كيف أختار نوع الريزن المناسب لمشروعي؟

تمام، بعد ما حكينا عن أنواع الريزن، و خصائصه، بنقدر هلأ نختار النوع الأفضل لمشروعنا إعتمادا على النقاط الأساسية

و أهم نقاط لازم تكون موجودة بالريزن اللي بدنا نستعمله للأغراض الحرفية و لاااااااازم نتأكد منها قبل ما نشتغل فيه

خالي من المواد المتطايرة

خالي من المذيبات

و إزا كان بدنا نستعمله و يكون في ملامسة للأكل أو الشرب – للللاااااازم يكون في شهادات مصدقة من المؤسسات المتعلقة بالموضوع. و الأفضل بشكل عام، ما نستخدم الريزن بأي اشياء متعلقة بالطعام أو الشراب

هدول النقاط اللي لازم أتأكد منها وقت ما بدي أستعمل أي نوع من الريزن. إن كان ايبوكسي أو UV او شو ما كان

أغلب المشاريع المنزلية اللي أساسها الريزن، بيناسبها نوع معيّن (سعر متوسط لنتائج ممتازة، بنقدر نشتغل فيه بظروف عادية، رائحته للأنواع الجيدة خفيفة جدا، أدوات السلامة الضرورية سهل التعامل معها و الحصول عليها) كنقاط أساسية للإختيار. و النوع اللي متوفرة فيه كل هاي النقاط هو الإيبوكسي، حيث إنه موجود منه أنواع للصب أو للتغطية، موجود بخصائص مختلفة من ناحية اللزوجة و أوقات التصلّب (ضمن المعدّل) و متوفر بعدة أماكن و سهل الحصول عليه

ف هلأ بيكون لازم ناخد بعين الإعتبار طبيعة شغلنا و شو نوعية القطع اللي بدنا نعملها؟ بدنا نعمل لوحات مثلا؟ بدنا نحمي طاولات أو رسمات/أشغال عملناها؟ حيث تكون طبقة الريزن رفيعة – لازم نختار نوع مخصص للتغطية

يعني رح نختار ريزن إيبوكسي مخصص للتغطية

بدنا نعمل نصب بقوالب (كوسترات أو صواني أو غيره)؟ بدنا نصب طاولات مع قطع خشب و غيره؟ حيث إنه طبقة الريزن رح تكون سميكة – لازم نختار نوع مخصص للصب

يعني هيك لازم نختار ايبوكسي مخصص للصب

إختيار النوع المناسب (صب أو تغطية) بيريحنا بالشغل و بيوفر عليها اي تكلفة زيادة و بيحمينا من أي مشاكل ممكن تصير أثناء الشغل أو بعده

هلأ ممكن يكون مجال شغلنا قطع صغيرة، مثل المجسمات أو الإكسسوارات أو المصغرات…هون بيصير عنّا المجال نشتغل باليوفي ريزن. UV resin. لكن بسبب تكلفته العالية ممكن استخدام الإيبوكسي ريزن لكن أكيد بيكون عنا عوامل مختلفة متل وقت التصلّب و الوقت المفتوح للعمل و غيره، هون بترجع إلكم الأمور حسب شو بيناسبكم أكتر

شخصيا شو ما كانت الأسباب ما بنصح بإستخدام ريزن البوليستير منزليا أبدا و بشكل مطلق. مخاطره الصحية تفوق و بشكل كبير أي توفير بالتكلفة ممكن يصير. و صحيا كتير خطير. ف إزا بدكم تشتغلوا بالريزن (بمشروع منزلي او صغير) رجاءا رجاءا لا تستعملوا البوليسيتر

بشكل عام، الريزن المخصص للصب بنقدر نستعمله لأغراض التغطية بس العكس مش صحيح. ريزن التغطية ما بنقدر نستعمله لمشاريع الصب إلا بشرط واحد (الصب على طبقات)… كيف يعني؟

يعني، أنا عندي مشروعي أو شغلي أعمل قطع سماكتها 1 سم. مثلا بدي أعمل توزيعات بشكل أحرف، و سماكة كل حرف بدي ياها تكون 1 سم على سبيل المثال

ريزن الصب، بقدر أصب كل حرف على مرة وحدة و بدون ما آكل هم أي مشاكل

ريزن التغطية؟ ما بقدر أصب الحرف بهاي السماكة على مرة وحدة (بيصير عندي إرتفاع كتير بدرجة الحرارة، ممكن يطلع عندي دخان، ممكن يدوب القالب، ممكن تدوب كاسات الخلط…ممكن في حالات شديدة يصير عندي إشتعال أو نار لا سمح الله (الريزن بحد ذاته غير قابل للإشتعال الذاتي، بس الألوان أو الإضافات الأخرى ممكن تشتعل)

كيف بقدر أعمل الحرف من نوع ريزن مخصص للتغطية؟ على طبقات. بصب طبقة رفيعة، و بخليها تتصلب، بعدين كمان طبقة بصب -رفيعة أو بسماكة قليلة- و أخليها تتصلب، و أكرر العملية لحتى أوصل السماكة المطلوبة.مثلا، مشروعي أغطي لوحة بطبقة رفيعة من الريزن؟ بقدر أستعمل النوعين

الخلاصة – بعد الحكي هاد كله – ريزن الصب أشمل بالشغل. الفرق بين أنواع الصب و التغطية؟ السعر مثلا، الشفافية و درجات اللمعان. أشياء بسيطة لكن على المستوى الإحترافي مهمة و بتدخل بقرار الإختيار