ما هي أنواع الريزن ؟

الريزن متل ما حكينا مادة كيميائية و حسب تركيبة المادة الكيميائية هاي بتنقسم لعدة أنواع، رح أذكر منها 5 (في أنواع تانية أكيد، بس أنا رح أحكي عن أكتر الأنواع شيوعا. و المتداولة بشكل واسع بمجال الحرف اليدوية)

الأنواع هي

البوليستير

الإيبوكسي

اليو ڨي

البولي يوثيرين

السيليكون

يعني، مش كل ريزن بيكون إيبوكسي (جملتي الشهيرة). الريزن هو المصطلح الشامل، و تندرج تحت مظلته المسميات الأخرى. يعني من أنواع الريزن هو الريزن الإيبوكسي، و الريزن البوليستير و الريزن اليو ڨي و الريزنات التانية. ف لمّا حدا يجي يحكيلكم أنا ما بشتغل إيبوكسي أنا بشتغل ريزن… إحكولهم ييجوا يقرؤوا هاي الفقرة

و كل نوع من هدول الأنواع ممكن يختلف حسب الشركة المُصنّعة أو الغاية المخصص إلها أو الهدف اللي رح نستخدمه عشانه إن كان صب أو تغليف (رح نحكي عن هاي النقطة بالتفصيل بالجزء القادم إن شاء الله). ف ممكن يكون عندي ريزن إيبوكسي من شركة أ، و ريزن بوليستر من الشركة نفسها، لكنهم نوعين مختلفين. ممكن ريزن ايبوكسي من شركة أ و ريزن إيبوكسي من شركة ب، نفس النوع لكن رح يختلفوا بالخصائص بشكل بسيط عشان اختلاف تركيبة و وصفة الشركات المختلفة. فكروا فيها متل شيبس ليز و شيبس برنجلز، التنين شيبس لكن طريقة الصنع و المنتج النهائي مختلفين شوي

تمام، نرجع لأنواع الريزن. خلينا نحكي بخصائصها و رح أعملها بجدول ليبين الفروق بين هدول الأنواع بشكل أسهل للمقارنة. لكن رح أحكي عن أول 3 أنواع بس. حيث هاي الأنواع الأساسية للإستخدام في مجالات الحرف اليدوية. ليش؟

البولي يوثيرين حساس جدا جدا للرطوبة، و حتى ممكن ما يتصلب بشكل كامل بالأجواء الباردة. عدا عن رائحته القوية اللي رح تتطلب قناع تنفسي مخصص أثناء العمل معه، فالشغل معه أو فيه غير سهل أبدا بشكل إبتدائي أو منزلي. السيليكون، هو الأنسب لصنع القوالب حيث أنه طبيعة المنتج النهائي المطاطية مناسبة لهاي الغاية (لقدام رح نحكي عنه بالتفصيل إن شاء الله)