بقصد فيها الخطوة الفعلية لإضافة أو لصق ورق الديكوباج ودمجه مع سطح العمل. بالجزءالسابق حكيت عن المواد اللي الممكن نشتغل عليها، وكيف نأسسها ونجهزها للشغل والدكبجة. هلأ رح أحكي عن كيف – نلصق ورق الديكوباج بإختلاف أنواعه على سطح العمل ودمجه بحيث يصير جزء من الخلفية وسطح العمل. خلوّا ببالكم كل الأشياء اللي حكينا عنها بالفيديوهات والمقالات السابقة، من ألوان أو تأثيرات وإضافات ممكن نعملها على سطح أو قطعة العمل، هاد كله بيدخل ضمن عملية الديكوباج أي نعم، لكن هون رح أحكي بس عن خطوة لصق ورق أو مناديل الديكوباج على سطح/قطعة العمل، مش كيف ننتج قطعة العمل بشكل كامل. وبشكل خاص دكبجة الورق – مثلا القماش، أنا بعتمد طريقة معينة للدكبجة عليه رح نحكي عنها إن شاء الله بالتفصيل بشكل منفصل
الطرق كتير وبتختلف من شخص لآخر(الإغلب بهاد الموضوع بيرجع إلكم وحسب شو بيريحكم بالشغل وبيناسب غاياتكم ومطلبكم) ،لكن الأساس فيها كلها مشترك… بتعتمد بشكل أساسي على نوع ورق الديكوباج اللي إنتوا ناويين تستعملوه – ورق عادي/رز/خفيف أو مناديل ورقية وبتقدروا إنتوا مع الممارسة والتطبيق تعتمدوا الطريقة اللي بتناسبكم حسب نوع الوررق اللي عم تستخدموه
تجهيز الورق للدكبجة
قبل ما ندكبج رح نحتاج الورق يكون جاهز لنضيفه على سطح العمل. بعد ما اخترنا التصميم والشكل اللي بدنا ياه، أو طبعنا التصميم والورق المطلوب رح نحتاج نفصل هاي الأشكال أو التصماميم عن باقي الأجزاء اللي ما رح نحتاجها. عندا طريقتين: نستخدم المقص أو التمزيق. باستخدام المقص بنقص الشكل المطلوب، لكن بيترك أطراف خلينا نحكي منسقة جدا (حد القص بيكون محدد) بينما أسلوب التمزيق بيختلف شوي. ممكن باليد مباشرة أو باستخدام فرشاية ناعمة/صغيرة الحجم وشوية ماء، برسم خطوط حول الشكل المطلوب بالماء (بالفرشاية والماء) وبنشد المنديل بالأصابع. الأطراف الناتجة من هاي الطريقة بتكون عشوائية/مشرشبة/غير محددة وهو المفضّل لدمج الورق مع سطح العمل بشكل أفضل. كل ما كانت الأطراف مستقيمة أو محددة رح تكون واضحة بارزة بشكل أكبر وهاد الإشي إحنا ما بدنا ياه، بدنا يبيّن الورق كجزء من سطح العمل ومتجانس مع الألوان. للأسف كل ما كان الورق أسمك كل ما كان صعب نستخدم أسلوب التمزيق. هيك إن شاء الله بنكون جهزّنا الورق والأشكال اللي بدنا ياها (وإزا إحتجنا نثبت حبر الطباعة بنقوم بالخطوة هاي هون) وبنقدر نحكي عن خطوات الدكبجة
خطوات الدكبجة
الأساس المشترك لخطوات الدكبجة بيكون عادة
الخطوة الأولى – بدهن طبقة من غرا الديكوباج على سطح العمل
إضافة ورق الديكوباج- (بإختلاف أنواعه) والتأكد من عدم وجود أي فقاعات هوائية أو ثنيات وطيات وتركه لينشف بشكل كامل أو كافي – أنا عادة بترك قطعة العمل لمدة دقيقتين تقريبا وبنتقل للخطوة التالتة
ندهن طبقة أخرى (أو عدة طبقات) من غرا الديكوباج – للتثبيت
(إضافة الورنيش أو بدائله رح نجكي عنها بجزء الإنهاء بشكل منفصل وموّضح إن شاء الله)
مهم كتير نتخلص من الطيات أو الثنيات أو فقاعات الهواء التي ممكن تنتج أثناء العمل وتفصل الورق عن سطح العمل. إزا ما تخلصنا منه بالوقت المناسب رح تنشف على الشكل اللي هي عليه وتظهر عنا بالنتيجة النهائية وتقلل من جودة العمل. في عنا حالة إستثنائية عند إستخدام المناديل الورقية اللي هو الإستغناء عن طبقة الغرا الأولية، وهاد بيرجع على قدرة المناديل الورقية على تشّرب الغرا، ف الغرا رح يتخلل المنديل ويصل إلى سطح العمل ويثبّته (بعكس أنواع الورق التانية اللي ما بتقدر تمتص وتتشرب الغرا بنفس المقدرة ورح تحتاج الطبقة الأولية للتثبيت)
خلينا نحكي عن الخطوات بشكل موّسع شوي، الخطوات متل ما حكينا
الأولى – دهن طبقة الغرا الأولى
التانية – إضافة أو لصق الورق
التالتة – دهن طبقة (أو طبقات) الغرا النهائية
الخطوة الأولى – دهن طبقة الغرا الأولى
بكون جهزت وأسست سطح العمل بالشكل المناسب لتصميمي وشغلي. بعدها باستخدام فرشاية عادية أو إسفنج بدهن طبقة موحدة وخفيفة من الغرا بشكل يغطي شطح العمل بشكل كامل. ما أترك أي فراغات أو أماكن من السطح بدون ما يوصلها غرا وبدون أي تكتلات متركزة بمكان معين أو تكون طبقة الغرا سميكة جدا… مباشرة بعد ما أخلص دهان الطبقة الأولى لازم أضيف أو ألصق الورق، لأنه هيك بيكون عندي المجال أحرّك الورق فيما او احتجت أعدّل موقع الورق أو صار عندي أي مشاكل تانية
الخطوة التانية – إضافة أو لصق الورق
بعد ما أدهن طبقة الغرا الأولى ممكن ألصق الورق بعدة طرق
اللصق المباشر – بلصق الورقة اللي عم أشتغل فيها مباشرة على طبقة الغرا اللي دهنتها
هاد الأسلوب ممكن أستعمله مع جميع أنواع الورق لكن لازم تكونوا حريصين زيادة شوي بالشغل كل كان الورق أخف
• النقع بالماء – نضع قطعة الورق اللي عم أشتغل عليها بقليل من الماء لفترة زمنية قليلة كتير (مش أكتر من 5 ثواني وحسب نوع الورق) وبعدين بطلعها وبنشّف الموية الزيادة قبل ما ألصقها على طبقة الغرا. بعمل بهاي الطريقة عند استخدام الورق العادي المطبوع عليه بطباعة ليزر (طباعة الإنك جت أبدا ما تنفع بيتشتت الحبر بالماء) أو في حال إستخدام أوراق المجلات أو الورق السميك نوعا ما أو ورق الديكال المائي (هاد قصته قصة وفي خطوات زيادة، إزا بتحبوا بنحكي فيه بشكل منفصل إن شاء الله)
ما بقدر أستعمل المناديل الورقية بهاي الطريقة مطلقا
للطريقتين اللي ذكرناهم فوق – بنبدأ بإضافة قطعة الورق بشكل تدريجي على طبقة الغرا، بحاول ما أخلي مساحة الورقة تلامس طبقة الغرا بشكل كامل مرة وحدة، لأ، أبدأ من طرف واحد أو زاوية معينة من الورق بعدين باقي الورق. وبنفس الوقت بكون بأصابعي وبشكل خفيف جدا بمشي بخطوط على الجزء اللي عم أثبته من الورق (بهاي الحركة بكون بتحكم نوعا ما بإتجاه تمدد الورق وبقلل من ظهور التثنيات والطيات). ممكن بعد تثبيت الورق على الغرا، أعمل (بفرشاية إسفنج جافة أو بطاقة بلاستيكية) بالضغط الخفيف جدا على الورق من المنتصف ومن ثم بإتجاه الأطراف. هاد رح يساعدنا على شيئين: تقليل فقاعات الهواء العالقة أسفل الورق (ما بين طبقة الغرا وأسفل الورق)، والتخلص من أي زوائد غرا من أسفل الورق. لكن نعمل هاي الخطوة بحذر للحفاظ على الورق وعدم تمزيقه أو التسبب بأي تشققات. ممكن أيضا إستخدام أكياس النايلون الشفافة أو حتى نايلون الطعام (ما بعرف إسمه بالعربي بس هو النايلون اللي بيجي رول وبنقدر نلف فيه صحون الأكل أو الطعام للحفاظ عليها
بالإنجليزي cling film
أو حتى الملفات أو السلايدات البلاستيكية الشفافة، أضعها فوق قطعة الورق،العمل وبأصابعي أفرد وأتخلص من أي ثنيات أو طيات بس لازم نكون حريصين جدا
التبليل – هون بستعمل المناديل الورقية بشكل اساسي. لأنه المناديل الورقية خفيفة جدا وأكتر أنواع الورق قابلية للتشقق التمدد (متل ما رح تشوفوا بالفيديو)، بفضل إستخدام الطريقة هاي
على ملف أو سلايد بلاستيكي. أضع المنديل الورقي بس يكون مقلوب (أي بحطه وهو معكوس)، وفوقه بسكب أو برش كمية من الماء كافية لتبليله بشكل مشبع، وباستخدام فرشاية ناعمة جدا بفرد المنديل الورقي بشكل جيد، بتخلص من الماء الزائد (بميّل السلايد لفوق شوي على قطعة قماش) وبعدين برفع السلايد البلاستيكي وبقلبه بحيث يصير المنديل على جهة قطعة العمل وبالمكان اللي بدي ياه، وبحط السلايد على قطعة العمل. باستخدام أصابعي أو قطعة بلاستيك مستقيمة لأتخلص من أي ماء عالق أو أي ثنيات صارت معي. برفع السلايد شوي شوي وباستخدام الفرشاية الناعمة بفصل المنديل عن السلايد وبزيله بشكل كامل (السلايد). والمنديل لسه مبلول بنتقل مباشرة للخطوة التالتة وبدهن الغرا للتثبيت
تمام، هون الخطوة (خطوة لصق الورق) اللي ممكن تظهر فيها الثنيات/الطيات، إيش هو السبب في ظهورها؟
أسباب مختلفة وكتيرة – ممكن يكون عدم دهن الغرا بالطبقة الأولية بشكل موحد (إنه يكون في أماكن من سطح العمل خالية من الغرا) أو ممكن محتوى الماء في الغرا كبير (هاد عادة بيكون بالغرا البديل المصنوع منزليا). ممكن إنه نبلش ندهن الطبقة التانية من الغرا ولسه الطبقة الأولى ما نشفت بشكل جيد أو ما ألصقنا الورق على سطح العمل وطبقة الغرا بشكل جيد
لكن السبب الأساسي والمسبب الرئيسي للمشكلة هاي (وبيتضمن الأسباب اللي حكيناها فوق كمان) هو الورق بس يتبلل، بيتمدد. نحنا لما نثبت الورق على طبقة الغرا، الورق رح يتبلل نوعا ما من الرطوبة أو السوائل الموجودة بالغرا، ويتمدد (تزيد مساحته بكلمات تانية) ف إزا كان متثبت على طبقة الغرا وخصوصي من أطرافه، رح تتكوّن عندي الثنيات والطيات من المنتصف لأنه ما في مجال للورق – يتوزع ويتمدد – براحته. ف أفضل طريقة للتخلص من الطيات و الثنيات هي التخلص منه أثناء خطوة لصق الورق، يعني لسه الغرا/الماء لسه ما نشفوا. لأنه للأسف إن نشف الورق مع الثنيات/الطيات صعب كتير نتخلص منها. الوقاية خير علاج في هاي الحالة
ممكن في حالات معينة و معدودة فقط نتخلص منها بعد ما تنشف، من خلال الصنفرة (و بعتبرها أنجح إشي مع المناديل الورقية) في حال كان عنا مشروعنا أو قطعة العمل اللي عم نشتغل عليها تتضمن أسلوب التعتيق (إنه مثلا القطعة موديلها/تصميمها في تعتيق). لأنه االصنفرة رح تزيل الأجزاء اللي فيها ثنيات و طيات لكن بنفس الوقت رح تزيل أجزاء من رسمات المنديل. ف حسب الموديل و تصميم القطعة ممكن تستخدموا الصنفرة للتخلص من الثنيات
ملاحظة صغيرة، ممكن أحيانا يكون التصميم أو قطعة الورق كبيرة بالحجم نوعا ما، أو بدنا نغطي سطح العمل بشكل كامل بالورق، ممكن ندهن جزء صغير من سطع العمل، نضيف الورق (بس نكون رافعين الجزء الباقي من الورق) ومن ثم نرجع ندهن الجزء الملامس للجزء الأول بالغرا ونضيف جزء أخر من الورق (يعني تبادل الأدوار بين الخطوة الأولى والتانية) حتى أخلص سطح العمل. لكن أنا شخصيا ما بحب هاي الأسلوب لأنه بينتج عنه إمّا خطوط سميكة من الغرا أو تعرجات وثنيات على شكل خطوط عند الأماكن اللي وقفنا عندها وبدلّنا بين الخطوات. اللي بنصح فيه هو ندهن طبقة من الغرا يكون سمكها مناسب لحجم سطح العمل (بحيث ما تنشف أجزاء وتضل أجزاء من الغرا) وثم إضافة الورق بالطرق اللي قلتلكم عليها فوق
دهن الطبقة (أو الطبقات) النهائية من الغرا
بعد ما ألصقنا الورق وتخلصنا من الطيات والثنيات ع قد ما نقدر، بندهن طبقة نهائية من الغرا لثبيت كل إشي محله. ممكن ندهن عدة طبقات من الغرا، لكن لازم نترك فترة زمنية كافية لتنشف طبقة الغرا السابقة بشكل كامل قبل مانبدأ الطبقة الجديدة. أنا شخصيا بفضل طبقة نهائية واحدة من الغرا إزا كان عندي السطح مش أبيض (لون الخلفية/التأسيس مش باللون الأبيض) لأنه بيكون أسهل لدمج الورق مع سطح العمل وما يصير عنا عدد كبير من طبقات الغرا، وما بين طبقتين أو 3 من الغرا إزا السطح أبيض وما بحتاج أدمج الورق إلاّ بشكل خفيف
دمج الورق مع سطح العمل
دمج الورق اللي دكبجته مع سطح العمل بيعتمد على شغلتين: لون خلفية الورق (اللون الموجود بخلفية التصميم) ولون تأسيس سطح العمل. إزا الإتنين كانوا نفس اللون، بحتاج فقط بألوان الأكريليك وبلون سطح العمل أو لون محيط الورق بستخدم فرشاية عادية أو إسفنج (أنا بفضل الإسفنج أكتر صراحة) وبضربات خفيفة بلوّن حول قطعة الورق اللي دكبجتها. بحاول تكون الضربات موزعة ما بين قطعة الورق وسطح العمل عشان أغطي على أطراف الورق
إزا كانت الألوان مختلفة (لون محيط الورق غير عن لون سطح قطعة العمل) هون يفضّل ندهن قطعة العمل باللون الأبيض، ندكبج الورق والتصاميم اللي بدنا ياها ومن ثم ندهن قطعة العمل باللون المناسب للون محيط المنديل (أو أي لون مناسب) وبنفس الطريقة السابقة. بالفرشاية وبلون الأكريليك المطلوب بدهن من خلال ضربات خفيفة على محيط قطعة الورق ومن ثم سطح العمل (بعدها ممكن ندهن قطعة العمل بشكل كامل إزا فضلنّا). وممكن كمان بضربات خفيفة نلوّن داخل التصميم أو قطعة الورق بشكل مناسب للتصميم عشان نربط الورق مع سطح العمل بشكل أفضل
إلا إزا كان التصميم أو الشكل اللي عم نشتغل فيه، شكل منفصل (مثلا وردة ونحنا قصيناها بشكل منفرد) ف ممكن ما أحتاج أدهن حواليها
بالدمج المهم ما تكون عندي أطراف الورق ظاهرة بشكل بارز وبخطوط مستقيمة أو ألوان غير متناسقة مثلا أو تظهر وكأنها جزء منفصل عن سطح قطعة العمل
كيف نختار الألوان ونخلطها لنحصل على الدرجات المطلوبة؟
المقالة أو الفيديو القادم بالجزء القادم إن شاء الله