المواد- الخشب

أمثلة على الأنواع المتوفرة بالأردن (ممكن تتوفر أنواع مختلفة عندكم ) حسب البلد اللي انتوا فيه

الأخشاب الصلبة: منها 
أِش ,بلوط, بلوط أبيض, تيك, جوز, زان , كرز, ميبل

الأخشاب اللينّة: منها
أرز، حور، دنوب، سويد، سويد كندي، شوح أبيض

الخشب الطبيعي في مشكلتين صغار، إنه خلال الخشب وعروق الخشب في عُقد. العُقد هاي بتكون ناتجة عن غصن وقع عن جذع الشجرة وهي عم تكبر، ف بيصير محل الغصن متل الدائرة و هي اللي بنحكيلها عقدة. منظرها حلو أحيانا و بتعطي منظر للخشب، بس بتكون متل حلقة ضعيفة – ممكن يصير عندها كسر أو حتى ممكن العقدة تطلع من محلها – عشان هيك أغلب النجارين لما يستعملوا الخشب بمشاريعهم بيكونوا يدوروا على عدد أقل من العقد. عموما الخشب الصلب فيه عقد أقل من الخشب اللين. و المشكلة التانية هي الشظايا اللي ممكن تنتج عنه ف لازمه سنفرة بشكل جيد و خصوصي عالأطراف و الزوايا

الخشب المُصنّع

وهلأ رح نحكي عن الخشب المُصنّع، و هو عبارة عن قسمين: واحد بيكون من نشارة و زوايد الخشب المعجونة بغرا و مواد لاصقة ، و التاني من طبقات رفيعة و قطع خشب مركبة و مرتبة  بشكل متقاطع و ملزقة بطرق معينة. القسمين بنشكلهم ع شمل ألواح خشبية باستخدام مكابس حرارية خاصة بعد الخلط أو ترتيب القطع/ الطبقات

أغلب أنواع القسم الأول ما بتتحمل رطوبة. إزا ما تعاملنا معها عند الدهان و التأسيس مزبوط، و تعرضت لسوائل رح نلاقيها – نفشت – رح تتشرب السوائل هاي و تزيد بالحجم في المناطق اللي تعرضت للسوائل. لكنه من السهل كتير نتعامل معها من تأسيس و قص و تجهيز. و الحلو فيها ممكن تركيب قشرة خارجية إلها لتعطيها مظهر و عروق الخشب الطبيعي. رح تلاقو إلها كتير استخدامات، مثلا الكتير من منتجات آيكيا – الأثاث – مصنعة من نوع أو تاني من الأخشاب المصنعة 

القسم التاني بيجمع بين متانة و مظهر الخشب الطبيعي و خفة الوزن و بسعر أقل. متين وقوي جدا و بيجي بسماكات عالية نسبيا. من أنواعها المختلفة المتوفرة بالأردن
إم دي إف ، سيلوتكس، لاتيه، مازونيت، مضغوط، معاكس

السؤال هلأ، بعد ما حكينا عن الأنواع المختلفة، شو أفضل وأحسن نوع اختاره في أشغالي ومجال الحرف اليدوية؟

أول إشي بدنا نخلي ببالنا مجالنا والإستخدامات اللي نحنا بدنا الخشب عشانها، مثلا، إزا بدنا نرسم عالخشب لوحات ورسمات بألوان مختلفة، من الأفضل استخدام لأخشاب المصنعة (الأخشاب الطبيعية مكلفة رح تكون و ما رح تعطيني المساحة الكافية لخلفية الرسمة لأنها بتيجي ع شكل عوارض) ف أفضل اختيار بيكون عنا النوع المصنع اللي من طبقات (اللقسم التاني) لأنها بتعطيني مساحة كافية (بقدر أقص أي حجم من اللوح الموجود اللي يناسب حجم لوحتي) و كمان لأنها بتتحمل السوائل من الألوان بدون ما تتأثر متل النوع الأول اللي  من نشارة و زوايد. و قياسا على هيك، بنشوف إيش الخصائص اللي بنحتاجها و بندور ع أفضل نوع من الخشب اللي يطابقها

بس بشكل عام – و هاد رأيي بعد تجاربي الشخصية – أفضل الأنواع هي ال (إم دي إف) و الأبيض أو السوّيد. ال إم دي إف عشان خفيف الوزن، سهل التعامل معه من تأسيس و سنفرة و دهان, سماكاته المختلفة و موجود بقشرة أو بلا…. و أهم إشي فش شظايا. إزا حابين مظهر طبيعي أكتر لمشروعكم أو حابين متانة أكتر الأبيض أو السويد ممتازين لكن ديروا بالكم من الشظايا

من وين أشتري الخشب؟ و كيف الأسعار؟

أول مكان هو من عند أي نجار. رح تلاقوا أغلب المناجر موجودة بالمناطق الصناعية – متل في وحدة بصويلح و وحدة بالبيادر و كتير محلات غير ف حسب إنتوا وين ساكنين و اللي بيكون قريب عليكم – بس بدكم تشوفوا كزا نجار و تاخدوا فكرة عن شغلهم و أسعارهم للمقارنة و تنقوا الأفضل إلكم

أسعار الخشب بتكون عادة حسب سعر المتر المكعب. فأسهل طريقة لتحسبوا سعر الخشب هو تحسبوا حجم العارضة أو اللوح (الطول بالعرض بالسماكة) و بعدها تحسبوا نسبة هاد الحجم من حجم المتر المكعب. بدها شوية رياضيات بس سهلة أمورها. لتاخدوا فكرة أفضل موجود بالفيديو مثال على سعر لوح م د ف و سعر عارضة خشب أبيض سوّيد -عشان تحضروا الفيديو 

تاني مكان – محلات القش – اللي ببيعوا تجهيزات القش. بتلاقوا عندهم قطع مقصوصة جاهزة، ف رح تتقيدوا بالأشكال اللي عنهم أو الأحجام الموجودة. و عندهم بالعادة بيكون بس م د ف مش أنواع تانية. و ممكن إزا كانوا متعاونين توصوهم ع الأشكال اللي بدكم ياها و الاحجام ف اعملولكم لفة. من المحلات اللي لقيتهم و كتير متعاونين بس لازم توصوهم قبل بوقت، موجودين بالزرقاء – الأردن (اسم المحل أبو يزن و موجود مقابل سوق البلدية) ف اللي قريب عليه ممكن يستفيد

تالت مكان – المكتبات و محلات القرطاسية الكبيرة. بتلاقو عندها مجموعة جاهزة من الأشكال و الأحجام بس عليكم تنقوا و تبلشوا شغل عليها. عنا بالأردن مكتبة جالاكتيك موجود عندها، و ممكن عند مكتبة الإستقلال و سمير و غسان…ممكن كمان عند محلات لوازم الريزن، أو مثلا بالسعودية مكتبة جرير

رابع مكان – رح تستغربوا بعرف- لكن محلات الأدوات المنزلية، أو محلات الكل شيء بدينار عنا (دايسو مثلا بالسعودية ) ممكن تلاقو قطع خشبية تشتغلوا عليها لكن مشكلتها إنه لازم تعدلوها و تزبطوها – مثلا تقيموا الإضافات اللي عليها – عشان تناسبكم. هاد الخيار الأخير للناس اللي ما بتقدر توصل لعند النجار و ما لقت بالمكتبات أو أي مجال تاني