كيفية إنشاء المساحة الحرفية الخاصة بك في المنزل

أهم إشي إنه نستغل المساحة اللي بنشتغل فيها بأفضل شكل مهما كانت كبيرة أو صغيرة. طاولة المطبخ بعد ما يناوموا الأولاد،أو مكتبك بغرفتك بس تخلصي دراسة أو زاوية واسعة من غرفة زيادة عندك بالبيت، حتى ممكن أحط شرشف عالأرض وأشتغل، ما بيفرق. أهم إشي قبل ما نشتغل،لازم نخلي ببالنا 4 مناطق –أربعة بتقديري المتواضع – واللي هي

منطقة التخزين: عشان نحط ونخزن المواد والأدوات الخام اللي بحتاجها بمجال حرفتي، قماش أو خشب أو صناديق الخ. هاي المنطقة ما بحتاج أوصلها غير لما أبلش مشروع جديد أو ينقص علي مواد من مشروع حالي

منطقة سهلة الوصول: هون بحط الأدوات والمواد اللي عم أشتغل عليها/فيها مثلا، أو بحتاجها بشكل متكرر. متل الطابعة مثلا، أي ماكينات تانية بستعملها، الورق والباترونات، الأقلام والألوان والفراشي، كله حسب أنا شو عم أشتغل

منطقة الوصول المباشر: هاي بتكون فيها الأدوات – أغلب الأحيان بتكون أدوات – اللي بستعلمها بشكل أساسي ومستمر غير منقطع وبتكون مشتركة باختلاف المشاريع. المقصات والمواد اللاصقة والمساطر، الكاميرا مثلا وشاحنها للناس اللي بيصوروا خطوات شغلهم

منطقة العمل: هاااااي المنطقة بتكون للشغل – قص وتلزيق ونقيم ونحط ونشتغل براحتنا فيها. لازم يكون عنا إضاءة منيحة، قعدتنا مريحة خصوصي إزا وقت شغلنا طويل

تمام، حددنا الأربع مناطق الأساسية هلأ، حسب المساحة المتوفرة عندي ممكن هدول المناطق يكونوا مع بعض سوا، أو يكونوا منفصلين

منطقة التخزين لو بعيدة أو صعب نوصلها مش مشكلة لأنه ما بحتاجها إلا مرات محدودة – بش أبلش أو لما ينقص علي مواد. على فكرة، ممكن نلغي منطقة التخزين -المتعلقة بالمواد- بشكل كامل إزا كنت قريبة من السوق مثلا وسهل علي أوصل المحلات ف بالتالي ما بحتاج أشتري كميات كبيرة أو زيادة وأخزّن، بس هادا مش حل عملي، مثلا خلصت عندي مادة معينة بنص المشروع لازم أزقف شغل و أطلع أجيب اللي ناقصني. لكن ممكن نعمل هيك كحل وسط إزا عندي المساحة ضيقة كتير بالبيت. لازم يكون عنا تخطيط مسبق ومدروس لخطوات ومواد المشروع إزا بدنا نلغي المنطقة هاي. أو إزا كانت الحرف اليدوية بالنسبة إلي كهواية وبشتغل بمشروع فردي كل مرة ف ممكن ما أحتاج أخزن بشكل كبيرلأنه موادي ع قد مشروعي

مناطق الوصول السهلة والمباشرة هدول لازم يكون ضمن متناول الذراع وأنا عم أشتغل. عشان ما أضيع وقت وأنا  عم أروح وأجي من مكاني وأضيع وقت ومجهود، وأحيانا الشغل بيكون دقيق ف صعب أتركه وأروح عشان أجيب إشي نسيته أو بحاجته. ازا عم أشتغل عمكتب، ممكن الدروج أعتبرهم مناطق سهلة الوصول، وسطح المكتب منطقة وصول مباشر مع منطقة العمل. ممكن أكسب الحيط كمساحة للتخزين والوصول المباشر وأخلي سطح المكتب للشغل والعمل فاضيين

منطقة العمل، بيحددها بشكل أساسي المساحة المتوفرة عنا و طبيعة الشغل. متل ما حكينا ممكن تكون طاولة المطبخ، أو إنتوا قاعدين بالكرسي المفضل إلكم بالمعيشة أو عندكم زاوية بغرفة تحطوا فيها مكتب ورفّين. لمناطق العمل الصغيرة، اللي بتكون غير مخصصة للشغل اليدوي، أو اللي بتتشارك بأشياء تانية -طاولة المطبخ مرة تانية على سبيل المثال – أفضل حل بيكون إلك تخصصي سلة حجمها مناسب لأغراضك وأدواتك، بتحطيهم فيها وقت ما عم تشتغلي فيهم، وبس ييجي دورهم بطلعهم، بشتغل حسب مكان ومنطقة عملي، وبس اخلص برجع بحطهم بالسلة – فش سلة؟ علبة عادية وبتزيينها أو بتخليها متل ما هي، كيس حلو كمان بينفع، المهم المبدأ