ماهي إستخدامات مادة الريزن؟

مجال إستخدام الريزن واسع جدا، من مجالات صناعية (حماية و أرضيات و   مواد مغلفة و حامية و مواد تلميع و مواد لاصقة)، إلى مجالات طبية ( عوازل بلاستيكية، حاميات طبية، و أطراف صناعية) و المجالات الحرفية

بالمجالات الحرفية الريزن ممكن إستخدامه في

تشكيل لوحات فنية (Resin Pouring – سكب الريزن)

(Molding and mold pouring)  تشكيل المجسمات و الأشكال 
 للصب في القوالب المشكلة،  مثل تشكيل الكوسترات و الصواني و غير ذلك من القطع الأمثلة

حماية القطع و اللوحات. مثلا في مجال الديكوباج يستخدم الريزن كطبقة حماية نهائية لقطعة العمل
ممكن لوحات الأكريليك أو حتى الزيتية (تحت شروط معينة) ندهنها طبقة من الريزن كحماية ضد العوامل

المجوهرات و الإكسسوارات. تشكيل قطع الإكسسوار و المجوهرات بإختلاف أفكارها و أشكالها، ما يعرف بتوزيعات الحفلات و الهدايا و الخ الخ

هدول جزء من النواحي اللي ممكن نستخدم الريزن فيها ضمن المجالات الحرفية و أكيد مش كلها. بس بشكل عام (يعني على وجه العموم و مش بالتحديد) غايات إستخدام الريزن بتكون إمّا صب أو تغليف. كيف يعني؟

صب، و بالإنجليزي casting : هي إنه الريزن يشكّل طبقة أسمك من 0.5 سم كحد أدنى

التغليف، و بالإنجليزي coating: إنه الريزن يشكّل طبقة أرفع من 0.5 سم كحد أقصى

يعني سماكة طبقة الريزن النهائية بقطعة العمل أكتر من 0.5 سم بتكون صب، و إزا سماكة طبقة الريزن أقل من 0.5 سم بتكون تغليف

الأرقام هاي كمتوسط لأنواع الريزن المختلفة و مش رقم ثابت لكل أنواع الريزن

فبالتالي حسب الشغل اللي أنا بدي أشتغله و القطعة اللي بدي ياها و سماكة طبقة الريزن النهائية، رح يكون أختيار النوع المناسب من الريزن و كيفية العمل و خطوات الشغل إشي أساسي لإنجاح القطعة النهائية بشكل كبير

ف رح يكون أساس إختيار الريزن و كيفية العمل معه – نوعه و من ثم الغاية المرجوة منه، إمّا صب أو تغليف

يعني ممكن أختار بوليستير، مخصص للصب، أو إيبوكسي مخصص للتغليف، أو إيبوكسي مخصص للصب و بولي يوثيرين مخصص للتغطية. كله بيرجع لشو القطعة اللي بدي أشتغل عليها/أعملها