الفيديو بأسفل الصفحة
الدهانات الأكتر إستخداما في مجال الديكوباج هي دهان/ألوان الأكريليك. بتلاقوها في أغلب ومعظم المكتبات ومحلات القرطاسية والفنون. بتختلف حسب الماركة والجودة والسعر والكثافة. في أنواع بتكون سائلة أكثر من أنواع تانية اللي بتكون نوعا ما جامدة/كثيفة وباختلاف الكثافة بتختلف التغطية. شو قصدنا بالتغطية؟
المساحة الممكن تغطيتها أو دهانها بكمية معينة من اللون/الدهان. الأغلب (مش دائما يعني) إنه كل ما كان دهان/لون الأكريليك كثافته أقل (يعني سائل أكتر) تغطيته أعلى (بيغطي مساحة أكبر) لـــــكن، شفافيته أعلى (بحتاج عدد أكبر من طبقات الدهان عشان أغطي السطح بشكل كامل). واللون الأجمد (الكثيف أكتر)، تغطيته أقل, لكن شفافيته أقل كمان. يعني عدد طبقا أقل لتغطية سطح العمل
الألوان اللي لازم تكون عندكم بشكل أساسي – الأبيض – كميات مهولة (كبيرة، يعني نجيب العلبة الكبيرة أو الأنبوب الحجم الكبير من اللون) لأنه اللون الأبيض بنستخدمه بشكل أساسي وكبير بأعمال وأشغال الديكوباج. من تأسيس وخلط الأوان وتخفيفها للـتأثيرات وتعتيق وغيره
الألوان التانية؟ أكيد حسب رغبتكم والألوان اللي بتحتاجوها. لكن، ممكن إزا عندكم مساحة التخزين صغيرة, أو ما بتستخدموا كميات كبيرة من الدرجات المختلفة وما لقيتوا أحجام صغيرة من المستوعبات، ممكن تستخدموا الألوان الأساسية (أزرق – أحمر – أصفر ) واللون الأبيض والأسود كمان وتخلطوها لتحصلوا على اللون اللي بدكم ياه. مثلا، نخلط الأصفر والأحمر ليعطينا برتقالي (بدنا ياه درجة افتح بضيف أبيض، أغمق بضيف أسود)، أحمر وأبيض بيعطينا زهري وهلم جرا. الحلو بهاي الطريقة، ما بتحتاجوا ألوان كتيرة (بتوفروا بالمال ومساحة التخزين) وممكن تحصلوا على درجات معينة من اللون مش متوفرة بشكل جاهز (مثلا بتحتاجوا للون يماثل الورق اللي عم تستعملوه وما في الدرجة بشكل جاهز في المكتبة أو محل القرطاسية). لكن، المشكلة، بتحتاجوا لمعرفة مسبقة بنظرية الألوان (لتعرفوا أي لون تخلطوه مع أي لون لتحصلوا على المطلوب) وأيضا لما تخلطوا الألوان، من المستحيل (خلونا نحكي من الصعب جدا جدا جدا جدا جدا جدا) نحصل على نفس الدرجة يدويا. الإشي هاد بيكون مشكلة كبيرة، إزا وإحنا عم نشتغل خلصت الدرجة المعينة وإضطرينا نرجع نخلط لون مرة تانية. لكن، مع الممارسة والشغل بيصير عندكم خبرة وتقدير للكمية اللي ممكن تحتاجوها وتصيروا تخلطوا كميات مناسبة من اللون. وتخلطوا كميات زيادة أفضل من كميات قليلة وينقص عليكم اللون. الكمية الزيادة من اللون ممكن حفظها بوعاء محكم الإغلاق وتستعملوها لمشاريع وأعمال تانية أو تخلطوها مع ألوان تانية لتحصلوا على درجات مختلفة من اللون
تمام، خلط الألوان عشان نحصل على الدرجة اللي بدنا ياها
دائما نخّلي ببالنا – ممكن أضيف لكن مش ممكن أشيل/أنّقص : يعني أنا ممكن أزيد من اللون أو أضيف كمية معينة من اللون لكن مستحيل (بعد الخلط أكيد) أخفف من اللون اللي ضفته. عشان هيك، وخصوصا للألوان الفاتحة، أضيف الدرجة الغامقة قليل/شوي وبعد الخلط أقرر إزا لازم أضيف كمان أو لأ. مثلا, بدي أخلط لون سكني، رح أحتاج الأبيض والأسود. على كمية الأبيض بزيد الأسود بكمية قليلة وبخلط وهلم جرا لأوصل للدرجة اللي أنا بدي ياها. محتاجة اللون البنفسجي/النهدي، على اللون الأحمر بزيد الأزرق شوي شوي ونفس الخطوات (بدنا ياه درجة افتح بضيف أبيض، أغمق بضيف أسود)
سهّل كتير أغمّق اللون، لكن صعب أرجعه لدرجة فاتحة
وإزا حابين تعرفوا عن خلط الألوان والدرجات الناتجة إحكولنا/إبعتولنا وإن شاء الله بنفصّل بالموضوع أكتر ببوستات منفصلة إن شاء الله
لدهان سطح العمل بألوان أو دهان الأكريليك ممكن إستخدام الفرشاة العادية أو الإسفنج. الفرشاية العادية سهلة الإستخدام ومريحة، لكن ممكن تعطينا خطوط ظاهرة في طبقة اللون بس ينشف أو حسب جودة الفرشاة. الفرشاة الإسفنج سريعة الإستخدام وبتغطي المساحة بشكل أسرع لكن بتتطلب كمية نوعا ما أكبر من الدهان أو اللون لكنها نوعا ما مكلفة أكتر من الفرشاة العادية. كبديل ممكن إستخدام الإسفنج العادي (من محلات التنجيد أو الموبيليا) وقصه أو تقطيعه لقطع صغيرة حسب المطلوب وإستخدامها. شخصيا أنا هاد اللي بعمله، وكتير أوفر من إنه أشتريهم
ليش الأكريليك مش نوع تاني من الدهانات أو الألوان متل الألوان المائية أو الزيتية؟
ببساطة وبدون ما نوّسع بالموضوع كتير. الألوان المائية شفافيتها عالية جدا, ف رح أحتاج أدهن سطح العمل مرات عديدة لأحصل على تغطية كاملة، وتاني إشي بس أضيف غرا الديكوباج (لأنه أساسه مائي) ممكن ترجع تتفاعل مع الغرا وتسبب بتسرب وسيلان اللون مع الغرا (لكن ممكن إستخدامها لإضافة تأثيرا نهائية بشكل مركز وكمية ماء قليلة جدا، بس مش شائع إستخدامها). الألوان الزيتية ما بتقدر تشكل أي نوع مع الروابط مع غرا الديكوباج ف أي غرا رح أدهنه على الألوان الزيتية ما رح يمسك (شخصيا ما جربت الألوان الزيتية مع شغل الديكوباج وما شفت حدا بيستخدم الألوان الزيتية). فكروا فيها من مبدأ الموي والزيت ما بينخلطوا أو يماسكوا، نفس الإشي الألوان الزيتية – زيت- وغرا الديكوباج -موي-. ف خلّونا على الأكريليك يا ما احلاه وشو سهل إستخدامه
التأثيرات
بعد تجهيز وتأسيس سطح العمل بيجي عنّا دور التأثيرات اللي بدنا نضيفها على سطح العمل, وبتكون إمّا قبل أو بعد الدكبجة.
يعني, عنا تأثيرات لازم نعملها على سطح العمل قبل إضافة ورق الديكوباج ( الدكبجة) عشان نحصل على التأثير المطلوب بدون التأثير على الورق ووضوحه. هاي رح نحكي عنها التأثيرات الإبتدائية
وعنا التأثيرات اللي بنعملها أو بنضيفها على سطح العمل بعد الدكبجة. هاي رح نحكي عنها التأثيرات النهائية
التأثيرات كتيرة وصعب نعددها كلها – أي إضافة أو طريقة شغل أو حركة ممكن تعتبر تأثير – بس رح نحاول نذكر التأثيرات الأكثر شيوعا أو المعروفة بشكل أساسي. التأثيرات اللي رح نحكي عليها:
التعتيق – تشكيل سطح العمل – الكراكل – الأختام والستنسلز
وعلى قولة أستاذ خضر – أستاذي الرياضيات في الزمانات – خنبلّش… يعني خلينا نبلّش.
التعتيق
هو إنه نعطي القطعة مظهر معتّق – قديم، إنه القطعة مش جديدة لكن صارلها فترة من الزمن، متل الأنتيك (أنتيكة) . ممكن يكون ابتدائي أو نهائي.
ممكن نحصل على هاد التأثير بعدة طرق، منها
أولا – بإضافة لون معاكس للون تأسيس قطعة العمل
يعني إزا التأسيس بلون فاتح، التعتيق بيكون بلون غامق والعكس صحيح، لكن ممكن بأي لون غامق مافي مشكلة. ولون التعتيق بيكون بشكل خفيف,وبشفافية عالية عند التطبيق (مش بشكل كامل أو كثيف) وبشكل عشوائي. ممكن نستعمل دهان أكريليلك باستخدام فرشاة ناشفة. أو أحبار التعتيق الخاصة ( Distress inks ) لكن يفضّل إستخدام أحبار دائمة ومقاومة للماء. بحمّل الفرشاية الناشفة كمية قليلة قليلة جدا من الدهان و على قماشة أو ممكن منديل ورقي بخفف من الدهان و بعدها بدهن بضربات خفيفة وعشوائية على مناطق مختلفة من سطح العمل لحتى أوصل النتيجة اللي بدي ياها.
هاد النوع من التعقيق ممكن يكون إبتدائي أو نهائي
تانيا – ورق الصنفرة (بنحكيله بالأردن ورق الزجاج)
بهاد النوع رح أحتاج أدهن قطعة العمل يا بلون واحد من الدهان، أو بلونبن مختلفين من الدهان, واللونين متعاكسين أو بينهم تناقض بدرجة عالية. إزا دهنت بلون واحد، التعتيق رح يكون بظهور لون قطعة العمل الأصلي (مثلا إزا قطعة العمل من خشب، رح يظهة عندي لون الخشب الأصلي)، وإزا كان عنا الدهان بلونين رح يظهر لون الدهان اللي بستخدمه للطبقة الأولي. ندهن قطعة العمل باللون الأساسي اللي بدنا ياه .بس ينشف الدهان الأساسي، بدهن طبقة تانية لكن باللون المعاكس وبستنى ينشف الدهان (إزا ما استخدمنا غير دهان بلون واحد بنتقل لخطوة إستخدام ورق الصنفرة مباشرة بعد ما تنشف الطبقة الأولى من الدهان). باستخدام ورق الصنفرة (بيتواجد بمحلات مواد البنا وبدرجات مختلفة من الخشونة، لشغلنا هاد ما بين 120 و200 مناسب. كل ما زاد الرقم على ورق الصنفرة كل ما كان أنعم، يعني ال 120 أخشن من ال 200، اختاروا الدرجة اللي بتناسبكم) بصنفر سطح العمل، بضربات خفيفة ومناطق عشوائية من سطح العمل. ما أشد كتير على ورق الصنفرة وأحاول تكون الضربات كلها بإتجاه واحد. حتى أوصل للنتيجة اللي بدنا ياها. هاد النوع من التأثير هو إبتدائي، عشان ورق الصنفرة ممكن يؤثر على ورق الديكوباج ويغيّر من تفاصيب الصور يفضّل ما نستعمله كتأثير نهائي.
ثالثا – الشمع
بهاد النوع رح أحتاج أدهن قطعة العمل بلونبن مختلفين من الدهان, ولونين متعاكسين أو بينهم تناقض بدرجة عالية. بندهن قطعة العمل باللون الأساسي اللي بدنا ياه (هاد اللون هو رح يكون لون التعتيق). بس ينشف الدهان الأساسي، باستخدام شمعة غير ملونة، بفرك الشمعة بخطوط بنفس الإتجاه بمناطق عشوائية من سطح العمل, بحيث يصير عندي طبقة خفيفة من الشمع نتيجة الإحتكاك. بس أوصل للنتيجة اللي بدي ياها أو غطيت سطح العمل بشكل كافي, بدهن الطبقة التانية من الدهان باللون المعاكس. بس تنشف طبقة الدهان، ورق الصنفرة بصنفر السطح بشكل خفيف. الأماكن اللي متواجد عليها الشمع رح تتصنفر الطبقة الثانية من الدهان، وبالتالي يظهر اللون /الدهان السفلي أو الأساسي. شو الفرق بين التعتيق بالشمع وورق الصنفرة وبورق الصنفرة لوحده؟ الصور رح تكون الحكم و تظهر لكم الفروق.
شخصيا – أنا بفضّل إضافة اللون المعاكس والشمع
تشكيل سطح العمل
وهاد بنقصد فيه نعطي سطح العمل شكل مختلف باستخدام مواد مختلفة. رح نستعمل طرق مختلفة وكل طريقة بتعطي نتيجة مختلفة، وباختلاف الطرق تشكيل سطح العمل بيكون تأثير إبتدائي.
باستخدام معجون التشكيل أو بدائله المصنوعة يدويا
رح نحتاج بما يعرف (مدية الرسام) والمستخدمة لمزج الألوان أو الرسم. بالإنجليزي Palette Knife
باستخدام المدية، وبكمية من معجون التشكيل (Texture paste or Medeling paste)، أو بدائله (رح نحكي عنهم إن شاء الله بالتفصيل قريبا) مثلا، الجبس (المخلوط بكمية ماء ليصبح مثل المعجون الدبق الناشف أو الكثيف – مش لدرجة السيولة) أدهن المادة المستخدمة على السطح أوزعها بطريقة عشوائية حتى تعطينا تفاوت في السماكة (بشكل خفيف مش سماكة مبالغ فبها). وبتركها تنشف. إزا لقينا الطبقة سميكة أكتر من ما كنّا راغبين، أو عنا تكتلات سميكة بأماكن معينة، ممكن نستخدم ورق صنفرة ناعم (قياس 200 مثلا) لتوحيد السماكة و إزالة التكتلات.
باستخدام الورق الخفيف أو المناديل الورقية
تتذكروا الورق والمناديل الورقية اللي زادت من وقت تجهيزها للطباعة؟ بنقدر نستعملها بهاد التأثير. حسب اللي عم أستخدمه، إزا كان الورق الخفيف أو المنديل الورقي، بستخدم قطعة، بجعلكها/بكرمشها بشكل جيد ثم برجع أفردها. باستخدام الغرا بثبتها على سطح العمل بشكل مكرمش مجعلك (شو المصطلح اللي بتستخدموه؟) وعشوائي. بخليها لتنشف.
استخدام قشر البيض أو قطع الورق
باستخدام قشر البيض – بكون نظفته وأزلت الغلاف الأبيض الداخلي – وبلصقه على سطح العمل بشكل قطعه المكسرة حسب الحجم المطلوب.
قطع الورق – بقدر أحصل عليها بكثير طرق – ممكن باستخدام المقص، وقص أشكال عشوائية أو هندسية. لكن لهاي الأشكال بيكون أطراف مستقيمة حادة. إزا كنّا حابين نحصّل على أطراف وحواف عشوائية أكتر، ممكن أقصها باليد أو أستخدم القطع الناتجة عن الخرامات بالأشكال المختلفة أو حتى ماكينات القص الإلكترونية. المهم نحصل على قطع منفصلة عشوائية أو ممكن أشكال هندسية أو أشكال زهور أزا كنا حابين شكل معين أو زخرفة معينة (بنتيجة مشابهة لإستخدام الستنسلز – رح نحكي عنهم كمان شوي).
طريقة التطبيق – سهلة جدا، لكن بتتطلب وقت طويل شوي. بدهن طبقة من الغرا على سطح العمل، وببلش أثّبت القطع (قشر البيض أو قصاصات الورق) بشكل عشوائي، ممكن أترك فراغات ما بينها أو أثبتها أطرافها فوق بعض (بس بنحرص ما تزيد السماكة عند أطراف وحواف القطع بشكل مبالغ). بس أغطي سطح العمل بشكل كامل أو حسب الرغبة, بترك الغرا ينشف
الكراكل
بنقصد فيه – التشقق. يعني تشقق سطح العمل أو بشكل أدق، تشقق طبقة الدهان على سطح العمل. و نوعين: إبتدائي و نهائي
الإبتدائي نحنا بنعمله بمواد وطرق بديلة: بدها شوية شغل، لكن النتيجة جميلة
النهائي بحتاج مادة متخصصة لأحداث تأثير الكراكل أو التشقق
الإبتدائي: كل اللي رح أحتاجه – دهان أكريليك لونين متعاكسين وغرا خشب أبيض
اللون اللي بدي ياه يظهر/يبيّن من خلال الشقوق هو اللون اللي بدهنه أول طبقة. بس ينشف، بدهن طبقة متوسطة من الغرا (غير مخفف ديروا بالكم، مش متل خلطة غرا الديكوباج) وبتركه ينشف دقيقتين مش أكتر – إنه فقط تثبت الطبقة الخارجية للغرا ومش يكون ناشف بشكل كامل
بدهان الأكريليك اللون الثاني، وباستخدام إسفنجة أو فرشاية بدهن طبقة فوق طيقة الغرا. بكون حريصة كتير إنه ضربات الفرشاية أو الإسفنجة بكون خفيفة جدا (ما أحرك الغرا مع الضربات). إزا عم أستعمل الفرشاية حسب إتجاه الضربة والفرشاية رح يكون إتجاه التشققات بشكل أساسي. بكمّل حتى أغطي المساحة كاملة. وبخليهم ينشفوا
ممكن إزا حابة تأثير أقوى وتشققات أكتر أستعمل السشوار أو المسدس الحراري
إزا كنت عم أستعمل مادة الكراكل الخصوصي، بعد ما أخلص دكبجة، بدهن المادة حسب التعليمات (عادة بتكون مكوّنة من جزئين وخطوتين، بس بإختلاف الماركات ممكن تختلف الأمور) وبس تنشف المادة بلاحظ تكوّن التشققات. ممكن أظهرها بشكل أوضح إزا استخدمت لون غامق وفركت/دهنت سطح العمل بهاد اللون الغامق وثم مسحته بمنديل مبلل لتنظيف السطح. اللي بيصير، اللون الغامق بيترسب داخل التشققات، والمنديل المبلل بينظف ويزيل اللون عن الأماكن التانية من سطح العمل دون الوصول داخل التشققات ف بيضل اللون الغامق داخلها وبينشف
الأختام والمراسيم – الستنسلز
ممكن تكون إبتدائية أو نهائية، بتكون حسب الرغبة أو حسب المظهر المطلوب و المرغوب. هو رح نحتاج الأختام الخاصة و المراسيم الخاصة (اللي هي معروفة بالستنسلز – الأشكال المفرغة اللي ممكن نلون من خلالها أو نستعمل معجون التشكيل). في عنا مجموعة كبيرة من النوعين و بأشكال مختلفة و ممكن نصنع أختامنا و مراسمينا الخاصة يدويا (موجود مقالة و فيديو خاص فيها). الأختام رح نحتاج نوع حبر خصوصي – يكون ثابت و ضد الماء عشان ما يرجع يسيل مع الغرا بس نضيفه ، متل ماركة
Staz on or Archival ink
– للأسف مش متواجدين بالأردن بشكل واسع (ما لقيتهم غير عند شي كان سكراب بوكنج و مش دايما متوفرين و مش كل الألوان) بالخليج متوفرين بالمحلات المتخصصة بالحرف أو المتاجر الأون لاين (يا ريت تساعدونا و تحكولنا وين ممكن متوفرين عندكم ببلادكم).
نفس الإشي الستنسلز – متوفرين بأماكن محددة بالأردن متل جوردان آرت شوب و المكتبات الكبيرة بس
طريقة إستخدامهم سهلة كتير، ممكن تتابعوها معنا بالفيديو، و في مقالة و فيديو مخصص إلها بالأجزاء القادمة.