ورق الديكوباج

الفيديو بأسفل الصفحة

واحد من العوامل المهمة بعملية الديكوباج هو الورق اللي بنستعمله عشان نحصل على التصميم اللي بدنا ياه وبأفضل النتائج. رح نحكي عن أنواع الورق المختلفة اللي ممكن نستعملها وكيف نصنع أو نحصل على بديل لورق الديكوباج المتخصص إزا ما كان متوفر محليا

أهم إشي بورق الديكوباج يكون خفيف ( ال جي إس إم يكون قليل). ليش؟

عدة أسباب، منها كل ما كان الورق أخف كل ما كان أسهل إنه يبيّن شغلنا كأنه جزء من السطح اللي عم نشتغل عليه مش إضافة عليه، وهادا الإشي بينتج عن خاصية الشفافية الجزئية الموجودة بورق الديكوباج. وكمان إنه الورق الخفيف ما بيسبب أي ارتفاع عن السطح أثناء العمل، بسبب سماكته القليلة، بينما الورق السميك، بتصير حدود الورق متل النتوءات أو الخطوط البارزة نوعا ما عن سطح العمل. السبب التاني، الورق كل ما كان أرفع/أخف بيكون من السهل تنيه حول الزوايا والأشكال المنحنية دون تشققات أو تمزقات، بعكس الورق السميك.. هلأ ممكن تحكوا هاي الأسباب أو الفروقات بسيطة كتير، لكن هي اللي بتميّز الشغل المتقن

ورق الديكوباج الخصوصي (الخاص بالديكوباج) عادة بيكون بين 20 لـ 45 جي إس إم. في عدة ماركات ومصنعين وتصاميم, بتقدروا حسب الفكرة اللي ببالك تختاروا الأشكال أو التصميم الي بيعجبكم. ورق الديكوباج الخاص متوفر بعدة أشكال منها الورق قليل الجي إس إم، أو ورق الرز أو النابكنز (اللي هو المناديل الورقية بتصاميم وموديلات متعددة). لكل واحد إيجابيات وسلبيات، لكنها تعتبر أفضل الأنواع للعمل والشغل بالديكوباج. أغلى بالسعر شوي، ممكن تكون غير متوفرة محليا ، وإن توفرت محليا التصماميم اللي ممكن تكون مناسبة قليلة جدا. بالأردن مثلا، ورق الديكوباج غير متواجد بالمكتبات الكبيرة وغير متوفرإلّا بمتجرين والتصاميم عندهم محدودة جدا ف بالتالي لازم نلجىء للطلب عبر الإنترنت لنحصل على تصاميم وخيارات أكتر (كلفة أكتر بكتير والوقت الزمني للشحن  طويل). لكن بدول الخليج ما عندهم هاي المشكلة حيث موجود تشيكلة واسعة ومتاجر كتيرة متخصصة حتى بالديكوباج (جرير فيه متوفر مجموعة جيدة من أوراق الرز، وفي دبي وأبو ظبي مثلا متاجر متخصصة في مجال ومنتجات الديكوباج، غير التجار الأونلاين اللي بيوفّروا الورق محليا)

تمام, ما بنقدر نوصل للورق الخاص (ساكنين بالأردن متل حالاتي مثلا؟) ما في مشكلة عنا بدائل إن شاء الله

أولها، ممكن ندوّر على المناديل الورقية العادية للسفرة اللي ممكن نلاقيها بمحلات الأدوات المنزلية، اللي بيكون عليها تصاميم مختلفة، بختار اللي تناسب شغلنا وذوقنا. منها بيجي بطبقتين أو 3 طبقات (مهما كان عدد الطبقات، بنشيل كل الطبقات ما عدا الأولى اللي عليها التصميم). مشاكلها: أغلبها بيجي بحجم صغير، والتصميم نفسه بيتكرر على أجزاء المنديل ف ما بيكون عندي تنوّع بالأشكال بالمنديل الواحد لكن ممتازة لتكرار القطع بنفس التصميم

البديل التاني هو بنقدر نطبع ورقنا الخاص. هون الموضوع رح يتشعب شوي. الطباعة نوعين، طباعة  إنك جت – نافثة للحبر (أو المتعارف عليها بالطباعة العادية)  وطباعة الليزر. ممكن نطبع على ورق متخصص (ورق الديكال – هاد رح نحكي عنه بعدين بشكل منفرد وخاص إن شاء الله) أو بنقدر نطبع على الورق العادي أو نطبع على ورق خفيف (جي إس إم قليل المعروف بورق النقل/الباترون/السندويشات) أو المناديل الورقية. حسب نوع الطباعة بتحدد نوع الورق المستخدم الممكن نستخدمه

طباعة الليزر

هاد النوع من الطباعة ممتاز للشغل بالديكوباج لأنه بسبب طريقة الطباعة (الحبر المستخدم مع التونر والحرارة العالية) الحبر ما بيتسرب. بيضله ثابت ما – بسيّل – متل ما بنحكي بالعامية بالأردن. فبالتالي ما بنحتاج أي خطوات تأسيسية للورق قبل التطبيق والدكبجة

لكن، هاد النوع من الطباعة مكلف، وما بنقدر نطبع غير عالورق العادي (لمعظم أنواع الطابعات المنزلية). الورق الخفيف أو المناديل الورقية طبيعة الطباعة ممكن تعملنا مشاكل لا سمح الله أقلها تلف الطابعة (ممكن تسكر الطابعة ويعلق المنديل أو الورق الخفيف داخل الطابعة و تسبب عطل ميكانيكي على سبيل المثال). في متوفر طابعات ليزر منزلية، لكنها مكلفة (الملونة حجم العادي/ الصغير تكلفتها تقريبا 250 دينار و طالع، ما عدا إعادة تعبئة الحبر ب 70 دينار لكل لون – الأرقام هاي حسب الطابعة التي أمتلكها شخصيا) ف نصيحتي، إطبعوا عند مكاتب الطباعة (المطابع) المتخصصة . رح يكون عليكم أوفر و اسهل عالمدى البعيد وبتقدروا تطبعوا أحجام أكبر

طباعة الإنك جت – الطباعة النافثة للحبر

والمقصود فيها الطباعة بتكون برش- نفث الحبرعلى الورق، مافي تثبيت للحبر على الورق باستخدام التونر والحرارة. يعني، إزا حطينا غرا الديكوباج يرح يتسرب الحبر ويسيّل خاصة إزا كانت الألوان كتيرة أو متفاوتة بالشكل المطبوع. عشان هيك، رح نحتاج نعمل خطوات تأسيسية للورق قبل ما نشتغل فيه أوندكبج عشان نضمن شغل نظيف وألوان/حبر ثابتة مش متسربة

الحلو بهاد النوع من الطباعة إنه بنقدر نستعمل أي طابعة منزلية, تكلفته قليلة (الطابعات ذات جودة عالية أسعارها مقبولة ومقدور عليها – بحدود ال 30 لـ 75 دينار بتحصلوا على أنواع جيدة) وإعادة تعبئة الحبر أيضا مقبولة التكلفة ( حسب نوع الطابعة لكن ما بين 16 ل 32 دينار – الأسود والملوّن معاً) مرة تانية الأرقام هاي حسب نوع الطابعة اللي أمتلكها شخصيا. وكمان بنقدر نطبع على الورق العادي بالإضافة للمناديل الورقية والورق الخفيف

كيف نطبع عالمناديل الورقية والورق الخفيف؟

رح أحكيلكم كيف أنا بطبع، في طرق كتيرة ومختلفة، لكن بالنسبة إلي لقيت الطرق الأسهل والأقل كلفة بعد عدة تجارب

طباعة المناديل الورقية

أنا بستعمل مناديل ورقية بيضاء اللون كبيرة الحجم، 3 طبقات بيكون المنديل. وحجمه بيجي 40*40 سم، أكبر من حجم ورق الطباعة العادي.  بثبّت المنديل الورقي على ورقة طباعة عادية ( 80 جي إس إم مناسب) وبحاول ما أستعمل أطراف المنديل اللي بتنكون منقطة ومكبسّة مع بعض، أحلى للطباعة. كتير ناس بيستعملوا إصبع الغرا العادي (بتاع المدارس يا جماعة) على داير/ محيط الورقة وبيثبتوا المنديل. أنا هادي الطريقة ما بنصح فيها، لأنه مرة على مرة ممكن الغرا يأثر على الطابعة (المناديل الورقية كتيييير رفيعة وممكن الغرا يتكتل/يكلكع ويتسرب من تحت المنديل للمسننات اللي بتسحب الورق وبتحركه وييجي عليها ويؤثر عالطابعة) و أنا شخصيا كانت الورقة تعلق بالطابعة. أنا بفضل أستعمل اللاصق ثنائي جهة اللصق، أو المعروف باللاصق دبل فيس، الرفيع مش السميك ديروا بالكم

رح نحتاج: ورقة عادية، منديل ورقي كبير, و لاصق دبل فيس – لاصق الدبل فيس متل ما حكينا لازم يكون رفيع و بتلاقوه بأغلب المكتبات. ببدأ بتجهيز الورقة العادية، بلصق الدبل فيس على جهة كاملة من الورقة (وقت الطباعة لازم أتأكد إنه هاي الجهة لازم تكون أول إشي داخلة عالطابعة) و الجهة التانية بلصق الدبل فيس عالزوايا و بعدين عالجوانب بس مش ضروري يغطيها كلها

المنديل الورقي عادة بيكون مطوي، ف رح يكون في عنا نوع من الكرمشة أو الجعلكة، عشان أخلص منها و ما يصير عندي مشاكل بالطباعة، بثبت المنديل من أطرفاه بشكل مشدود على سطح العمل. بعدين بجيب الورقة العادية اللي جهزتها و بلصقها على المنديل (بحاول أبعد عن الأطراف). المناديل الورقية عادة بتكون طبقات، ف على عدد الطبقات بكون جهزت ورق عادي و بكرر الخطوات. بعدين بقص زوايد المنديل على قد الورقة العادية و هيك بتكون جاهزة للطباعة و بطبع عليها متل ما بطبع عالورق العادي

رح تتوضح الطريقة بالفيديو الموجود أسفل الصفحة 

Sandwich paper – tracing paper

  ورق السندويشات أو ورق النقل/ الباترون

بتلاقوا منه بالمكتبات الكبيرة، أنا أخدت تقريبا 25 – 30 ورقة بحجم 50*70 سم بسعر 3.5 دينار. ممكن تلاقوا منه بحجم 21*27.9 سم اللي هو حجم ورقة الطباعة العادي، بس السعر مختلف شوي بيكون. الحجم الأكبر بيجي أرخص شوي لكن عندكم بيكون مشكلة قصه بحجم ورق الطباعة. إنتوا عندكم الخيار. تمام، صار عندي الورق بحجم ورق الطباعة،باستخدام لاصق ثنائي اللصق (الدبل فيس) الرفيع مش السميك، بثبت الورقة الخفيفة على ورقة عادية (بضيف اللاصق على محيط الورقة وبلصق الورقة الخفيفة) وبعدها عالطابعة. بعد الطباعة رح نعمل خطوة بسيطة لتثبيت الحبر رح نحكي عنها بعد طباعة المناديل الورقية

 كيف أثبّت حبر الطباعة العادية عشان ما يتسرب وقت إضافة غرا الديكوباج؟

ممكن أرش الصور المطبوعة بمثبّت رش أكريليك، متوفر بالمكتبات الكبيرة قسم اللوحات والفن، أو ممكن سبري مثبت الشعر (لكن هاد ما بيعطينا تثبيت جيد). ممكن الورنيش أو اللكر الرش، لكن لقيته بيأثر على الألوان، بخليها تصير نوعا ما أخف أو أبهت. في ناس بيستعملوا الإيبوكسي المخفف بتنر، لكن رائحته كتير قوية ما جربتها حتى صراحة (ممكن مع الورق العادي أستعملها، لكن مع الورق الخفيف والمناديل الورقية رح يكون صعب دهن الخليط لأنهم كتيير رقيقين

أنا رح أحكيلكم عن طريقتي

في بالمكتبات الفايلات أو السلايدات الشفافة (أو ملونة ما بيهم) اللي بتكون بحجم ورق الطباعة العادي ، اللي بنستعملها كغلاف للتقارير أو الريبورتات (يرحم أيام الجامعة والهوم ووركات). بتلاقوها بكل المكتبات وأبدا مش مكلفة ,أنا مثلا اشتريت 100 سلايد ب 3.5 دينار كأنه. إنتوا ممكن ما رح تحتاجوا هاي الكمية لأنه ممكن أعادة إستخدام السلايد نفسه أكتر من مرة أو استخدام الجهتين

بجيب سلايد، وبدهن عليه طبقة متوسطة من غرا الديكوباج، رح تلاحظوا إنه رح يبلش الغرا يفصل عن بعض ويصير عندكم متل الفراغات ف الأفضل نشتغل على مساحات صغيرة ع كل مرة. بعدين بجيب القطعة اللي طبعتها (المنديل أو الورقة الخفيفة اللي رشيتهم) وبضعها فوق طبقة الغرا اللي دهنتها (المنديل ما بيهم أي جهة بحط الصورة لأنه رفيع وبيتشرب الغرا، لكن الورق الخفيف لازم أحرص إنه تكون جهة الطباعة اللي بحطها على طبقة الغرا)، بدير بالي ما يصير عندي فراغات أو فقاعات, أبددددددا ما أحرك القطعة فوق الغرا. بس تثبت جميع أجزاء الصورة المطبوعة بتركها لتنشف. بس تنشف بزيلها/بقيمها عن السلايد بحرص وشوي شوي (غرا الديكوباج أبدا ما بيلصق بالبلاستيك، والسلايد مصنوع من البلاستيك. إزا كان عم تستعملوا غرا مصنوع يدوي- متلا جربتوا الخلطة اللي قلنالكم عنها بالفيديو السابق)، جربوه قبل الشغل مع صورة زيادة  لتختبروا قوة إلتصاقه مع السلايد

الصور المطبوعة عالورق العادي (ممكن أستخدم الطريقة السابقة، بس لأنه الورقة مقلوبة ومش شفافة ما رح أعرف إزا صار عندي فقاعات هوا أو إنه الغرا وصل لجميع أجزاء الصورة)، ف ممكن أدهن طبقة من غرا الديكوباج مباشرة على الصورة المطبوعة، لكن بإتجاه واحد من طرف الصورة (ببّلش من برا الصورة) للطرف التاني، وما برجع فوق المنطقة نفسها مرتين (حتى لو ما إجى عليها غرا)، بترك الطبقة الأولى من الغرا تنشف، وبرجع بدهن طبقة تانية من الغرا وهيك بكون غطيت كل الصورة بغرا الديكوباج. بدها ممارسة لتاخد إيدكم عليها لكنها بتعطي نتائج جيدة. ممكن إستخدام اللكر المائي بدل غرا الديكوباج بنفس الطريقة لكن بس ينشف بيكون بشكل طبقة سميكة نوعا ما وما بيكون بدرجة شفافية الغرا – بتلاقوه بمحلات مواد البنا و بستعمله فقط كطبقة نهائية

ليش نثبّت حبر الطباعة؟

حبر الطباعة العادية ممكن يسيل مع غرا الديكوباج. ف ممكن الصورة تصير مش واضحة أو الألوان تخلبط مع بعض، و ممكن حتى تتأثر المناطق المحيطة بالصورة و تتوسخ.