بالجزء الأول حكينا عن طرق لصق الورق اللي عم نشتغل فيه على قطعة أو سطح العمل. هلأ رح نحكي شوي عن أشياء ممكن تساعدنا بشغلنا مع الدكبجة بشكل عام بالإضافة للحكي عن خلط الألوان. (ممكن تكونوا بتعرفوها من زمان) بس خدوها من باب الإلمام بالشيء
المناديل الورقية وإزالة الطبقات الزيادة
وحدة من أهم الأشياء اللي بنركز عليها و نحنا عم ندكبج بالمناديل الورقية هي فصل الطبقات الزيادة (حيث إنه بنستعمل الطبقة الأولى اللي بيكون عليها التصميم)
أسهل طريقة لقيتها لفصل الطبقات هي، بنحط نقطة صغيرة من الغرا بين أصابعنا و نفرك بحيث يصير ملمس الغرا دبق (مش ناشف بشكل كلي ومش محتفظ بكامل قدرته على اللصق). وبعدها بأصبعنا الدبقة بناخد المنديل وبنبعد الطبقات عن بعض. بسبب الغرا رح تلتصق طبقات مختلفة من المنديل على كل إصبع (وكمية الغرا قلييلة جدا بحيث ما بيتأثر المنديل أو يتمزق). ممكن طريقة تانية للي ما بيحبوا يحطوا غرا مباشرة على إيديهم أو بيلبسوا قفازات وقت الشغل، ممكن تستخدموا شريط لاصق، قطعة صغيرة منه على الإبهام و السبابة، و بناخد جهات مختلفة من المنديل ونفصل الطبقات. لكن هاي الطريقة أنا ما بفضلها لأنها بكتير من الأوقات بتسبب بتمزق المنديل
التعامل مع الورق الزيادة على أطراف قطعة العمل
ممكن وإحنا عم نشتغل ندكبج على طرف قطعة العمل، ويكون عنا ورق زيادة طالع من الطرف. كيف نتخلص منه؟
أنا بخلّي الورق وغرا الديكوباج ينشفوا بشكل منيح ويإستخدام ورق الصنفرة (بقياس ناعم أو متوسط) أو حتى ممكن مبرد الأظافر مخصص لهاي الشغلة بصنفر بإتجاه معاكس لوجه قطعة العمل وبزاوية 45 درجة تقريبا. ضربات الصنفرة بتكون بإتجاه واحد لنحصل على نتيجة أفضل
خلط ألوان الأكريليك
تمام، رح نحكي هلأ عن إشي أساسي ودايما بنسال عنه – اللي هو خلط دهانات أو ألوان الأكريليك
خلوّا ببالكم، النوع اللي رح أحكي عنه بشكل خصوصي هو دهانات الأكريليك بس لأنها الإغلب إستخداما بمجال الديكوباج لكن الأساسيات ممكن نطبقها ونحنا عم نخلط أي نوع من الدهانات مش بس الأكريليك. النقاط اللي رح أحكيها ممكن تناسبكم ممكن لأ، ممكن تتفقوا معي عليها ممكن لأ، بس هاد الأساس أنا اللي بشتغل عليه من ناحية خلط أساسي فقط مش ناحية تصميم/ديزاين أو تلبيق و غيره و بالآخر كله بيرجع إلكم وشو بيناسبكم أو شو بيريحكم بالشغل
ليش نخلط الألوان؟
وحدة من إيجابيات دهانات/ألوان الأكريليك إنها متوفرة بمجموعة كبيرة من الألوان والدرجات لكن ممكن أحيانا نحتاج لون بدرجة معينة مش متوفرة عنا وإحنا عم نشتغل، أو بنختصر على حالنا تكاليف شراء الدرجات والألوان المختلفة والإضافية إزا كان عنا بس الألوان الأساسية (الأحمر/الأزرق/الأصفر) والأبيض/الأسود
أو حتى مثلا مش جاي على بالنا نطلع من البيت ونروح نشتري (لا لا مش أنا اللي صار معي هيك أبدا مش تفكروا)
عشان نقدر نحصل على أي لون أو درجة بدنا ياها ، لازم يكون عندنا فكرة بسيطة عن جدول خلط الألوان (أو ممكن دائرة الألوان). رح احكي عنها بشكل بسيط
عنا اللونين الأبيض والأسود – نخليهم على جنب
عنا 3 ألوان: الأحمر – الأزرق – الأصفر. هدول بنحكيلهم الألوان الأساسية. تمام لهلأ؟
بس نخلط 2 من الألوان الأساسية بنحصل على الألوان الثانوية
يعني: لمّا نخلط
لون أساسي + لون أساسي مختلف = لون ثانوي
أحمر+ أصفر = برتقالي
أزرق+ أحمر = بنفسجي
أصفر + أزرق = أخضر
هدول الألوان الأساسية و الثانوية رح نحطهم على مسافات متساوية من محيط دائرة (وهمية) متل ما رح تشوفوا بالفيديو المرافق (الرابط بأسفل الصفحة). بنبلش بالألوان الأساسية، بنوزعها، بعدين كل لون ثانوي بيجي بين الألوان الأساسية اللي خلطتها لأحصل عليه) – هاي الدائرة الوهمية اللي صارت عندي هي دائرة الألوان بأبسط أشكالها
بس نخلط لون أساسي مع لون ثانوي (متجاورين على عجلة الألوان)، بينتج عنا لون وسطي.
يعني: لمّا نخلط
أحمر (لون أساسي) + برتقالي (لون ثانوي) = برتقالي محمر
أحمر (لون أساسي) + بنفنسجي (لون ثانوي) = بنفسجي محمر وهلّم جرا
والألوان الوسطية عنا 6 هي
الأصفر المخضّر، الأزرق المخضر، البنفسجي المزرق، البنفسجي المحمر، البرتقالي المحمر، البرتقالي المصفر
لمّا نخلط الألوان الأساسية التلاتة رح نحصل على اللون البني – وبنتحكم فيه من خلال إختلاف كميات الألوان الأساسية المستخدمة. يعني إزا زدنا كمية اللون الأحمر رح يكون اللون البني الناتج محمر شوي و هاكازا
تمام، ممكن نتحكم بدرجة الألوان اللي خلطناها من خلال إضافة الأبيض أو الأسود. الأبيض للتفتيح والحصول على درجات أفتح، والأسود للتغميق و درجات أغمق
ونحنا عم نخلط الألوان، لازم نخلي ببالنا ونعتمد على الألوان الأساسية لنحصل على اللون و الدرجة اللي بدنا ياها. مثلا بدنا نخلط لون معين موجود على التصميم المستخدم بشغلنا، بحاول أتعرف على أقرب لون رئيسي أو ثانوي لهاد اللون اللي بدي أخلطه وأحصل عليه وبعدها أحاول أتعرف على الدرجة.
مثلا – بدنا نخلط اللون المشمشي: بشوف أقرب لون أساسي إله، ما في؟ إزا لازم أشوف أقرب لون ثانوي – البرتقالي بس المشمشي أفتح. إزا رح أحتاج أخلط الأصفر والأحمر أول إشي لأحصل على البرتقالي. بعدها حسب درجة اللون المشمشي رح أضيف كمية من اللون الأبيض لاحصل على درجة قريبة من اللون المطلوب.
حسيت للوان اللي بدي ياه مايل أو ضارب للون أكتر من التاني؟ مافي أي مشكلة بضيف اللون هاد. مثلا حسيت اللون المشمشي مصفر شوي؟ بضيف أصفر وهلم جرا. كله بيعتمد على نظرتكم للون و كيف بتشوفوه
في ألوان معينة ما بنقدر نحصل عليها من خلال الخلط العادي للألوان – متل الفضي والذهبي والألوان الفاقعة/الفسفورية. أي نعم، الفضي هو درجة من السكني والذهبي هو درجة من الأصفر…لكن اللمعة المتعلقة بهدول اللونين بدها أصباغ خاصة، ف الأسهل نشتري هدول الألوان جاهزة
خلط الألوان عبارة عن تجربة بعد تجربة بعد تجربة (وصدقوني ممتعة)، ف نصيحتي إلكم خصصوا وقت معين لتجربوا تخلطوا الألوان وتشوفوا الدرجات اللي بتطلع معكم وشو بيصير لو ضفتوا هاد اللون أو هداك. رح تلاقوا بالمكتبات ومحلات الفنون عبوات صغيرة من دهانات الأكريليك ومش مكلفة ف رح يكون الموضوع إن شاء الله سهل ومش مكلف
و إزا بتحبوا ممكن أخصص فيديو لكيف ندهن ألوان الأكريليك و تقنيات الدهان المختلفة بس إتركولي كومنت أو تواصلوا معي عبر الموقع أو صفحة الفيسبوك
أسأل الله الفائدة لنا و لكم و المرة الجاية رح نحكي عن التأثيرات النهائية