غرا أو لاصق الديكوباج

رح نتعرف على غرا الديكوباج و خصائصه – و كيف نصنع البديل المنزلي 

الفيديو بأسفل الصفحة

في عنا أصناف وماركات كتيرة من غرا أو لاصق الديكوباج، لكن العامل المشترك بينها كلها هو إنه غرا أو لصق سائل بينشف شفاف، وخالي من الحمض. لاززززم يكون خال من الحمض، عشان الحمض مع الوقت بيسبب إصفرار الورق، ف إزا استعملنا نوع من الغرا فيه حمض (محمض) مع الوقت القطعة تاعتنا رح تصفر وتتغير ألوانها بسبب تفاعل الحمض مع الورق

حسب نوع و صنف الغرا اللي عم تستعملوه، بس ينشف بيكون اله تأثير معيّن. مثلا،عنا أكتر أنواع المستخدمة بالديكوباج هي الغلوس و  المط – أو متل ما بنقول عنا بالأردن مطفي. يعني الغلوس بس ينشف الغرا بيكون إله لمعة ظاهرة، و المطفي أو المط بيكون بدون اللمعة

هون أنا دهنت قطعة كرتون لونها أسود، بنوعين مختلفين من الغرا – واحد مط و واحد بلمعة التنين شفافين كنيتجة نهائية لكن بتلاحظوا اختلاف اللمعة النهائية.

وفي أنواع (حسب الماركة) بتكون مثلا إكسترا غلوس (لمعة زيادة) أو إشي بجليتر وإشي بدون، و في أنواع مخصصة للقماش أو ضد الرطوبة و العوامل الخاجية. كله بيرجع لشو إنتوا بدكم مشروعكم والتأثيرات اللي بدكم ياها. من أشهر الماركات المعروفة لغرا الديكوباج هو المود بودج،*** مش مودج بودج***. بالأردن تقريبا علبة ال 8 أونصات (236مل) ب 8 دينار (السعر حسب آخر مرة إشتريته ممكن يكون مختلف من وقتها لهلأ) من عند محل – شي كان سكراب بوكنج- بالرابية، و متوفر أيضا بمكتبة قرطاسية الشرق الأوسط، و صفحات معينة على الفيسبوك. (متوفر حاليا أنواع مختلفة من غرا الديكيوباج لدى مكتبة جالاكتيك، و جوردان آرت شوب) . .أما بالخليج متوفر كتير ماركات و بكتير محلات، مثلا من جرير بتلاقوها أو بدبي مثلا بمحل ميدل إيست كرافتس.

الماركات تانية غير المود بودج، منها كادنس أو إلينّز أو ليكويتيكس أو جولدن أكريليك، كلهم نفس المبدأ و نفس طريقة الإستخدام بيرجع لإلكم والماركة اللي بتريحكم بالشغل أكتر، أو اللي بتلاقوه متوفر محليا عندكم بالبلد

ما لقينا ولا ماركة؟ عم نستهلك كميات كبيرة والموضوع صار مكلف؟ بنقدر بكل سهولة نعمل غرا الديكوباج الخاص فينا. لكن، خلي ببالكم، حسب المواد اللي رح أستعملها بالتصنيع وجودتها رح تكون جودة الغرا النهائي. نصيحتي إلكم إزا كان الغرض من الغرا شغل لقطعة شخصية إلكم (مش مبيعاتكم) بتقدروا تستعملوا الخليط البيتي، لكن إزا كان الغرض لقطع مبيوعة أو شغل ، الأفضل تستخدموا الأنواع الخاصة لأنها بروفيشينال أكتر وخصائصها أفضل

إزا دورتوا بالنت، رح تلاقوا كتير وصفات لكن  أسهلها (بعد تجربة)هي —-

غرا الديكوباج البيتي = غرا خشب أبيض جودة عالية + موي

اللعبة رح تصير بالنسب بين غرا الخشب والموي. غالبا أنواع غرا الخشب الأبيض بتكون خالية من الحمض لكن تأكدوا قبل ما تبلشوا للإطمئنان. الأغلب رح يقولكم نفس مقدار الموي لنفس مقدار الغرا

أنا رح أقولكم، حسب نوع الغرا. أنواع غرا الخشب بتختلف من بلد لبلد ومن ماركة لغيرها. عشان هيك، لما تخلطوا خلطتكم، حطوا كمية من الغرا، وزيدوا عليها الموي شوي شوي مع الخلط (و الأفضل تستعملوا فرشاية للخلط أسرع و أفضل لنحصل على خليط متجانس من الموي و الغرا)، لتوصلوا لقوام قريب من العسل الخفيف – شوفوا بالفيديو عشان تعرفوا قصدي. وإنتوا مع الشغل رح تلاقوا حالكم بتعدلوا عالخليط وبتاخد إيدكم عليه لتوصلوا للنسبة اللي بتناسب شغلكم. وحدة من الأشياء اللي لازم نخليها ببالنا، الغرا اللي إحنا بنعمله ما إله لمعة، اقرب لغرا الديكوباج المطفي اللي حكينا عنه لفوق

و عشان نحافظ على الغرا اللي عملناه، بنحطه أو بنفرغه في وعاء إله غطاء ممكن نغلقه بشكل محكم. عادة أنا بستعمل مرطبان زجاجي إله غطاء ( مثلا مرطبات النيوتيلا بس تخلص و أغسل المرطبان منيح ) أو ممكن أشتري من عند محلات الأدوات المنزلية