون المادة الصلبة الناتجة ذات خواص معيّنة حسب نوع الريزن المُستخدم. .التفاعل الكيميائي اللي بيصير بيكون نتيجة عامل محفّز اللي ممكن يكون المصلّب،أو ممكن يكون لبعض الأنواع نوع معيّن من الأشعة الضوئية

في حال كان العامل المحفّز عبارة عن المصلّب (أنا رح أسميها هيك للسهولة من هلأ و طالع، لكن في مرادفات و مسميات كتيرة تانية منها المسرّع أو المفعّل متل ما قلت قبل هيك)، بتكون نسب الخلط بين المصلب و الريزن حسب نوع و تركيبة الريزن. و في حال كان العامل المحفّز عبارة عن أشعة ضوئية معينة، لازم تعريض الريزن لهاد النوع من الأشعة لحتى يصير عندي التفاعل الكيميائي و يتحوّل للحالة الصلبة

يعني لو ما أضفنا المصلب (أو العامل المحفّز) إلى الريزن رح يضله بحالته السائلة

حسب النوع المستخدم و المصدر و نسب / شروط الخلط، المادة الناتجة الصلبة رح يكون إلها خصائص مختلفة، منها الشفافية بإختلاف درجاتها و الصلابة و تحمل العوامل الجوية و الحرارة و الخدوش و غيرها الكتير

نحن كحرفيين و في مجال الحرف اليدوية، في عدد من الخصائص اللي بتهمنا أكتر إشي

الشفافية – المادة الصلبة الناتجة تكون شفافة مثل الزجاج، لكن بوزن أخف

الصلابة – المادة الصلبة الناتجة تحمي القطعة اللي بدنا ياها أو المشروع أو ما إلى ذلك

اللمعان – المادة الصلبة الناتجة يكون إلها لمعة بإختلاف درجاتها

تحمّل العوامل الجوية و الحرارة – إنه المادة الصلبة الناتجة تتحمل أشعة الشمس على سبيل المثال، الرطوبة، تغيّر درجات الحرارة و ما إلى ذلك.د

هيييييك أبسط شرح للريزن قدرت أوصله