…ونبدأ القول ببسم الله
المشرط، بقصد فيه أي أداة بتكون عملية القص من خلال طرف حاد مثل الشفرة
![](https://jawza2.com/wp-content/uploads/2022/04/DJI_20171025_222849-1024x576.jpg)
متوفر عدة أنواع، اختيار نوع المشرط بيعتمد على طبيعة وسماكة المادة اللي بدنا نقصها
المشرط العادي المتعارف عليه، درجة التحكم عالية، وممكن نستعلمه لقص سماكات ومواد مختلفة. لكن صعب نقص تفاصيل صغيرة أو دقيقة. السبب ممكن يرجع لطريقة الإمساك بالمشرط، اللي بيكون بكامل راحة اليد خصوصي إزا كانت المادة اللي عم نقصها سميكة – متل السجاد مثلا –. ممكن كمان إنه شفرة المشرط بتكون عريضة، ف من الصعب نضلنا ع خط القص اللي بيتضمن تفاصيل دقيقة
![](https://jawza2.com/wp-content/uploads/2022/04/DJI_20171025_222858-1024x576.jpg)
المشرط القلم، نمسكه متل القلم ودرجة التحكم عالية، ممكن نستعمله لقص تفاصيل دقيقة وصغيرة، لكن ما بنقدر نستعمله غير لسماكات رفيعة. يعني للورق، الكرتون، وحتى أنواع معينة من القماش لكن مش كلها
![](https://jawza2.com/wp-content/uploads/2022/04/DJI_20171025_222912-1024x576.jpg)
في كمان عنا المشرط الدوار، هاد ممتاز للقماش لكن ما بنقدر نستعمله للتفاصيل الدقيقة أو للمواد السميكة. لأنه الشفرة بتكون ع شكل دائرة، و طرف الشفرة الحاد بيكون عمدار محيط الدائرة. ف صعب جدا قص أي نوع من التفاصيل، و الأفضل استخدامه مع خطوط مستقيمة أو منحنية بس ما فيها منعطفات حادة
![](https://jawza2.com/wp-content/uploads/2022/04/DJI_20171025_222951-1024x576.jpg)
وفي مشرط خصوصي ليقص الدوائر، بتحدد نص قطر الدائرة اللي بدك ياها وبنثبت رأس محور الدوران ع مركز الدائرة، و بنستعمله متل الفرجار بتحريك الشفرة، و الأفضل استخدامه مع مواد ذات سماكات رفيعة
ليش نستعمل هاد النوع من المشارط ما دام بقدر أستعمل الأنواع التانية، أو حتى المقص لأقص الدوائر؟
السبب هو إنه هاد المشرط بيعطينا دوائر منتظمة بشكل دقيق، اللي ما بنقدر نحصل عليها لو استخدمنا المقص أو الأنواع التانية من المشارط
![](https://jawza2.com/wp-content/uploads/2022/04/DJI_20171025_223055-1024x576.jpg)
الأربع أنواع اللي حكينا عنهم فوق إلهم ميزة الشفرات البديلة. بقدر بكل سهولة أستبدل الشفرة القديمة بشفرة جديدة بدون ما أحتاج أشتري مشرط جديد
تمام التمام، في مشارط بيكون إلها شكل محدد للقص متل خرامة الورق
(punches)
، يعني الشفرة بيكون إلها شكل معين ومتواجدة داخل الخرامة والقص الناتج بيكون ع هاد الشكل. منها أشكال كتيرة وأحجام مختلفة، لكن مشكلتها إنه ما بتقص غير مادة سماكتها رفيعة نوعا ما و أكيد حسب نوع الخرامة، والخرامة الواحدة ما بتقص إلا شكل وحجم واحد ف إزا بدي شكل/حجم مختلف لازم أشتري خرامة تانية بالشكل و الحجم المطلوبين
![](https://jawza2.com/wp-content/uploads/2022/04/blades-copy-1024x683.jpg)
أسعار الخرامات اللي بتقص بالأحجام المتوسطة للكبيرة عادة بتكون غالية السعر
أيضا مشكلة تانية إلها، إنه متى ما بلشت الشفرة تبلى أو تبطل تقص منيح، ما في مجال أبدلها، لازم أشتري خرامة جديدة. لكن ممكن بشكل بسيط أجدد (أشحذ) شفرة الخرامة بأنه أستعملها ع ورق زبدة أو ورق شمع، بعدين أقص (أخرم) ورق الألمنيوم (نعم تاع الطبخ، بكون تنيته على 3 أو 4 طبقات) وبعدين بستعمل الخرامة عليه. هيك بكون نوعا ما – شحذت – شفرة الخرامة وطوّلت من عمر استخدامها شوية أكتر.
في جديد صاير عنا ماكينات القص، منها اليدوي ومنها الإلكتروني. متى ما جبتوا وحدة منهم، ما رح تحتاجوا الخرامات العادية
![](https://jawza2.com/wp-content/uploads/2022/04/download-1024x950.jpg)
![](https://jawza2.com/wp-content/uploads/2022/04/10-1024x683.jpg)
الماكينات اليدوية (مثال عليها البيج شوت) بدها قوالب أو خرامات خاصة فيها. مشكلتها نفس مشكلة الخرامات العادية، لكل شكل أو حجم مختلف لازمني قالب أو خرامة منفصلة ف بيصير موضوع شراءها وتخزينها مشكلة، لأنه حجمهم نوعا ما كبير، حتى الماكينة نفسها نوعا ما حجمها كبير. بس الحلو فيها، بتقص سماكات لحد 3 مم تقريبا اللي ما بتقدر الخرامات العادية ولا حتى معظم ماكينات القص الإلكترونية تقصه
الماكينات الإلكترونية (و السيليويت أو الكريكت أمثلة عليها) مبدأها متل الطابعة، نشبك الماكينة عالكمبيوتر وبنزل برنامج الماكينة الخاص فيها، بس بدل بيت الحبر بيكون عنا بيت للشفرة وبيتم تحريكه حسب الشكل المطلوب من خلال البرنامج المستخدم. الحلو فيها، ممكن التحكم بالشكل والحجم المطلوب بدون أي قوالب أو خرامات خصوصي. لكن لازمها حصيرة مخصصة لتثبيت المادة المراد قصها – وهاي كل فترة وفترة لازم تتجدد لأن اللصق اللي عليها بيروح – بنحكي بالتفصيل عنها إن شاء الله – وكمان ما بقدر أستعملها بدون برنامجها الخصوصي اللي بيتطلب مهارات معينة وتعويد ع استخدامه، وفي أنواع معينة لازم يكون عندي اتصال بالإنترنت.
ف لكل نوع من ماكينات القص حسنات وسيئات لازم تفكروا فيها قبل ما تقرروا تشتروا منها
كخلاصة، أهم الأنواع اللي رح تحتاجوها بشكل أساسي هي المشرط العادي/القلم/الخرامات بالأشكال اللي بتستخدموها بشكل متكرر. إزا حابين تبلشوا بمشروع متخصص بنصحكم تشوفوا ماكينة يدوية أو إلكترونية حسب مطالب شغلكم أو مشروعكم. غير هيك تكلفة هاي الماكينات غير مبررة للاستخدام البسيط أو الهاوي