أولا – التخطيط
هاي المرحلة اللي بنخطط فيها كل إشي بتعلق بقطعة العمل، من القطعة اللي بدنا نشتغل عليها، تأسيسها وتجهيزها، من التصميم والورق اللي بدي ألزقه أو ألصقه عليها، من التأثيرات اللي بدي أعملها عالقطعة والمواد والأدوات اللي بدي أستعملها حتى الغرا أو اللاصق اللي بدي أستعمله. عشان هيك خلينا نحكي أول إشي عن الأدوات والمواد الأساسية لعملية الديكوباج، والبدائل المحلية أو اللي ممكن نصنعها عنا بالبيت إزا ما لقينا المواد المتخصصة أو الخصوصي، وكيف نجهّز أمورنا وتصميمنا قبل ما نلّش شغل
أهم إشي نعرفه قبل ما نبلش شغل على أس قطعة، إنه في عنا قاعدة دهبية
بعّد (إبعد) عن البلاستيك و غنيّله
رح نحكي كيف و ليش بالتفصيل بس نحكي عن تأسيس قطع العمل و تجهيزها
رح يكون عنا أربعة فيديوهات لتوضيح مرحلة التخطيط و هي
الغرا أو اللاصق : رح نحكي عن أنواع الغرا، نعمل صمغنا الخاص اللي بنستبدل فيه غرا البديكوباج الخصوصي (المود بودج أو الأنواع التانية متل كادنس أو إلينّز أو ليكويتيكس أو جولدن أكريليك وهلم جرا) ومعلومات و شرح كتيرة
ورق الديكوباج: رح نحكي عن أنواع الورق اللي بنقدر نستعملها بالديكوباج، و رح نحكي عن طباعة الإنك جت والليزر إزا بدنا نطبع طباعة، وكيف بنقدر ندكبج مع الورق المطبوع إنك جت و كيف نطبع ورقنا الخاص لمشروعنا ( بجميع أنواعه حتى النابكينز – الفاين)، ووين ممكن نلاقي الصور اللي ممكن نستعملها ونطبعها
التأثيرات و الألوان: رح نحكي عن الألوان اللي بنقدر تسنتعملها و فكرة عن خلط الألوان، والتأثيرات اللي ممكن نعملها لنخّلي قطعتنا أحلى وأحلى، متل التعتيق والكراكل ومتى وكيف نعملهم ونثبتهم و أشياء تانية إن شاء الله
الأختام و الستنسلز: شرح بسيط عن الستنسيلز – الكلمة العربية المرادفة إلها هي مرسام – و كيف نستعملهم ومع إيش، و كيف نعمل الستنسلات الخاصة فينا. و الأختام الزخرفية و أنواع الأحبار اللي بقدر استعملها، و كيف ممكن أعمل أختام زخرفية بسيطة