…ونبدأ القول ببسم الله
ازا كنتم بتعاني من مشكلة بالمساحة عندك بالمطبخ أو المكتب أو الحمام (أو المشغل زي حالاتي) رح أدلكم على منتجات متعددة بتلاقوها بأغلب محلات الأدوات المنزلية أو من آيكيا رح تساعدكم كتير باستغلال الحيط (أو مساحة الحائط العامودية) لتكسبوا مساحة زيادة شوي للشغل أو التنظيم وبدون تكلفة زيادة. ممكن الكتير يكون عارفها ف بيتصير زيادة نصيحة أو إلهام لتعملوا حركة أو ديكور جديد
موجود بآيكيا (ممكن تلاقوا كتير أشياء شبيهة بمحلات المواد المنزلية، بس أنا رح أحكي عن آيكيا لأنه 99% من الوقت ممكن تلاقوا الأغراض هاي عالأكيد) متل اللي بالصورة، بنقدر نحكي عنها سكة، لونها أبيض. سهل كتير تركيبها عالحيط بالمكان اللي بدنا ياه
بنقدر مع هاي السكة نستعمل إمّا السلات الخصوصية أو التعليقات
كمان موجودين عند آيكيا و سعرهم كنير طري
أنا مثلا، لفترة منيحة من الفترات، كمن بستعمل الأوعية البيضا متل ما إنتم شايفين بالصورة تحت. بحكم طبيعة شغلي بستعمل أدوات مختلفة والأقلام والماركرات بشكل متكرر، مع الفراشي والأدوات التانية اللي بستعملها كانوا ياخدوا مساحة كبيرة من مكتبي اللي كنت أشتغل عليه. ف مع هاد النظام ريحت حالي شوي بإنه علقت السكة مع 4 أوعية وحطيت فيهم الأقلام والماركرات.
الحلو بهدول سعرهم القليل ولونهم الأبيض (السكة بدينار و ربع، و كل وعاء ب 0.75 دينار و التعليقات الخمسة ب 0.75 دينار) (الأسعار ممكن تختلف حسب الوقت اللي بتشوفوا فيه هاد البوست)، وممكن نلونهم أو تزيينهم بالطريقة اللي بنحبها. بس مشكلتهم لأنهم من البلاستيك ما بيستحملوا أوزان تقيلة (بالنسبة للأوعية و التعليقات، السكة متينة).
للي بيحب ألوان تانية متوفر لونين الأسود والفضي لكن سعرهم أغلى شوي. وهدول معهم إكسسوارات (متل السلات وغيرها كمان بالألوان الأسود والفضي و في أبيض). كتير بيعطي حركة حلوة وين ماكانوا وبيقضوا غرض.
