بدكم تشتروا طابعة جديدة؟

السلام عليكم و رحمة الله و بركاته وصباح الخير أو مساؤه

صارلي فترة منيحة عم أعاني من البرنتر أو الطابعة اللي عندي، و قبل اسبوع تقريبا قرقرت إنها خلص تبطل تشتغل (بطلت تسحب الورق غير بصعوبة، و حتى الألوان صار فيها خربطة – آخر مرة طبعت فيها، اللون الأسود طلع أصفر ما بعرف كيف)

تمام، ف بلشت عندي محاولات البحث عن الطابعة الجديدة اللي صار لازم أشتريها، ف قلت بالمرة بحكيلهم عن الأشياء الأساسية اللي لازم ندور عليها وقت ما بدنا نجيب أو نغيّر الطابعة اللي عنا.

متل دائما، رح أحكي بالأمور هاي كلها من وجهة نظر شخصية، ممكن تتفقوا معي ممكن لأ، كله بيرجع لشو إنتوا مجالكم، ميزانيتكم، حاجاتكم أو وجهات نظركم.

على قولة استاذي الرياضيات، أستاذ خضر…خنبلّش – خلينا نبلّش

أول إشي لازم نعرفه إنه في نوعين من الطابعات (أو نوعين من الطباعة بشكل أدق) – عم أحكي عن الطابعات المنزلية البسيطة مش المتخصصة او الصناعية.

النوع الأول – الطباعة العادية و النوع التاني – طباعة الليزر

رح أحاول ألخّص الفروق الأساسية بينهم بهاد الجدول و خلوا ببالكم الارقام اللي موجودة بتعتمد على تجربتي الشخصية و حسب شو كان عندي طابعات على مدى الزمن و أكيد رح تختلف حسب الوقت و نوع الطابعة و هيك، بس عشان تاخدوا فكرة شكل عام

تمام، بعد ما عرفنا الأساسيات عن النوعين المختلفين من الطابعات المنزلية

رح أحكيلكم الطابعات اللي كانوا عندي، و عن الأشياء اللي أنا كنت بدي ياها و ماخدتها بعين الإعتبار بالطابعة الجديدة اللي بدي أشتريها

على مر الأزمان، كان عندي طابعة كانون، عادية (بس أتزكر موديلها بكتبلكم ياه إن شاء الله)، ممتازة و هي اللي كنت بستعملها لهلأ لحتى استسلمت.

و كان عندي طابعة سامسونج
A4 ليزرملونة بحجم 
سعرها كان 250 دينار بالوقت اللي إشتريناها فيه. جيدة لكن أبدا ما بنصح فيها (من بعد تجربتي الشخصية) ما كانت بتطبع على كرتون، خرابها كان سريع جدا و تصليحها مكلف، تعبئة الحبر فيها كان مكلف بس مش متزكرة قديه. ف شطبت عليها بعد ما خرب فيها الدرم و تصليحها كان بسعر وحدة جديدة

و إبن حماي، أعطاني لفترة طابعة نوع
Ricoh
A3  ليزر ملونة حجم 
ممتازة صراحة، لكن سعرها كان ما يقارب ال 2000 دينار
تعبئة الحبر فيها لكل لون 90 دينار تقريبا، يعني ما يقارب ال 360 دينار لكل الأحبار (بس اللهم بتطبع كانت عدد مهول من الأوراق، و بحجم كبير من الورق). بس طلع فيها الدرم مضروب، و بعد محاولات تصليحها المكلفة إستسلمت (أنا اللي استسلمت هالمرة) و قلت لا خلص ما رح أقدر أتعامل معها

تمام…الأشياء اللي بدي ياها و ماخدتها بعين الإعتبار

تكون طابعة عادية
 بعد تفكير عميق، قرقرت إنه ما بدي ليزر. تكلفة عالية على المدى الطويل، و المرات اللي بحتاج فيها تكون الطباعة ليزر أوفرلي و أحسنلي أطبع بالمكاتب أو المطابع المتخصصة

تكون طابعة بخزانات حبر
مش علب حبر(الكارتريدج) . كتير تعبئة الحبر أسهل، و أقل كلفة على المدى الطويل، و طباعتها أحسن (حسب ما خبروني) و حبرها متوفر بسهولة

تكون بتاخد ورق و كرتون
(أو بتاخد سماكات مختلفة من الورق و الكرتون)، بحيث أقدر أعمل مشاريع مختلفة بمجالات متعددة

سعرها يكون منطقي
أنا ميزانتي كانت لحد 160 دينار تقريبا

ف اللي عملته، بحبشت بعدة صفحات على الفيسبوك لمحلات الطابعات، ورحت على كزا محل لأقارن الأسعار و أشوف شو بيناسبني أكتر إشي، و أهم أهم إشي، من الموديلات اللي شفتها، شفت الريفيوز عليها من المواقع و الشركات الأصلية و الأجنبية، لانه هيك باخد فكرة عن سيئاتها و حسناتها و أشوف شو ممكن يناسبني و اللي ممكن ما يناسبني.

و خلّوا ببالكم، بالطابعات، في أنواع معينة جدا بنصح فيها بشكل كبير، الكانون و الإتش بي، لكن بعد البحبشة و التدوير، لقيت إنه البروذر و الإبسون أنواع ممتازة و عليها العين. تمام، رحت على ليدرز بعد ما لقيت موديل برنتر إبسون بالمواصفات اللي بدي ياها، فلموني فلم لا يُعاد و لا يٌكرر (لإنه بحياتي ما رح أرجع لعندهم بعده) ف قلت ما إلي إلّا أروح على محل إسمه الأوائل للطابعات و الأحبار (هو اللي بتعامل معه صراحة من زمان). ليش ما رحت عليهم من الأول؟ لإنه ليدرز تحت بيتي تقريبا و أقرب و كان عندهم الموديل اللي بدي ياه، و الأوائل بالجاردنز ف استبعدت المشوار الله يسامحني…ما علينا

رحت لعندهم و مع الحكي و الإستفسار، نصحوني آخد نوع تاني، خصوصي لإنه بدي أطبع على كرتون سميك بشكل متكرر، و قرقرت بعدها آخد الطابعة اللي إشتريتها، نوع بروذر و سعرها 140 دينار (مع حبرها و كل إشي متعلق فيها). 

بس هاي هي السولافة بعد طول سيرة.

ف كتلخيص، إزا بدكم تشتروا طابعة الأشياء اللي بنصحكم فيها

أول إشي
قرقروا النوع اللي بدكم ياه، ليزر أو عادي. الليزر إلّا إزا كمية الطباعة عندكم كبيرة و كتيرة (بحيث إنه ما توفي تطبعوا بالمكتبات) و مو محتاجين وضوح و دقة صور عالية، ما تشتروها
تاني إشي
هلأ النوع العادي، عندكم خيارين. تعبئة خزانات أو علب خاصة (الكارتريدج)
Cartridges 
 إزا كمية الطباعة عندكم كبيرة و بتستهلكوا كميات وصور كبيرة و بشكل متكرر الأحسن تاخدوا طابعة بخزانات حبر. إزا طباعتكم بشكل عادي بس متكرر و هيك الأحسن تاخدوا طابعة بعلب حبر. السبب إنه طابعات خزانات الحبر بيجوا بسعر أغلى من الطابعات اللي بعلب حبر

تالت إشي
نوع أو براند الطابعة
بعد السؤال و الإستفسار و التجربة، الكانون و الإتش بي و البروذر و الإبسون أفضل أنواع ممكن تاخدوا منها. أي نوع و أي موديل بيرجع للفروق البسيطة. مثلا متل ما قلتلكم كنت أنا حابة إبسون، بس طلعت ما بتطبع على قياسات سميكة من الورق (ما بتسحبها بسهولة) لكن البروذر ما عندها مشكلة ف عشان هيك كان تغيير القرار و عشان هيك إشتريت البروذر. ف إنتوا حسب شو طبيعة شغلكم و طبيعة الطباعة اللي بدكم ياها بتشوفوا شو الموديل اللي بيناسبكم. و حسب كمان الإضافات و الخصائص التانية اللي ممكن تفيدكم، من سكانر لوصلة وايرليس و بلوتوث و اللزي منه

و كخلاصة، السامسونج إبعدوا عنها بالطابعات, و ليدرز إزا بدكم تشتروا منهم و لا بد، إشتروا منهم أون لاين مش من المعرض لانه فرق السعر بين الموقع أون لاين و المعرض مهول.